Mahabharata · Chapter 3.141

uśīrabījaṃ mainākaṃ giriṃ śvetaṃ ca bhārata /
samatīto'si kaunteya kālaśailaṃ ca pārthiva //

eṣā gaṅgā saptavidhā rājate bharatarṣabha /
sthānaṃ virajasaṃ puṇyaṃ yatrāgnirnityamidhyate //

etadvai mānuṣeṇādya na śakyaṃ draṣṭumadbhutam /
samādhiṃ kurutāvyagrāstīrthānyetāni drakṣyatha //

etaddrakṣyasi devānāmākrīḍaṃ ca raṇāṅkitam /
atikrāntosi kaunteya kālaśailaṃ ca parvatam //

śvetaṃ giriṃ pravekṣyāmo mandaraṃ caiva parvatam /
yatra māṇivaro yakṣaḥ kuberaścaiva yakṣarāṭ //

aṣṭāśītisahasrāṇi gandharvāḥ śīghragāminaḥ /
tathā kimpuruṣā rājanyakṣāścaiva caturguṇāḥ //

anekarūpasaṃsthānā nānāpraharaṇāśca te /
yakṣendraṃ manujaśreṣṭha māṇibhadramupāsate //

teṣāmṛddhiratīvātra gatau vāyusamāśca te /
yakṣendraṃ manujaśreṣṭha māṇibhadramupāsate //

taistāta balibhirguptā yātudhānaiśca rakṣitāḥ /
durgamāḥ parvatāḥ pārtha samādhiṃ paramaṃ kuru //

kuberasacivāścānye raudrā maitrāśca rākṣasāḥ /
taiḥ sameṣyāma kaunteya yatto vikramaṇe bhava //

kailāsaḥ parvato rājanpaḍyojanaśatocchritaḥ /
yatradevāḥ samāyānti viśālā yatra bhārata //

asaṅkhyeyāstu kaunteya yakṣarākṣasakinnarāḥ /
nāgāḥ suparṇā gandharvāḥ kuberasadanaṃ prati //

tānvigāhasva pārthādya tapasā ca damena ca /
rakṣyamāṇo mayā rājanbhīmasenabalena ca //

svasti te varuṇo rājā yamaśca samitiñjayaḥ /
gaṅgā ca yamunā caiva parvatāśca diśantu te //

marutaśca sahāśvibhyāṃ saritaśca sarāṃsi ca /
svasti devāsurebhyaśca vasubhyaś mahādyute //

indrasya jāmbūnadaparvatādvai śṛṇomi ghoṣaṃ tava devi gaṅge /
gopāyayemaṃ subhage giribhyaḥ sarvājamīḍhāpacitaṃ narendram //

dadasva śarma pravivikṣato'sya śailānimāñchailasute nṛpasya /
śivapradā sarvasaritpradhāne sa bhrātṛkasyeha yudhiṣṭhirasya /
yudhiṣṭhira uvāca /

apūrvo'yaṃ sambhramo lomaśasya kṛṣṇāṃ ca sarve rakṣata mā pramādaḥ /
deśo hyayaṃ durgatamo mato'sya tasmātparaṃ śaucamihācaradhvam //
vaiśampāyana uvāca /

tato'bravīdbhīmamudāravīryaṃ kṛṣṇāṃ yattaḥ pālaya bhīmasena /
śūnye'rjune'sannihite ca tāta tvāmeva kṛṣṇā bhajate bhayeṣu //

tato mahātmāṃ sa yamau sametya mūrdhanyupāghrāya vimṛjyagātre /
uvāca tau bāṣpakalaṃ sa rājā mā baiṣṭamāgacchatamapramattau //