Mahabharata · Chapter 3.155

pāṇḍavo bhīmaseno'haṃ dharmarājādanantaraḥ /
viśālāṃ badarīṃ prāpto bhrātṛbhiḥ saha rākṣasāḥ //

apaśyattatrapāñcālī saugandhikamanuttamam /
aniloḍhamito nūnaṃ sā bahūni parīpsati //

tasyā māmanavadyāṅgyā dharmapatnyāḥ priye sthitam /
puṣpāhāramiha prāptaṃ nibodhata niśācarāḥ //
rākṣasā ūcuḥ /

ākrīḍo'yaṃ kuberasya dayitaḥ puruṣarṣabha /
neha śakyaṃ manuṣyeṇa vihartuṃ martyadharmaṇā //

devarṣayastathā yakṣā devāścātra vṛkodara /
āmantrya yakṣapravaraṃ pibanti ca haranti ca //

gandharvāpsarasaścaiva viharantyatra pāṇḍava /
yakṣādhipasyānumate kuberas mahātmanaḥ //

anyāyeneha yaḥ kaścidavamanya dhaneśvaram /
vihartumiccheddurvṛttaḥ sa vinaśyenna saṃśayaḥ //

tamanādṛtya padmāni jihīrṣasi balādiha /
dharmarājasya cātmānaṃ bravīṣi bhrātaraṃ katham //

[āmantrya yakṣarājaṃ vai tataḥ piva harasva ca /
nāto'nyathā tvayā śakyaṃ kiñcitpuṣkaramīkṣituṃ //
bhīmasena uvāca /

rākṣasāstaṃ na paśyāmi dhaneśvaramihāntike /
dṛṣṭvā'pica mahārājaṃ nāhaṃ yācitumutsahe //

na hi yācanti rājāna eṣa dharmaḥ sanātanaḥ /
na cāhaṃ hātumicchāmi kṣātradharmaṃ kathañcana //

iyaṃ ca nalinī ramyā jātā parvatanirjhare /
neyaṃ bhavanamāsādyakuberasya mahātmanaḥ //

tulyā hi sarvabhūtānāmiyaṃ vaiśravaṇasya ca /
evaṃ gateṣu dravyeṣu kaḥ kaṃ yācitumarhati //

ityuktvā rākṣasānsarvānbhīmaseno vyagāhata /
tāṃ tu puṣkariṇīṃ vīraḥ prabhinna iva kuñjaraḥ //

tataḥ sa rākṣasairvācā pratiṣiddhaḥ pratāpavān /
mā maivamiti sakrodhairbhartsayadbhiḥ samantataḥ //

kadarthīkṛtyatu sa tānrākṣasānbhīmavikramaḥ /
vyagāhata mahātejāste taṃ sarve nyavārayan //

gṛhṇīta badhnīta vikartatemaṃ pacāma khādāma ca bhīmasenam /
kruddhā bruvanto'bhiyayurdrataṃ te śastrāṇi codyamya vivṛttanetrāḥ //

pragṛhyatānabhyapatattarasvī tato'bravīttiṣṭhata tiṣṭhateti //
te taṃ tadā tomarapaṭṭasādyai- rvyāviddhaśastraiḥ sahasā nipetuḥ /

jighāṃsavaḥ krodhavaśāḥ subhīmā bhīmaṃ samantātparivavrurugrāḥ /
jighāṃsavaḥ krodhavaśāḥ subhīmā bhīmaṃ samantātparivabrurugrāḥ //

vātena kuntyāṃ balavānsujātaḥ śūrastarasvī dviṣatāṃ nihantā /
satye ca dharme ca rataḥ sadaiva parākrame śatrubhirapradhṛṣyaḥ //

teṣāṃ sa mārgānvividhānmahātmā nihatya śastrāṇi ca śāstravāṇām /
yathā pravīrānnijaghāna bhīmaḥ paraśśatānpuṣkariṇīsamīpe //

te tasya vīryaṃ ca balaṃ ca dṛṣṭvā vidyābalambāhubalaṃ tathaiva /
aśaknuvantaḥ sahitaṃ samantā- ddrutaṃ pravīrā sahasā nivṛttāḥ //

vidīryamāṇāstata eva tūrṇa- mākāśamāsthāya vimūḍhasañjñāḥ /
kailāsaśṛṅgāṇyabhidudruvuste bhīmārditāḥ krodhavaśāḥ prabhagnāḥ //

sa śakravaddānavadaityasaṅghān vikramya jitvā ca raṇe'risaṅghān /
vigāhyatāṃ puṣkarīṇīṃ jitāriḥ kāmaṃ sa jagrāha tato'mbujāni //

tataḥ sa pītvā'mṛtakalpamambho bhūyo babhūvottamavīryatejāḥ /
utpāṭya jagrāha tato'mbujāni saugandhikānyuttamagandhavanti //

tatastu te krodhavaśāḥ sametya dhaneśvaraṃ bhīmabalapraṇunnāḥ /
bhīmasya vīryaṃ ca balaṃ ca saṃkhye yathāvadācakhyuratīva dīnāḥ //

teṣāṃ vacastattu niśāmya devaḥ prahasya rakṣāṃsi tato'bhyuvāca /
gṛhṇātu bhīmo jalajāni kāmaṃ kṛṣṇānimittaṃ viditaṃ mamaitat //

tato'bhyanujñāya dhaneśvaraṃ te jagmuḥ kurūṇāṃ pravaraṃ viroṣāḥ /
bhīmaṃ ca tasyāṃ dadṛśurnalinyāṃ yathopajoṣaṃ viharantamekam //