Mahabharata · Chapter 3.13

naitatkṛcchramanuprāpto bhavānsyādvasudhādhipa /
yadyahaṃ dvārakāyāṃ syāṃ rājansannihitaḥ purā //

āgaccheyamahaṃ dyūtamanāhūto'pi kauravaiḥ / āmbikeyena durdharṣa rājñā duryodhanena ca /
vārayeyamahaṃ dyūtaṃ bahūndopānpradarśayan //

bhīṣmadroṇau samānāyya kṛpaṃ bāhlīkameva ca /
vaicitravīryaṃ rājānamalaṃ dyūtena kaurava //

putrāṇāṃ tava rājendra tvannimittamiti prabho /
tatrācakṣamahaṃ doṣānyairbhavānvyatiropitaḥ //

vīrasenasuto yaistu rājyātprabhraṃśitaḥ purā /
atarkitavināśaśca devanena viśāmpate //

sātatyaṃ ca prasaṅgasya varṇayeyaṃ yathātatham //

striyo'kṣā mṛgayā pānametatkāmasamutthitam /
duḥkhaṃ catuṣṭaya proktaṃ yairnaro bhraśyate śriyaḥ //

tatrasarvatravaktavyaṃ manyante śāstrakovidāḥ /
viśeṣataśca vaktavyaṃ dyūte paśyanti tadvidaḥ //

ekāhāddravyanāśo'tra dhruvaṃ vyasanameva ca /
abhuktanāśaścārthānāṃ vākpāruṣyaṃ ca kevalam //

etaccānyacca kauravya prasaṅgikaṭukodayam /
dyūte brūyāṃ mahābāho samāsādyāmbikāsutam //

evamukto yadi mayā gṛhṇīyādvacanaṃ mama /
anāmayaṃ syāddharmaśca kurūṇāṃ kuruvardana //

na cetsa mama rājendra gṛhṇīyānmadhuraṃ vacaḥ /
pathyaṃ ca bharataśreṣṭha nigṛhṇīyāṃ balena tam //

athainamavinītena suhṛdo nāma durhṛdaḥ /
sabhāsado'nuvarteraṃstāṃśca inyāṃ durodarān //

asānnidhyaṃ tu kauravya mamānarteṣvabhūttadā /
yenedaṃ vyasanaṃ prājñā bhavanto dyūtakāritam //

sohametya kuruśreṣṭha dvārakāṃ pāṇḍunandana /
aśrauṣaṃ tvāṃ vyasaninaṃ yuyudhānādyathātatham //

śrutvaiva cāhaṃ rājendra paramodvigramānasaḥ /
tūrṇamabhyāgatosmitvāṃ draṣṭukāmo viśampate //

aho kṛcchramanuprāptāḥ sarve sma bharatarṣabha / so'haṃ tvāṃ vyasane magnaṃ paśyāmi saha sodaraiḥ //