Mahabharata · Chapter 3.122

gayena yajamānena someneha purandaraḥ /
tarpita śrūyate rājansa tṛpto mudamabhyagāt //

iha devaiḥ sahendraiśca prajāpatibhireva ca /
iṣṭaṃ bahuvidhairyajñairmahadbhirbhūridakṣiṇaiḥ //

ādhūrtarajasaśceha rājā vajradharaṃ prabhuḥ /
tarpayāmāsa somena hayamedheṣu saptasu //

tasya saptasu yajñeṣu sarvamāsīddhiraṇyayam /
vānaprasthaṃ ca bhaumaṃ ca yaddravyaṃ niyataṃ makhe //

caṣālayūpacamasāḥ sthālyaḥ pātryaḥ srucaḥ sruvāḥ /
teṣveva cāsya yajñeṣu prayogāḥ sapta viśrutāḥ //

saptaikaikasyayūpasya caṣālāścopariśthitāḥ / tasya sma yūpānyajñeṣu bhrājamānānhiraṇmayān /
svayamutthāpayāmāsurdevāḥ sendrā yudhiṣṭhira //

teṣu tasya makhāgryeṣu gayasya pṛthivīpateḥ /
amādyadindraḥ somena dakṣiṇābhirdvijātayaḥ //

prasaṅkhyānānasaṅkhyeyānpratyagṛhṇandvijātayaḥ //

sikatā vā yathā loke yathāvā divi tārakāḥ /
yathā vā varṣato dhārā asaṅkhyeyāḥ sma kenacit //

tathaiva tadasaṅkhyeyaṃ dhanaṃ yatpradadau gayaḥ /
sadasyebhyo mahārāja teṣu yajñeṣu saptasu //

bhavetsaṅkhyeyametaddhi yadetatparikīrtitam /
na tasya śakyāḥ saṅkhyātuṃ dakṣiṇādakṣiṇāvataḥ //

hiraṇmayībhirgobhiśca kṛtābhirviśvakarmaṇā /
brāhmaṇāṃstarpayāmāsa nānādigbhyaḥ samāgatān //

alpāvaśeṣā pṛthivī caityairāsītsamācitā /
gayasya yajamānasya tatratatra viśāmpate //

sa lokānprāptavainaindrānkarmaṇā tena bharata /
salokatāṃ tasya gacchetpayoṣṇyāṃ ya upaspṛśet //

tarasmāttvamatra rājenadra bhrātṛbhiḥ sahitocyuta /
upaspṛśya mahīpāla dhūtapāpmā bhaviṣyasi //
vaiśampāyana uvāca /

sa payoṣṇyāṃ naraśreṣṭhaḥ snātvā vai bhrātṛbhiḥ saha /
vaidūryaparvataṃ caiva narmadāṃ ca mahānadīm //

uddiśya pāṇḍavaśreṣṭhaḥ sa pratasthe mahīpatiḥ /
samāgamata tejasvī bhrātṛbhiḥ sahito nagha //

tatrāsya sarvāṇyācakhyau lomaśo bhagavānṛṣiḥ /
tīrthāni ramaṇīyāni puṇyānyāyatanāni ca //

yathāyogaṃ yathāprīti prayayau bhrātṛbhiḥ saha /
tatratatrādadadvittaṃ brāhmaṇebhyaḥ sahasraśaḥ //
lomaśa uvāca /

devānāmeti kaunteya tathā rājñāṃ salokatām /
vedūryaparvataṃ dṛṣṭvā narmadāmavatīrya ca //

sandhireṣa naraśreṣṭha tretāyā dvāparasya ca /
enamāsādya kaunteya sarvapāpaiḥ pramucyate //

eṣa śaryātiyajñasya deśastāta prakāśate /
sākṣādyatrāpibatsomamaśvibhyāṃ saha vāsavaḥ //

cukopa bhārgavaścāpi mahendras mahātapāḥ /
saṃstambhayāmāsa ca taṃ vāsavaṃ cyavanaḥ prabhuḥ //

sukanyāṃ cāpi bhāryāṃ sa rājaputrīmavāptavān /
nāsatyau ca mahābhāga kṛtavānsomapīthivau //
yudhiṣṭhira uvāca /

kathaṃ viṣṭambhitastena bhagavānpākaśāsanaḥ /
kimarthaṃ bhārgavaścāpi kopaṃ cakre mahātapāḥ //

nāsatyau ca kathaṃ brahmankṛtavānsomapīthinau / etatsarvaṃ yathāvṛttamākhyātu bhagavānmama //