Mahabharata · Chapter 3.128

kathaṃvīryaḥ sa rājā'bhūtsomako dadatāṃvaraḥ /
karmāṇyasya prabhāvaṃ ca śrotumicchāmi tattvataḥ //
lomaśa uvāca /

yudhiṣṭhirāsīnnṛpatiḥ somako nāma dhārmikaḥ /
tasya bhāryāśataṃ rājansadṛśīnāmabhūttadā //

sa vai yatnena mahatā tāsu putraṃ mahīpatiḥ /
kañcinnāsādayāmāsa kālena mahatā hyapi //

kadācittas vṛddhasya yatamānasya dhīmataḥ /
janturnāma sutastasya jyeṣṭhāyāṃ samajāyata //

taṃ jātaṃ mātaraḥ sarvāḥ parivārya samāsate /
satataṃ pṛṣṭhataḥ kṛtvā kāmabhogānviśāmpate //

tataḥ pipīlikā jantuṃ kadācidadaśatsphici /
sa daṣṭo hyarudadrājaṃstena duḥkhena bālakaḥ //

tatastā mātaraḥ sarvāḥ prākrośanbhṛśaduḥkhitāḥ /
pravārya janatuṃ sahasā sa śabdastumulo'bhavat //

tamārtanādaṃ sahasā śuśrāva sa mahīpatiḥ /
amātyaparṣado madhye upaviṣṭaḥ sahartvijā //

tataḥ prasthāpayāmāsa kimetaditi pārthivaḥ /
tasmai kṣattā yathāvṛttamācacakṣe sutaṃ prati //

tvaramāṇaḥ sa cotthāya somakaḥ saha mantribhiḥ /
praviśyāntaḥpuraṃ putramāśvāsayadarindamaḥ //

sāntvayitvā tu taṃ putraṃ niṣkramyāntaḥpurānnṛpaḥ /
ṛtvijā sahito rājansahāmātya upāviśat //
somaka uvāca /

dhigastvihaikaputratvamaputratvaṃ varaṃ bhavet /
nityāturatvādbhūtānāṃ śoka evaikaputratā //

idaṃ bhāryāśataṃ brahmanparīkṣyasadṛśaṃ prabho /
putrārthinā mayā voḍhaṃ na tāsāṃ vidyate prajā //

ekaḥ kathañcidutpannaḥ putro janturayaṃ mama /
yatamānāsu sarvāsu kinnu duḥkhamataḥ param //

vayaśca samatītaṃ me sabhāryasyaṃ dvijottama /
āsāṃ prāṇāḥ samāyattā mama cātraikaputrake //

syāttu karma tathā yuktaṃ yena putraśataṃ bhavet /
mahatā laghunā vā'pi karmaṇā duṣkareṇa vā //
ṛtviguvāca /

asti caitādṛśaṃ karma yena putraśataṃ bhavet /
yadi śaknoṣi tatkartumatha vakṣyāmi somaka //
somaka uvāca /

kāryaṃ vā yadi vā'kāryaṃ yena putraśataṃ bhavet /
kṛtameveti tadviddhi bhagavānprabravītu me //
ṛtviguvāca /

yajasva jantunā rājaṃstvaṃ mayā vitate kratau /
tataḥ putraśataṃ śrīmadbhaviṣyatyacireṇa te //

vapāryā hūyamānāyāṃ dhūmamāghrāya mātaraḥ /
tatastāḥ sumahāvīryāñjanayiṣyanti te sutān //

tasyāmeva tu te janturbhavitā punarātmajaḥ / uttare cāsya sauvarṇaṃ lakṣma pārśve bhaviṣyati //