Mahabharata · Chapter 3.140

etasminneva kāle tu bṛhaddyumno mahīpatiḥ /
satraṃ tene mahābhāgo raibhyayājyaḥ pratāpavān //

tena raibhyasya vai putrāvarvāvasuparāsū /
vṛtau sahāyau satrārthaṃ bṛhaddyumnena dhīmatā //

tatra tau samanujñātau pitrā kaunteya jagmatuḥ /
āśrame tvabhavadraibhyo bhāryā caiva parāvasoḥ //

athāvalokako'gacchadgṛhānakaḥ parāvasuḥ /
kṛṣṇājinena saṃvītaṃ dadarśa pitaraṃ vane //

jaghanyarātre nidrāndhaḥ sāvaśeṣe tamasyāpi /
carantaṃ gahane'raṇye mene sa pitaraṃ mṛgam //

mṛgaṃ tu manyamānena pitā vai tena hiṃsitaḥ /
akāmayānena tadā śarīratrāṇamicchatā //

tasya sa pretakāryāṇi kṛtvā sarvāṇi bhārata /
punarāgamya tatsatramabravīddhātaraṃ vacaḥ //

idaṃ karma na śaktastvaṃ voḍhumekaḥ kathañcana /
mayā ca hiṃsitastāto manyamānena vai mṛgam //

so'smadarthe vrataṃ tāta cara tvaṃ brahmaghātinām /
samartho hyahamekākī karma kartumidaṃ mune //
arvāvasuruvāca /

karotu vai bhavānsatraṃ bṛhaddyumnasya dhīmataḥ /
brahmahatyāṃ cariṣye'haṃ tvadarthaṃ niyatendriyaḥ //
lomaśa uvāca /

sa tasyabrahmahatyāyāḥ pāraṃ gatvā yudhiṣṭhira /
arvāvasustadā satramājagāma punarmuniḥ //

tataḥ parāvasurdṛṣṭvā bhrātaraṃ samupasthitam /
bṛhaddyumnamuvācedaṃ vacanaṃ harṣagadgadam //

eṣa te brahmahā yajñaṃ mā draṣṭuṃ praviśediti /
brahmahā prekṣitenāpi pīḍayettvāmasaṃśayam //
lomaśa uvāca /

tacchrutvaiva tadā rājā preṣyānāha sa viṭ्pate / preṣyairutsāryamāṇastu rājannarvāvasustadā /
na mayā brahmahatyeyaṃ kṛtetyāha punaḥpunaḥ //

ucyamāno'sakṛtpreṣyairbrahmahā iti bhārata / naivasma pratijānāmi brhamahatyāṃ svayankṛtām /
mama bhrātrā kṛtamidaṃ mayā sa parimokṣitaḥ //

sa tathā pravadankrodhāttaiśca preṣyaiḥ prabhāṣitaḥ /
tūṣṇīṃ jagāma brahmarṣirvanameva mahātapāḥ //

ugraṃ tapaḥ samāsthāya divākaramathāśritaḥ /
rahasyavedaṃ kṛtavānsūryasya dvijasattamaḥ //

mūrtimāṃstaṃ dadarśātha svayamagrabhugavyayaḥ // 3-140-19aprītāstasyābhavandevāḥ karmaṇā'rvāvasornṛpa / taṃ te pravarayāmāsurnirāsuśca parāvasum //

tato devā varaṃ tasmai daduragnipurogamāḥ //

sa cāpi varayāmāsa piturutthānamātmanaḥ /
anāgastvaṃ tato bhrātuḥ pituścāsmaraṇaṃ vadhe //

bharadvājasya cotthānaṃ yavakrītasya cobhayoḥ /
pratiṣṭhāṃ cāpi vedasya saurasya dvijasattamaḥ //

evamastviti taṃ devāḥ procuścāpi varāndaduḥ /
tataḥ prādurbabhūvuste sarva eva yudhiṣṭhira //

athābravīdyavakrīto devānagnipurogamān /
samadhītaṃ mayā brahma vratāni caritāni ca //

kathaṃ ca raibhyaḥ śakto māmadīyānaṃ tapasvinam /
tathāyuktena vidhinā nihantumamarottamāḥ //
devā ūcuḥ /

maivaṃ kṛthā yavakrīta yathā vadasi vai mune /
ṛte gurumadhītā hi svayaṃ vedāstvayā purā //

anana tu gurūnaduḥkhāttoṣayitvā'tmakramaṇā /
kālena mahatā kleśādbrahmādhigatamuttamam //
lomaśa uvāca /

yavakrītamathoktvaivaṃ devāḥ sāgnipurogamāḥ /
sañjīvayitvā tānsarvānpunarjagmustriviṣṭapam //

tato vai sa yavakrīto brahmacaryaṃ cacāra ha /
aṣṭādaśa ca varṣāṇi triṃśataṃ ca yudhiṣṭhira //

āsramastasya puṇyo'yaṃ sadāpuṣpaphaladrumaḥ / atroṣya rājaśārdūla sarvapāpaiḥ prabhokṣyase //