Mahabharata · Chapter 3.15

vāsudeva mahābāho vistareṇa mahāmate /
saubhasya vadhamācakṣva na hi tṛṣyāmi kathyataḥ //
vāsudeva uvāca /

hataṃ śrutvā mahābāhau mayā śrautaśravaṃ nṛpa /
upāyādbharataśreṣṭha sālvo dvāravatīṃ purīm //

aruṇattāṃ suduṣṭātmā sarvataḥ pāṇḍunandana /
sālvo vaihāyasaṃ cāpi tatpuraṃ vyūhya dhiṣṭhitaḥ //

tatrastho'tha mahīpālo yodhayāmāsa tāṃ purīm /
abhisāreṇa sarveṇa tatra yuddhamavartata //

purī samantādvihitā sapatākā satoraṇā /
sacakrā sahuḍā caiva sayantrakhanakā tathā //

sopaśalyapratolīkā sāṭṭāṭṭālakagopurā /
sacakragrahiṇī caiva solkālātāvapothikā //

soṣṭikā bharataśreṣṭha sabherīpaṇavānakā /
satomarāṅkuśā rājansaśataghnīkalāṅgalā //

sabhuśuṇḍyaśmaguḍakā sāyudhā saparaśvadhā / lohacarmavatī cāpi sāgniḥ saguḍaśṛṅgikā /
śāstradṛṣṭena vidhinā suyuktā bharatarṣabha //

rathairanekairvividhairgadasāmboddhavādibhiḥ /
puruṣaiḥ kuruśārdūla samarthaiḥ prativāraṇe //

atikhyātakulairvīrairdṛṣṭavīryaiśca saṃyuge / madhyamena ca gulmena rakṣibhiḥ sā surakṣitā /
utkṣiptagulmaiśca tathā hayaiśca sapatākibhiḥ //

āghoṣitaṃ ca nagare na pātavyā sureti vai /
pramādaṃ parirakṣadbhirugrasenoddhavādibhiḥ //

pramatteṣvabhighātaṃ hi kuryātsālvo narādhipaḥ /
iti kṛtvā'pramattāste sarvevṛṣṇyandhakāḥ sthitāḥ //

ānartāśca tathā sarve naṭanartakagāyakāḥ /
bahirnirvāsitāḥ sarve rakṣadbhirvittasañcayam //

sankramā bheditāḥ sarve nāvaśca pratiṣedhitāḥ /
parikhāścāpi kauravya kīlaiḥ sunicitāḥ kṛtāḥ //

udapānāḥ kuruśreṣṭha tathaivāpyambarīṣakāḥ / samantātkrośamātraṃ ca kāritā viṣamā ca bhūḥ /
sankramā bheditāḥ sarve prākārāśca navīkṛtāḥ //

prakṛtyā viṣamaṃ durgaṃ prakṛtyā ca surakṣitam /
prakṛtyā cāyudhopetaṃ viśeṣeṇa tadā'nagha //

surakṣitaṃ suguptaṃ ca sarvāyudhasamanvitam /
tatpuraṃ bharataśreṣṭha yathendrabhavanaṃ tathā //

na cāmudro'bhiniryāti na cāmudraḥ praveśyate /
vṛṣṇyandhakapure rājaṃstadā saubhasamāgame //

anuradhyāsu sarvāsu catvareṣu ca kaurava /
balaṃ babhūva rājendra prabhūtagajavājimat //

dattavetanabhaktaṃ ca dattāyudhaparicchadam /
kṛtopadhānaṃ ca tadā balamāsīdviśāmpate //

na kṛpyavetanī kaścinna cātikrāntavetanī /
nānugrahabhṛtaḥ kaścinna cādṛṣṭaparākramaḥ //

evaṃ suvihitā rājandvārakā bhūridakṣiṇaiḥ / āhukena suguptā ca rājñā rājīvalocana //