Mahabharata · Chapter 3.116

sa tatra tāmuṣitvaikāṃ rajanīṃ pṛthivīpatiḥ /
tāpasānāṃ paraṃ cakre satkāraṃ bhrātṛbhiḥ saha //

lomaśastasya tānsarvānācakhyau tatra tāpasān /
bhṛgūnaṅgirasaścaiva vasiṣṭhānatha kāśyapān //

tānsametya sā rājarṣirabhivādya kṛtāñjaliḥ /
rāmasyānucaraṃ vīramapṛcchadakṛtavraṇam //

kadā nu rāmo bhagavāṃstāpaso darśayiṣyati /
tamahaṃ tapasā yuktaṃ draṣṭumicchāmi bhārgavam //
akṛtavraṇa uvāca /

āyānevāsi vidito rāmasya viditātmanaḥ /
prītistvayi ca rāmasya kṣipraṃ tvāṃ darśayiṣyati //

caturdaśīmaṣṭamīṃ ca rāmaṃ paśyanti tāpasāḥ /
asyāṃ rātryāṃ vyatītāyāṃ bhavitrī śvaścaturdaśī //

tato drakṣyasi rāmaṃ tvaṃ kṛṣṇājinajaṭādharam /
yudhiṣṭhira uvāca /
bhavānanugato rāmaṃ jāmadagnyaṃ mahābalam /
pratyakṣadarśī sarvasya pūrvavṛttasya karmaṇaḥ //

sa bhavānkathayatvadya yathā rāmeṇa nirjitāḥ /
āhave kṣatriyāḥ sarve kathaṃ kena ca hetunā //
akṛtavraṇa uvāca /

[hanta te kathayiṣyāmi mahadākhyānamuttamam /
bhṛgūṇāṃ rājaśārdūla vaṃśe jātasya bhārata //

rāmasya jāmadagnyasya caritaṃ devasammitam /
haihayādhipateścaiva kārtavīryas bhārata //

rāmeṇa cārjuno nāma haihayādhipatirhatiḥ /
tasya bāhuśatānyāsaṃstrīṇi sapta ca pāṇḍava //

dattātreyaprasādena vimānaṃ kāñcanaṃ tathā /
aiśvaryaṃ sarvabhūteṣu pṛthivyāṃ pṛthivīpate //

avghāhatagatiścaiva rathastasya mahātmanaḥ /
rathena tena tu sadāvaradānena vīryavān //

mamarda devānyakṣāṃśca ṛṣīṃścaiva samantataḥ /
bhūtāṃścaiva sa sarvāṃstu pīḍayāmāsa sarvataḥ //

tato devāḥ sametyāhurṛṣayaśca mahāvratāḥ / devadevaṃ surārighnaṃ viṣṇuṃ satyaparākramam /
bhagavanbhūtarārthamarjunaṃ jahi vai prabho //

vimānena ca divyena haihayādhipatiḥ prabhuḥ /
śacīsahāyaṃ krīḍantaṃ dharṣayāmāsa vāsavam //

tatastu bhagavāndevaḥ śakreṇa sahitastadā /
kārtavīryavināśārthaṃ mantrayāmāsa bhārata //

yattadbhūtahitaṃ kāryaṃ surendreṇa niveditam / sampratiśrutya tatsarvaṃ bhagavām̐llokapūjitaḥ /
jagāma badarīṃ ramyāṃ svamevāśramamaṇḍalam //

etasminneva kāle tu pṛthivyāṃ pṛthivīpatiḥ.] kānyakubje mahānāsītpārthivaḥ sumahābalaḥ /
gādhīti viśruto loke vanavāsaṃ jagāma ha //

vane tu tasya vasataḥ kanyā jajñe'psaraḥsamā /
ṛcīko bhārgavastāṃ ca varayāmāsa bhārata //

tamuvāca tato gādhirbrāhmaṇaṃ saṃśitavratam /
ucitaṃ naḥ kule kiñcitpūrvairyatsampravartitam //

ekataḥ śyāmakarṇānāṃ pāṇḍurāṇāṃ tarasvinām /
sahasraṃ vājināṃ śuklamiti viddhi dvijottama //

