Mahabharata · Chapter 3.124

kasya cittvatha kālasya tridaśāvaśvinau nṛpa /
kṛtābhiṣekāṃ vivṛtāṃ sukanyāṃ tāmapaśyatām //

tāṃ dṛṣṭvā darśanīyāṅgīṃ devarājasutāmiva /
ūcatuḥ samabhidrutya nāsatyāvaśvināvidam //

kasya tvamasi vāmoru vane'sminkiṃ karoṣi ca /
icchāva bhadre jñātuṃ tvāṃ tatvamākhyāhi śobhane //

tataḥ sukanyā saṃvītā tāvuvāca surottamau /
śaryātitanayāṃ vittaṃ bhāryāṃ māṃ cyavanasya ca //

nāmnā cāhaṃ sukanyeti nṛloke'sminpratiṣṭhitā /
sā'haṃsarvātmanā nityaṃ bhartāramanuvartinī //

athāśvinau prahasyaitāmabrūtāṃ punareva tu /
kathaṃ tvamasi kalyāṇi pitrā dattā'gatā vane //

bhrājase'sminvane bhīru vidyutsaudāmanī yathā /
na deveṣvapi tulyāṃ hi tvayā paśyāva bhāmini //

anābharaṇasampannā paramāmbaravarjitā /
śobhayasyadhikaṃ bhadre vanamapyanalankṛtā //

sarvābharaṇasampananā paramāmvaradhāriṇī /
śobhethāstvanavadyāṅgi na tvevaṃ malapaṅkinī //

kasmādevaṃvidhā bhūtvā jarājarjaritaṃ patim /
tvamupāsse ha kalyāṇi kāmabhogabahiṣkṛtam //

asamarthaṃ paritrāṇe poṣaṇe tu śucismite /
sā tvaṃ cyavanamutsṛjyavarayasvaikamāvayoḥ //

patyarthaṃ devagarbhābhe mā vṛthā yauvanaṃ kṛthāḥ /
evamuktā sukanyā'pi surau tāvidamabravīt //

ratā'haṃ cyavane patyau maivaṃ māṃ paryaśaṅkatam /
tāvabrūtāṃ punastvenāmāvāṃ devabhiṣagvarau //

yuvānaṃ rūpasampannaṃ kariṣyāvaḥ patiṃ tava / tatastasyāvayoścaiva vṛṇīṣvānyatamaṃ patim /
etena samayenainamāmantraya patiṃ śubhe //

sā tayorvacanādrājannupasangamya bhārgavam /
uvāca vākyaṃ yattābhyāmuktaṃ bhṛgusutaṃ prati //

tacchrutvā cyavano bhāryāmuvāca kriyatāmiti /
sā bhartrā samanujñātā kriyatāmityathābravīt //

śrutvā tadaśvinau vākyaṃ tasyāstatkriyatāmiti /
ūcatū rājaputrīṃ tāṃ patistava viśatvapaḥ //

tato'mbhaścyavanaḥ śīghraṃ rūpārthī praviveśa ha /
aśvināvapi tadrājansaraḥ prāviśatāṃ tadā //

tato muhūrtāduttīrṇāḥ sarve te sarasastrayaḥ / divyarūpadharāḥ sarve yuvāno mṛṣṭakuṇḍalāḥ /
tulyaveṣadharāścaiva manasaḥ prītivardhanāḥ //

te'bruvansahitāḥ sarve vṛṇīṣvānyatamaṃ śubhe /
asmākamīpsitaṃ bhadre patitve varavarṇini //

tvamaśvinoranyataraṃ cyavanaṃ vā yaśasvini /
yatra vā'pyabhikāmā'si taṃ vṛṇīṣva suśobhane //

sā samīkṣya tu tānsarvāṃstulyarūpadharānsthitān /
niścitya manasā buddhyā devī vavre svakaṃ patim //

labdhvā tu cyavano bhāryāṃvayorūpaṃ ca vāñchitam /
hṛṣṭo'bravīnmahātejāstau nāsatyāvidaṃ vacaḥ //

yathā'haṃ rūpasampanno vayasā ca samanvitaḥ /
kṛto bhavadbhyāṃ vṛddhaḥ sanbhāryāṃ ca prāptavānimām //

tasmādyuvāṃ kariṣyāmi prītyā'haṃ somapīthinau /
miṣato devarājasya satyametadbravīmi vām //

tacchrutvā hṛṣṭamanasau divaṃ tau pratijagmatuḥ / cyavanaśca sukanyā ca surāviva vijahratuḥ //