Mahabharata · Chapter 3.118

mamāparādhāttaiḥ kṣudrairhatastvaṃ tāta bāliśaiḥ /
kārtavīryasya dāyādairvane mṛga iveṣubhiḥ //

dharmajñasya kathaṃ tāta vartamānasya satpathe /
mṛtyurevaṃvidho yuktaḥ sarvabhūteṣvanāgasaḥ //

kinnu tairna kṛtampāpaṃ yairbavāṃstapasi stitaḥ /
ayudhyamāno vṛddhaḥ sanhataḥ śaraśataiḥ śitaiḥ //

kinnu te tatra vakṣyanti saciveṣu suhṛtsu ca /
ayudhyamānaṃ dharmajñamekaṃ hatvā'napatrapāḥ //
akṛtavraṇa uvāca /

lālapyaivaṃ sakusnṇaṃ bahu nānāvidhaṃ nṛpa /
pretakāryāṇi sarvāṇi pituścakre mahātapāḥ //

dadāha pitaraṃ cāgnau rāmaḥ parapurañjayaḥ /
pratijajñe vadhaṃ cāpi sarvakṣatrasya bhārata //

sankruddho'tibalaḥ saṅkhye śastramādāya vīryavān /
jaghnivānkārtavīryasya sutāneko'ntakopamaḥ //

teṣāṃ cānugatā ye ca kṣatriyāḥ kṣatriyarṣabha /
tāṃśca sarvānavāmṛdgādrāmaḥ praharatāṃvaraḥ //

triḥsaptakṛtvaḥ pṛthivīṃ kṛtvā niḥkṣitriyāṃ prabhuḥ /
samantapañcake pañca cakāra rudhirahradān //

sa teṣu tarpayāmāsa pitṝnbhṛgukulodvahaḥ /
sākṣāddadarśa carcīkaṃ sa ca rāmaṃ nyavārayat //

tato yajñena mahatā jāmadagnyaḥ pratāpavān /
tarpayāmāsa devendramṛtvigbhyaḥ pradadau mahīm //

vedīṃ cāpyadadaddhaimīṃ kaśyapāya mahātmane /
daśavyāmāyatāṃ kṛtvā navotsedhāṃ viśāmpate //

tāṃ kaśyapasyānumate brāhmaṇāḥ khaṇḍaśastadā /
vyabhajaṃste tadā rājanprakhyātāḥ khāṇḍavāyanāḥ //

sa pradāya mahīṃ tasmai kaśyapāya mahātmane / tapaḥ sumahadāsthāya mahābalaparākramaḥ /
asminmahendre śailendre vasatyamitavikramaḥ //

evaṃ vairamabhūttasya kṣatriyairlokavāsibhiḥ /
pṛthivī cāpi vijitā rāmeṇāmitatejasā //
vaiśampāyana uvāca /

tataścaturdaśīṃ rāmaḥ samayena mahāmanāḥ /
darśayāmāsa tānviprāndharmarājaṃ ja sānujam //

sa tamānarca rājendra bhrātṛbhiḥ sahitaḥ prabhuḥ /
dvijānāṃ ca parāṃ pūjāṃ cakre nṛpatisattamaḥ //

arjitvā jāmadagnyaṃ sa pūjitastena coditaḥ / mahendra uṣya tāṃ rātriṃ prayayau dakṣiṇāmukhaḥ //