Mahabharata · Chapter 3.134

yaḥ kathyate mantravidagryabuddhi- rauddālakiḥ śvetaketuḥ pṛthivyām /
tasyāśramaṃ paśyata pāṇḍaveyā sadāphalairupapannaṃ mahījaiḥ //

sākṣādatra śvetaketurdadarśa sarasvatīṃ mānuṣadeharūpām /
vetsyāmi vāṇīmiti sampravṛttāṃ sarasvatīṃ śvetaketurbabhāṣe //

asminyuge brahmakṛtāṃ variṣṭhā- vāstāṃ munī mātulabhāgineyau /
aṣṭāvakraścaiva kaholasūnu- rauddālakiḥ śvetaketuḥ pṛthivyām //

videharājas samīpatastau ghīrāvubhau mātulabhāgineyau /
praviśya yajñāyatanaṃ vivāde vandiṃ nijagrāhaturaprameyau //

upāssva kaunteya sahānujastvaṃ tasyāśramaṃ puṇyatamaṃ praviśya /
aṣṭāvakraṃ yasya dauhitramāhu- ryo'sau vandiṃ janakasyātha yajñe / vādi viprāgnyo bāla evābhigamya vāde bhaṅktvā majjayāmāsa nadyām //
yudhiṣṭhira uvāca /

kathamprabhāvaḥ sa babhūva vipra- stathābhūtaṃ yo nijagrāha vandim /
kiñcādhikṛtyātha tayorvivādo videharājas samīpa āsīt //

aṣṭāvakraḥ kena cāsau babhūva tatsarvaṃ me lomaśa śaṃsa tattvam //
lomaśa uvāca /

uddālakasya niyataḥ śiṣya eko nāmnā kahoḷeti babhūva rājan /
śuśrūṣurācāryavaśānuvartī dīrgha kālaṃ so'dhyayanaṃ cakāra //

taṃ vai viprāḥ paryabhavaṃstu śikhā- staṃ ca jñātvā viprakāraṃ guruḥ saḥ /
tasmai prādātsadya eva śrutaṃ ca bhāryāṃ ca vai duhitaraṃ svāṃ sujātām //

tasyāṃ garbhaḥ samabhavadagnikalpaḥ so'dhīyānaṃ pitaramathābhyuvāca /
sarvāṃ rātrimadhyayanaṃ karoṣi nedaṃ pitaḥ samyagivopavartate //

upālabdhaḥ śiṣyamadhye maharṣiḥ sa taṃ kopādudarasthaṃ śaśāpa /
yasmādvakraṃ vartamāno bravīṣi tasmādvakro bhavitāsyaṣṭadhaiva //

sa vai tathā vakra evābhyajāya- daṣṭāvakraḥ prathito mānaveṣu /
asyāsīdvai mātulaḥ śvetaketuḥ sa tena tulyo vayasā babhūva //

sampīḍyamānā tu tadā sujātā vivardhamānena sutena kukṣau /
uvāca bhartāramidaṃ rahogatā prasādya hīnā vasunā dhanārthinī //

kathaṃ kariṣyāmyadhunā maharṣe māsaścāyaṃ daśamo vartate me /
naivāsti me vasu kiñcitpradātā yennāhametāmāpadaṃ nistareyam //

uktastvevaṃ bhāryayā vai kahoḷo vittasyārthe janakamathābhyagacchat /
sa vai tadā vādavidā nigṛhya nimajjito vandinehāpsu vipraḥ //

uddālakastaṃ tu tadā niśamya sūtena vāde'psu nimajjitaṃ tathā /
uvāca tāṃ tatratataḥ sujāta- maṣṭavakre gūhitavyo'yamarthaḥ //

rarakṣa sā cāpi tamas mantraṃ jāto'pyasau naiva śuśrāva vipraḥ /
uddālakaṃ pitaraṃ so'bhimene tathā'ṣṭāvakro bhrātaraṃ śvetaketum //

tato varṣe dvādaśe śvetaketu- raṣṭāvakraṃ pituraṅke niṣaṇṇam /
apākarṣadgṛhyapāṇau rudantaṃ nāyaṃ tavāṅkaḥ piturityuktavāṃśca //

yattenokataṃ duruktaṃ tattadānīṃ hṛdi sthitaṃ tasya suduḥkhamāsīt /
gṛhaṃ gatvā mātaraṃ so'tha vigraḥ papracchedaṃ kva nu tāto mameti //

tataḥ sujātā paramārtarūpā śāpādbhītā tattvamasyācacakṣe /
tadvai tattvaṃsarvamājñāya rātrā- vityabravīcchvetaketuṃ sa vipraḥ //

gacchāva yajñaṃ janakasya rājño bahvāścaryaḥ śrūyate tasya yajñaḥ /
śroṣyāvo'tra brāhmaṇānāṃ vivāda- mannaṃ cāgryaṃ tatrabhokṣyāvahe ca //

vicakṣaṇatvaṃ ca bhaviṣyate nau śivaśca saumyaśca hi brahmaghoṣaḥ //

tau jagmaturmātulabhāgineyau yajñaṃ samṛddhaṃ jamakasya rājñaḥ /
aṣṭāvakraḥ pathi rājñā sametya protsāryamāṇo vākyamidaṃ jagāda //