Mahabharata · Chapter 3.14
asānnidhyaṃ kathaṃ kṛṣṇa tavāsīdvṛṣṇinandana /
kva cāsīdvipravāsaste kiñcākārṣīḥ pravāsataḥ //
kṛṣṇa uvāca /
sālvasya nagaraṃ saubhaṃ gato'haṃ bharatarṣabha /
nihantuṃ kauravaśreṣṭha tatra me śṛṇu kāraṇam //
mahātejā mahāṃvāhuryaḥ sa rājā mahāyaśāḥ /
damaghoṣātmajo vīraḥ śiśupālo mayā hataḥ //
yajñe te bharataśreṣṭha rājasūye'rhaṇāṃ prati /
sa roṣavaśamāpanno nāmṛṣyata durātmavān //
śrutvā taṃ nihataṃ sālvastīvraroṣasamanvitaḥ /
upāyāddvārakāṃ śūnyāmihasthe mayi bhārata //
sa tatra yuddhamakarodbālakairvṛṣṇipuṅgavaiḥ /
nivṛttaḥ kāmagaṃ saubhamāruhyaiva nṛśaṃsavat //
cirajīvī nṛpaḥ so'pi prasādātpadmajanmanaḥ / tato vṛṣṇipravīrāṃstānbālānhatvā bahūṃstadā /
purodyānāni sarvāṇi bhedayāmāsa durbhatiḥ //
uktavāṃśca mahābāho kvāsau vṛṣṇikulādhamaḥ /
vāsudevaḥ sa mandātmā vasudevasuto gataḥ //
tasya yuddhārthino darpaṃ yuddhenāśayitā'smyaham /
ānartāḥ satyamākhyāta tatra gantā'smi yatra saḥ //
taṃ hatvā vinivartiṣye kaṃsakeśiniṣūdanam / ahatvā na nivartiṣye satyenāyudhamālabhe /
kvāsau kvāsāviti punastatratatra pradhāvati /
mayā saha raṇe yoddhuṃ kāṅkṣamāṇaḥ sa saubharāṭ //
adyataṃ pāpakarmāṇaṃ kṣudraṃ viśvāsaghātinam /
śiśupālavadhāmarṣādgamayiṣye yamakṣayam //
mama pāpasvabhāvena bhrātā yena nipātitaḥ /
śiśupālo mahīpālastaṃ vadhiṣye mahītale //
bhrātā bālaśca rājā ca na ca sangrāmakovidaḥ / pramattaśca hato vīrastaṃ haniṣye janārdanam /
ekamādi mahārāja vilapyadivamāsthitaḥ /
kāmagena sa saubhena kṣiptvā māṃ kurunandana //
tamaśrauṣamahaṃ gatvā yathā vṛttaḥ sa durmatiḥ /
mayi kauravya duṣṭātmā mārtikāvatako nṛpaḥ //
tato'hamapi kauravya roṣavyākulalocanaḥ /
niścitya manasā rājanvadhāyāsya mano dadhe //
ānarteṣu vimardaṃ ca kṣepaṃ cātmani kaurava /
pravṛddhamavalepaṃ ca tasya duṣkṛtakarmaṇaḥ //
tataḥ saubhavadhāyāhaṃ pratasthe pṛthivīpate /
sa mayā sāgarāvarte dṛṣṭa āsītparīpsatā //
tataḥ pradhmāpya jalajaṃ pāñcajanyamahe nṛpa /
āhūya sālvaṃ samare yuddhāya samavasthitaḥ //
tanmuhūrtamabhūdyuddhaṃ tatra me dānavaiḥ saha /
śavībhūtāśca me sarve bhūtale ca nipātitāḥ //
etatkāryaṃ mahābāho yenāhaṃ nāgamaṃ tadā / śrutvaiva hāstinapure dyūtaṃ cāvinayotthitam /
drutamāgatavānyuṣmāndraṣṭukāmaḥ suduḥkhitān //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0