Mahabharata · Chapter 3.117

sa vedādhyayane yukto jamadagnirmahātapāḥ /
tapastepe tato devānniyamādvaśamānayat //

sa prasenajitaṃ rājannadhigamya narādhipam /
reṇukāṃ varayāmāsa sa ca tasmai dadau nṛpaḥ //

reṇukāṃ tvatha samprāpya bhāryāṃ bhārgavanandanaḥ /
āśramasthastayā sārdhaṃ tapastepe'nukūlayā //

tasyāḥ kumārāścatvāro jajñire rāmapañcamāḥ /
sarveṣāmajaghanyastu rāma āsīñjaghanyajaḥ //

phalāhāreṣu sarveṣu gateṣvatha suteṣu vai /
reṇukā snātumagamatkadācinniyatavratā //

sā tu citrarathaṃ nāma mārtikāvatakaṃ nṛpam /
dadarśa reṇukā rājannāgacchantī yadṛcchayā //

krīḍantaṃ salile dṛṣṭvā sabhāryaṃ padmamālinam /
ṛddhimantaṃ tatastasya spṛhayāmāsa reṇukā //

vyabhicārācca tasmātsā klinnāmbhasi vicetanā /
antarikṣānnipatitā narmadāyāṃ mahāhrade //

utīrya cāpi sā yatnājjagāma bharatarṣabha /
praviveśāśramaṃ trastā tāṃ vai bhartānvabudhyata //

sa tāṃ dṛṣṭvācyutāndhairyādbrāhmyā lakṣmyā vivarjitām /
śrik्śabdena mahātejā garhayāmāsa vīryavān //

tato jyeṣṭho jāmadagnyo rumaṇvānnāma nāmataḥ /
ājagāma suṣeṇaśca vasurviśvāvasustathā //

tānānupūrvyādbhagavānvadhe māturacodayat /
na ca te jātasammohāḥ kiñcidūcurvicetasaḥ //

tataḥ śaśāpa tānkrodhātte śaptāścaitanāṃ jahuḥ /
mṛgapakṣisadharmāṇaḥ kṣipramāsañjaḍopamāḥ //

tato rāmo'bhyayātpaścādāśramaṃ paravīrahā /
tamuvāca mahāmanyurjamadagnirmahātapāḥ //

jahīmāṃ mātaraṃ pāpāṃ mā ca putra vyathāṃ kṛthāḥ /
tata ādāya paraśuṃ rāmo mātu śiro'harat //

tatastasya mahārāja jamadagnermahātmanaḥ /
kopo'bhyagacchatsahasā prasannaścābravīdidam //

mamedaṃ vacanāttāta kṛtaṃ te karma duṣkaram /
vṛṇīṣva kāmāndharmajña yāvato vāñchase hṛdā //

sa vavre māturutthānamasmṛtiṃ ca vadhasya vai /
pāpena tena cāsparśaṃ bhrātṝṇāṃ prakṛtiṃ tathā //

apratidvandvatāṃ yuddhe dīrghamāyuśca bhārata /
dadau ca sarvānkāmāṃstāñjamadagnirmahātapāḥ //

kadācittu tathaivāsya viniṣkrāntāḥ sutāḥ prabho /
athānūpapatirvīraḥ kārtavīryo'bhyavartata //

tamāśramapadaṃ prāptamṛṣirardhyātsamārcayat /
sa yuddhamadasammatto nābhyanandattathā'rcanam //

pramathya cāśramāttasmāddhomadhenostatobalāt /
jahāra vatsaṃ krośantyā babhañja ca mahādrumān //

āgatāya ca rāmāya tadācaṣṭa pitā svayam / gāṃ ca rorudatīṃ dṛṣṭvā kopo rāmaṃ samāviśat /
sa manyuvaśamāpannaḥ kārtavīryamupādravat //

tasyātha yudhi vikramya bhārgavaḥ paravīrahā /
ciccheda niśitairbhallairbāhūnparighasannibhān //

sahasrasammitānrājanpragṛhya ruciraṃ dhanuḥ /
abhibhūtaḥ sa rāmeṇa saṃyuktaḥ kāladharmaṇā //

arjunasyātha dāyādā rāmeṇa kṛtamanyavaḥ /
āśramasthaṃ vinā rāmaṃ jamadagnimupādravan //

te taṃ jaghnurmahāvīryamayudhyantaṃ tapasvinam /
asakṛdrāmarāmeti vikrośantamanāthavat //

kārtavīryasya putrāstu jamadagniṃ yudhiṣṭhira /
ghātayitvā śarairjagmuryathāgatamarindamāḥ //

apakrānteṣu vai teṣu jamadagnau tathā gate /
samitpāṇirupāgacchadāśramaṃ bhṛgunandanaḥ //

sa dṛṣṭvā pitaraṃ vīrastadā mṛtyuvaśaṃ gatam / anarhaṃ taṃ tathābhūtaṃ vilalāpa suduḥkhitaḥ //