na cāpi bhagavānvācyodīyatāmiti bhārgava /
deyā me duhitā caiva tvadvidhāya mahātmane //
ṛcīka uvāca /

ekataḥ śyāmakarṇānāṃ pāṇḍurāṇāṃ tarasvinām /
dāsyāmyaśvasahasraṃ te mama bhāryā sutā'stu te //
gādhiruvāca /

dadāsyaśvasahasraṃ me tava bhāryā sutā'stu me //
akṛtavraṇa uvāca /

sa tatheti pratijñāya rājanvaruṇamabravīt / ekataḥ śyāmakarṇānāṃ pāṇḍurāṇāṃ tarasvinām /
sahasraṃ vājināmekaṃ śulkārthaṃ pratidīyatām //

tasmai prādātsahasraṃ vai vājināṃ varuṇastadā /
tadaśvatīrthaṃ vikhyātamutthitā yatra te hayāḥ //

gaṅgāyāṃ kānyakubje vai dadau satyavatīṃ tadā /
tato gādhiḥ sutāṃ cāsmai janyāścāsansurāstadā //

labdhaṃ hayasahasraṃ tu tāṃ ca dṛṣṭvā divaukasaḥ /
vismayaṃ paramaṃ jagmustameva divi saṃstuvan //

dharmeṇa labdhvā tāṃ bhāryāmṛcīko dvijasattamaḥ /
yathākāmaṃ yathājoṣaṃ tayā reme sumadhyayā //

taṃ vivāhe kṛterājansabhāryamavalokakaḥ /
ājagāma bhṛguśreṣṭhaḥ putraṃ dṛṣṭvā nananda ca //

bhāryāpatī tamāsīnaṃ bhṛguṃ suragaṇārcitam /
arcitvā paryupāsīnau prāñjalī tasthatustadā //

tataḥ snuṣāṃ sa bhagavānprahṛṣṭo bhṛgurabravīt /
varaṃ vṛṇīṣva subhage dātā hyasmi tavepsitam //

sā vai prasādayābhāsa taṃ guruṃ putrakāraṇāt /
ātmanaścaiva mātuśca prasādaṃ ca cakāra saḥ //
bhṛguruvāca /

ṛtau tvaṃ caiva mātā ca snāte puṃsavanāya vai /
āliṅgetāṃ pṛthagvṛkṣau sā'svatthaṃ tvamudumbaram //

carudvayamidaṃ bhadre jananyāśca tavaiva ca /
viśvamāvartayitvā tu mayā yatnena sādhitam //

prāśitavyaṃ prayatnena tetyuktvā'darśanaṃ gataḥ /
āliṅgane carau caiva cakratuste viparyayam //

tataḥ puna sa bhagavānkāle bahutithe gate /
divyajñānādviditvā tu bhagavānāgataḥ punaḥ //

athovāca mahātejā bhṛguḥ satyavatīṃ śnuṣām //

upayuktaścarurbhadre vṛkṣe cāliṅganaṃ kṛtam /
viparītena te subhrūrmātrā caivāsi vañcitā //

kṣatriyo brāhmaṇācāro mātustava suto mahān /
bhaviṣyati mahāvīryaḥ sādhūnāṃ mārgamāsthitaḥ //

tataḥ prasādayāmāsa śvaśuraṃ sā punaḥpunaḥ /
na me putro bhavedīdṛkkāmaṃ pautro bhavediti //

evamastviti sā tena pāṇḍava pratinanditā /
krālaṃ pratīkṣatī garbhaṃ dhārayāmāsa yatnataḥ //

jamadagniṃ tataḥ putraṃ jajñe sā kāla āgate /
tejasā varcasā caiva yuktaṃ bhārgavanandanam //

sa vardhamānastejasvī vedasyādhyayanena ca /
bahūnṛṣīnmahātejāḥ pāṇḍaveyātyavartata //

taṃ tu kṛtsno dhanurvedaḥ pratyabhādbharatarṣabha / caturvidhāni cāstrāṇi bhāskaropamavarcasam //