Mahabharata · Chapter 3.127

māndhātā rājaśārdūlastriṣu lokeṣu viśrutaḥ /
kathaṃ jāto mahābrahmanyauvanāśvo nṛpottamaḥ //

kathaṃ caināṃ parāṃ khyātiṃ prāptavānamitadyutiḥ /
yasya lokāstrayo vaśyā viṣṇoriva mahātmanaḥ //

etadicchāmyahaṃ śrotuṃ caritaṃ tasya dhīmataḥ /
satyakīrterhi māndhātuḥ kathyamānaṃ tvayā'nagha //

yathā māndhātṛśabdaśca tasya śakrasamadyute /
janma cāprativīryas kuśalo hyasi bhāṣitum //
lomaśa uvāca /

śṛṇuṣvāvahito rājanrājñastasya mahātmanaḥ /
yathā māndhātṛśabdo vai lokeṣu parigīyate //

ikṣvākuvaṃśaprabhavo yuvanāśvo mahīpatiḥ /
so'yajatpṛthivīpālaḥ kratubhirbhūridakṣiṇaiḥ //

aśvamedhasahasraṃ ca prāpya dharmabhṛtāṃvaraḥ /
anyaiśca kratubhirmukhyairayajatsvāptadakṣiṇaiḥ //

anapatyastu rājarṣiḥ sa mahātmā mahāvrataḥ / mantriṣvādhāya tadrājyaṃ vanityo babhūva ha /
śāstradṛṣṭena vidhinā saṃyojyātmānamātmavān //

sa kadācinnṛpo rājannupavāsena duḥkhitaḥ /
pipāsāśuṣkahṛdayaḥ praviveśāśramaṃ bhṛgoḥ //

tāmeva rātriṃ rājendra mahātmā bhṛgunandanaḥ /
iṣṭiṃ cakāra saudyumnermaharṣiḥ putrakāraṇāt //

sambhṛto mantrapūtena vāriṇā kalaśo mahān /
tatrātiṣṭhata rājendra pūrvameva samāhitaḥ //

yatprāśya prasavettasya patnī śakrasamaṃ sutam / tadvāri vihitaṃ rājanyasminnāsītsusaṃskṛtam /
taṃ nyasya vedyāṃ kalaśaṃ suṣupuste maharṣayaḥ //

rātrijāgaraṇācchrāntānsaudyumniḥ samatītya tān / śuṣkakaṇṭhaḥ pipāsārtaḥ pānīyārthī bhṛśaṃ nṛpaḥ /
taṃ praviśyāśramaṃ śāntaḥ pānīyaṃ so'bhyayācata //

tasya śrāntasya śuṣkeṇa kaṇṭhena krośatastadā /
nāśrauṣītkaścana tadā śakuneriva vāśataḥ //

tatastaṃ kalaśaṃ dṛṣṭvā jalapūrṇaṃ sa pārthivaḥ /
abhyadravata vegena pītvā cāmbho vyavāsṛjat //

sa pītvā śītalaṃ toyaṃ pipāsārto mahīpatiḥ /
nirvāṇamagamaddhīmānsusukhī cābhavattadā //

tataste pratyabudhyanta munayaḥ satapodhanāḥ /
nistoyaṃ taṃ ca kalaśaṃ dadṛśuḥ sarva eva te //

kasya karmedamiti te paryapṛcchansamāgatāḥ /
yuvanāśvo mametyevaṃ satyaṃ samabhipadyata //

na yuktamiti taṃ prāha bhagavānbhārgavastadā /
sutārthaṃ sthāpitā hyāpastapasā caiva sambhṛtāḥ //

mayā hyatrāhitaṃ brahma tapa āsthāya dāruṇam /
putrārthaṃ tava rājarṣe mahābalaparākrama //

mahābalo mahāvīryastapobalasamanvitaḥ /
yaḥ śakramapi vīryeṇa gamayedyamasādanam //

anena vidhinā rājanmayaitadupapāditam /
abbhakṣaṇaṃ tvayā rājanna yuktaṃ kṛtamadya vai //

na tvadya śakyamasmābhiretatkartumato'naythā /
nūnaṃ daivakṛtaṃ hyetadyadevaṃ kṛtavānasi //

