Mahabharata · Chapter 3.139

bharadvājastu kaunteya kṛtvā svādhyāyamāhnikam /
samitkalāpamādāya praviveśa svamāśramam //

taṃ sma dṛṣṭvā purā sarve pratyuttiṣṭhinti pāvakāḥ /
na tvenamupatiṣṭhanti hataputraṃ tadā'gnayaḥ //

vaikṛtantvagnihotre sa lakṣayitvā mahātapāḥ /
tamandhaṃ śūdramāsīnaṃ gṛhapālamathābravīt //

kinnu me nāgnayaḥ śūdra pratinandanti darśanam /
tvaṃ cāpi na yathāpūrvaṃ kaccitkṣemamihāśrame //

kaccinna raibhyaṃ putro me gatavānalpacetanaḥ /
etadācakṣva me śīghraṃ na hi śuddhyati me manaḥ //
śūdra uvāca /

raibhyaṃ yāto nūnamayaṃ putraste mandacetanaḥ /
tathāhi nihataḥ śete rākṣasena mahātmanā //

prakālyamānastenāyaṃ śūlahastena rakṣasā /
agnyagāraṃ pratidvāri mayā dorbhyāṃ nivāritaḥ //

tataḥ sa vihatāśo'trajalakāmośucirdhruvam /
nihataḥ so'tivegena śūlahastena rakṣasā //
lomaśa uvāca /

bharadvājastu tacchrutvā śūdrasya vipriyaṃ mahat /
gatāsuṃ putramādāya vilalāpa suduḥkhitaḥ //
bharadvāja uvāca /

rabrāhmaṇānāṃ kilārthāya nanu tvaṃ taptavāṃstapaḥ /
dvijānāmanadhītā vai vedāḥ sampratibhāntviti //

tathā kalyāṇaśīlastvaṃ brāhmaṇeṣumahātmasu /
anāgāḥ sarvabhūteṣu karkaśatvamupeyivān //

pratiṣiddho mayā tāta raibhyāvasathadarśanāt /
gatavāneva taṃ kṣudraṃ kālāntakayamopamam //

yaḥ sa jānanmahātejā vṛddhasyaikaṃ mamātmajam /
gatavāneva kopasya vaśaṃ paramadurmatiḥ //

putraśokamanuprāpta eṣa raibhyasya karmaṇā /
tyakṣyāmi tvāmṛteputra prāṇāniṣṭatamānbhuvi //

yathā'haṃ putraśokena dehaṃ tyakṣyāmi kilviṣī /
tathā jyeṣṭhaḥ suto raibhyaṃ hiṃsyācchīghramanāgasam //

sukhino vai narā yeṣāṃ jāyā putro na vidyate /
ye putraśokamaprāpya vicaranti yathāsukham //

ye tu putrakṛtācchokādbhṛśaṃ vyākulacetasaḥ /
śapantīṣṭānsakhīnārtāstebhyaḥ pāpataro nu kaḥ //

parāsuśca suto dṛṣṭaḥ śaptaścaiṣṭaḥ sakhā mayā /
īdṛśīmāpadaṃ kotra dvitīyo'nuviṣyati //
lomaśa uvāca /

vilapyaivaṃ bahuvidhaṃ bharadvājo'dahatsutam / susamiddhaṃ tataḥ paścātpraviveśa hutāśanam //