Mahabharata · Chapter 3.123

bhṛgormaharṣeḥ putro'bhūccayavano nāma bhārata /
samīpe sarasastasya tapastepe mahādyutiḥ //

sthāṇubhūto mahātejā vīrasthānena pāṇḍava /
atiṣṭhata ciraṃ kālamekadeśe viśāmpate //

savalmīko'bhavadṛṣirlatābhiriva saṃvṛtaḥ /
kālena mahatā rājansamākīrṇaḥ pipīlikaiḥ //

tathā sa saṃvṛto dhīmānmṛtpiṇḍa iva sarvaśaḥ /
tapyate sma tapo ghoraṃ valmīkena samāvṛtaḥ //

atha dīrghasya kālasya śaryātirnāma pārthivaḥ /
ājagāma saro ramyaṃ vihartumidamuttamam //

tasya strīṇāṃ sahasrāṇi catvāryāsanparigrahaḥ /
ekaiva ca sutā subhrūḥ sukanyā nāma bhārata //

sā sakhībhiḥ parivṛtā divyābharaṇabhūṣitā /
caṅkramyamāṇā valmīkaṃ bhārgavasya samāsadat //

sā vai vasumatīṃ tatra paśyantī sumanoramām /
vanaspatīnpracinvantī vijahāra sakhīvṛtā //

rūpeṇa vayasā caiva bhadanena madena ca /
babhañja vanavṛkṣāṇāṃ śākhāḥ paramapuṣpitāḥ //

tāṃ sakhīrahitāmekāmekavastrāmalankṛtām /
dadarśa bhārgavo dhamāṃścarantīmiva vidyutam //

tāṃ paśyamāno vijane sa reme paramadyutiḥ / kṣāmakaṇṭhaśca viprarṣistapobalasamanvitaḥ /
tāmābabhāṣekalyāṇīṃ sā cāsya na śṛṇoti vai //

tataḥ sukanyā valmīke dṛṣṭvā bhārgavacakṣuṣī / kautūhalātkaṇṭakena buddhimohabalātkṛtā /
kinnu khalvidamityuktvā nirbibhedāsya locane //

akruddhyatsa tathā viddhe netre paramamanyumān /
tataḥ śaryātisainyasya śakṛnmūtre samāvṛṇot //

tato ruddhe śakṛnmūtre sainyamāsītsuduḥkhitam /
tathāgatamabhiprekṣya paryapṛcchatsa pārthivaḥ //

taponityasya vṛddhasya roṣaṇasya viśeṣataḥ / kenāpakṛtamadyeha bhārgavasya mahātmanaḥ /
jñātaṃ vā yadi vā'jñātaṃ taddrutaṃ brūta māciram //

tamūcuḥ sainikāḥ sarve na vidmo'pakṛtaṃ vayam /
sarvopāyairyathākāmaṃ bhavāṃstadadhigacchatu //

tataḥ sa pṛthivīpālaḥ sāmnā cogreṇa ca svayam /
paryapṛcchatsuhṛdvargaṃ paryajānanna caiva te //

ānāhārtaṃ tato dṛṣṭvā tatsainyamanukhārditam /
pitaraṃ duḥkhitaṃ dṛṣṭvā sukanyedamathābravīt //

mayā'ṭantyeha valmīke dṛṣṭaṃ satvamabhijvalat /
khadyotavadabhijñātaṃ tanmayā viddhamantikāt //

etacchrutvā tu valmīkaṃ śaryātistūrṇamabhyayāt /
tatrāpaśayttapovṛddhaṃ candrādityasamaprabham //

ayācadatha sainyārthaṃ prāñjaliḥ pṛthivīpatiḥ /
ajñānādbālayā yatte kṛtaṃ tatkṣantumarhasi //

tato'bravīnmahīpālaṃ cyavano bhārgavastadā /
apamānādahaṃ viddho hyanayā darpapūrṇayā //

rūpaudāryasamāyuktāṃ lobhamohabalātkṛtām / tāmeva pratigṛhyāhaṃ rājanduhitaraṃ tava /
kṣaṃsyāmīti mahīpāla satyametadbravīmi te //
lomaśa uvāca /

ṛṣervacanamājñāya śaryātiravicārayan /
dadau duhitaraṃ tasmai cyavanāya mahātmane //

pratigṛhya ca tāṃ kanyāṃ bhagavānprasasāda ha /
prāptaprasādau rājā vai sasainyaḥ puramāvrajat //

sukanyā'pi patiṃ labdhvā tapasvinamaninditā /
nityaṃ paryacaratprītyā tapasā niyamena ca //

agnīnāmatīthīnāṃ ca śuśrūṣunasūyikā / samārādhayata kṣipraṃ cyavanaṃ sā śubhānanā //