pipāsitena yāḥ pītā vidhimantrapuraskṛtāḥ /
āpastvayā mahārāja mattapovīryasambhṛtāḥ //

tābhyastvamātmanā putramīdṛśaṃ janayiṣyasi /
vidhāsyāmo vayaṃ tatra taveṣṭiṃ paramādbhutām //

yathā śakrasamaṃ putraṃ janayiṣyasi vīryavān /
na ca prāṇairmahārāja viyogaste bhaviṣyati //

mā khidastvaṃ hi rājenadra daivaṃ hi balavattaram /
garbhadhāraṇajaṃ vā'pi na khedaṃ samavāpsyasi //

tato varṣaśate pūrṇe tasya rājño mahātmanaḥ /
vāmaṃ pārśvaṃ vinirbhidya sutaḥ sūrya iva sthitaḥ //

niścakrāma mahātejā na ca taṃ mṛtyurāviśat /
yuvanāśvaṃ narapatiṃ tadadbhutamivābhavat //

tataḥ śakro mahātejāstaṃ didṛkṣurupāgamat /
tato devā mahendraṃ tamapṛcchandhāsyatīti kim //

pradeśinīṃ tato'syāsye śakraḥ samabhisandadhe / māmayaṃ dhāsyatītyevaṃ bhāṣite caiva vajriṇā /
māndhāteti ca nāmāsya cakruḥ sendrā divaukasaḥ //

pradeśinīṃ śakradattāmākhādya sa śiśustadā /
avardhata mahātejāḥ kiṣkūnrājaṃstryodaśa //

vedāstaṃ sadhanurvedā divyānstrāṇi ceśvaram /
upatasthurmahārājaṃ dhyātamātrāṇi sarvaśaḥ //

dhanurājagavaṃ nāma śarāḥ śṛṅgodbhavāśca ye /
abhedyaṃ kavacaṃ caiva sadyastamupaśiśriyuḥ //

so'bhiṣikto bhagavatā svayaṃ śakreṇa bhārata /
dharmeṇa vyajayallokāṃstrīnviṣṇuriva vikramaiḥ //

tasyāpratihataṃ cakraṃ prāvartata mahātmanaḥ /
ratnāni caiva rājarṣiṃ svayamevopatasthire //

tasyeyaṃ vasusampūrṇā vasudhā vasudhādhipa /
teneṣṭaṃ vividhairyajñairbahubhiḥ svāptadakṣiṇaiḥ //

citacaityo mahātejā dharmānprāpya ca puṣkalān /
śakrasyārdhāsanaṃ rājam̐llabdhavānamitadyutiḥ //

ekāhnā pṛthivī tena dharmanityena dhīmatā /
vijitā śāsanādeva saratnākarapattanā //

tasya caityairmahārāja kratūnāṃ dakṣiṇāvatām /
caturantā mahī vyāptā nāsītkiñcidanāvṛtam //

tena padmasahasrāṇi gavāṃ daśa mahātmanā /
brāhmaṇebhyo mahārāja dattānīti pracakṣate //

tena dvādaśavārṣikyāmanāvṛṣṭyāṃ mahātmanā /
vṛṣṭaṃ sasyavivṛddhyarthaṃ miṣato vajrapāṇinaḥ //

tena somakulotpanno gāndhārādhipatirmahān /
śarjanniva mahāmeghaḥ pramathya nihataḥ śaraiḥ //

prajāścaturvidhāstena trātā rājankṛtātmanā /
tenātmatapasā lokāstāpitāścātitejasā //

tasyaitaddevayajanaṃ sthānamādityavarcasaḥ /
yasya puṇyatame deśe kurukṣetresya madhyataḥ //

tathā tvamapi rājendra māndhāteva mahīpatiḥ /
dharmaṃ kṛtvā mahīṃ rakṣa svargalokaṃ gamiṣyasi //

etatte sarvamākhyātaṃ māndhātuścaritaṃ mahat /
janma cāgryaṃ mahīpāla yanmāṃ tvaṃ paripṛcchasi //
vaiśampāyana uvāca /

evamuktaḥ sa kaunteyo lomaśena maharṣiṇā / papracchānantaraṃ bhūyaḥ somakaṃ prati bhārata //