Mahabharata · Chapter 3.157

tasminnivasamāno'tha dharmarājo yudhiṣṭhiraḥ /
āmantrya sahitānbhrātṛnityuvāca sahadvijān //

dṛṣṭāni tīrthānyasmābhiḥ puṇyāni ca śivāni ca /
manaso hlādanīyāni vanāni ca pṛthakpṛthak //

devaiḥ pūrvaṃ vicīrṇāni munibhiśca mahātmabhiḥ /
yathākramamaśeṣeṇa dvijaiḥ sampūjitāni ca //

ṛṣīṇāṃ pūrvacaritaṃ tapodharmaviceṣṭitam /
rājarṣīṇāṃ ca caritaṃ kathāśca vividhāḥ śubhāḥ //

śṛṇvānāstatratatra sma āśrameṣu śiveṣu ca /
abhiṣekaṃ dvijaiḥ sārdhaṃ kṛtavanto viśeṣataḥ //

arcitāḥ satataṃ devāḥ puṣpairadbhiḥ sadā ca vaḥ /
yathālabdhairmūlaphalaiḥ pitaraścāpi tarpitāḥ //

parvateṣu ca ramyeṣu sarveṣu ca sarassu ca /
udadhau ca mahāpuṇye sūpaspṛṣṭaṃ mahātmabhiḥ //

ilā sarasvatī sindhuryamunā narmadā tathā /
nānātīrtheṣu ramyeṣu sūpaspṛṣṭaṃ saha dvijaiḥ //

gaṅgādvāramatikramya bahavaḥ parvatāḥ śubhāḥ /
himavānparvataścaiva nānādvijagaṇāyutaḥ //

viśālā badarī dṛṣṭā naranārāyaṇāśramaḥ /
divyapuṣkariṇī dṛṣṭā siddhadevarṣipūjitā //

yathākramaviśeṣeṇa sarvāṇyāyatanāni ca /
darśitāni dvijenadreṇa lomaśena mahātmanā //

imaṃ vaiśravaṇāvāsaṃ durgamaṃ gandhamādanam /
kathaṃ bhīma gamiṣyāmo matiratra vidhīyatām //
vaiśampāyana uvāca /

evaṃ bruvati rājendre vāguvācāśarīriṇī /
na śakyo durgamo gantuṃ parvato gandhamādanaḥ //

ananaiva pathā rājanpratigaccha yathāgatam /
naranārāyaṇasthānaṃ badarītyabhiviśrutam //

tasmādyāsyasi kaunteya siddhacāraṇasevitam /
bahupuṣpaphalaṃ ramyamāśramaṃ vṛṣaparvaṇaḥ //

atikramya ca taṃ pārtha tvārṣṭiṣeṇāśrame vaseḥ /
tato drakṣyasi kaunteya niveśaṃ dhanadasya ca //

etasminnantare vāyurdivyagandhavahaḥ śubhaḥ /
bhanaḥprahlādanaḥ śītaḥ puṣpavarṣaṃ vavarṣa vai //

tacchrutvā divyamākāśādvismayaḥ samapadyata /
ṛṣīṇāṃ brāhmaṇānāṃ ca pārthivānāṃ viśeṣataḥ //

śrutvā tanmahadāścaryaṃ dvijo dhaumyastvabhāṣata /
na śakyamuttaraṃ gantuṃ pratigacchāma pāṇḍava //

tato yudhiṣṭhiro rājā vismayotphullalocanaḥ / [pratyāgamya punastaṃ tu naranārāyaṇāśramam // ]

bhīmasenādibhiḥ sarvairbhrātṛbhiḥ parivāritaḥ / pāñcālyā brāhmaṇaiścaiva nyavasatsusukhaṃ tadā //