Mahabharata · Chapter 3.129

brahmanyadyadyathā kāryaṃ tatkuruṣva tathātathā /
putrakāmatayā sarvankariṣyāmi vacastava //
lomaśa uvāca /

tataḥ sa yājayāmāsa somakaṃ tena jantunā /
mātarastu balātaputramapākārṣuḥ kṛpānvitāḥ //

hā hatāḥ smeti vāśantyastīvraśokasamāhatāḥ /
taṃ mātaraḥ ptyakarṣangṛhītvā dakṣiṇe kare //

savye pāṇau gṛhītvā tu yājakopi sma karṣati /
kurarīṇāmivārtānāmapākṛṣya tu taṃ sutam //

viśasya cainaṃ vidhivadvapāmasya juhāva saḥ /
vapāyāṃ hūyamānāyāṃ gandhamāghrāya mātaraḥ //

ārtā nipetuḥ sahasā pṛthivyāṃ kurunandana /
sarvāśca garbhānalabaṃstatastāḥ pārthivāṅganāḥ //

tato daśasu māseṣu somakasya viśāmpate /
jajñe putraśataṃ pūrṇaṃ tāsu sarvāsu bhārata //

janturjyeṣṭhaḥ samabhavajjanitryāmeva pūrvavat /
sa tāsāmiṣṭa evāsīnna tathā'nye nijāḥ sutāḥ //

tacca lakṣaṇamasyāsītsauvarṇaṃ pārśva uttare /
tasminputraśate cāgryaḥ sa babhūva guṇairapi //

tataḥ sa lokamagamatsomakasya guruḥ param /
anvakṣameva paścāttu somakopyagamatparam //

atha taṃ narake ghore pacyamānaṃ dadarśa saḥ /
tamapṛcchatkimarthaṃ tvaṃ narake pacyase dvija //

tamabravīdguruḥ so'tha pacyamāno'gninā bhṛśam /
tvaṃ mayā yājito rājaṃstasyedaṃ karmaṇaḥ phalam //

etacchrutvā sa rājarṣirdharmarājamathābravīt /
ahamatra pravekṣyāmi mucyatāṃ mama yājakaḥ //

matkṛte hi mahābhāgaḥ pacyate narakāgninā /
sohamātmānamādhāsye narake mucyatāṃ guruḥ //
dharma uvāca /

nānya kartuḥ phalaṃ rājannupabhuṅkte kadācana /
imāni tava dṛśyante phalāni vadatāṃvara //
somaka uvāca /

puṇyānna kāmaye lokānṛte'haṃ brahmavādinam /
icchāmyahamananaiva saha vastuṃ surālaye //

narake vā dharmarāja karmaṇā'sya samo hyaham /
puṇyāpuṇyaphalaṃ deva samamastvāvayoridam //
dharmarāja uvāca /

yadyevamīpsitaṃ rājanbhuṅkhāsya sahitaḥ phalam /
tulyakālaṃ sahānena paścātprāpsyasi sadgatim //
lomaśa uvāca /

sa cakāra tathā sarvaṃ rājā rājīvalocanaḥ /
kṣīṇapāpaśca tasmātsa vimukto guruṇā saha //

lebhe kāmāñśubhānrājankarmaṇā nirjitānsvayam /
saha tenaiva vipreṇa guruṇā sa gurupriyaḥ //

eṣa tasyāśramaḥ puṇyo ya eṣogre virājate /
kṣānta uṣyātra ṣaḍrātraṃ prāpnoti sugatiṃ naraḥ //

etasminnapi rājendra vatsyāmo vigatajvarāḥ / ṣaḍrātraṃ niyatātmānaḥ s̤ajjībhava kurūdvaha //