Mahabharata · Chapter 3.108

sa tu rājā maheṣvāsaścakravartī mahārathaḥ /
babhūva sarvalokas manonayananandanaḥ //

sa śuśrāva mahābāhuḥ kapilena mahātmanā /
pitṝṇaāṃ nidhanaṃ ghoramaprāptiṃ tridivasya ca //

sa rājyaṃ sacive nyasya hṛdayena vidūyatā /
jagāma himavatpārśvaṃ tapastaptuṃ nareśvaraḥ //

ārirādhayiṣurgaṅgāṃ tapasā dagdhakilviṣaḥ /
so'paśyata narreṣṭha himavantaṃ nagottamam //

śṛṅgairbahuvidhākārairdhātumadbhiralankṛtam /
pavanālambibhirmeghaiḥ paripiktaṃ samantataḥ //

nadīkuñjanitambaiśca sodakairupaśobhitam /
guhākandarasaṃlīnasiṃhavyāghraniṣevitam //

śakunaiśca vicitrāṅgaiḥ kūjadbhirvividhā giraḥ /
bhṛṅgarājaistathā haṃsairdātyūhairjalakukkuṭaiḥ //

mayūraiḥ śatapatraiśca jīvañjīvakakokilaiḥ /
cakorairasitāpāṅgaistathā putrapriyairapi //

jalasthāneṣu ramyeṣu padminībhiśca sankulam /
sārasānāṃ ca madhurairvyāhṛtaiḥ samalankṛtam //

kinnarairapsarobhiśca niṣevitaśilātalam /
digvāraṇaviṣāṇāgraiḥ samantāddhṛṣṭapādapam //

vidyādharānucaritaṃ nānāratnasamākulam /
viṣolvaṇairbhujaṅgaiśca dīptājihvairniṣevitam //

kvacitkanakasankāśaṃ kvacidrajatasannibham /
kvacidañjanapuñjābhaṃ himavanatamupāgamat //

sa tu tatranaraśreṣṭhastapo ghoraṃ samāśritaḥ /
phalamūlāmbusambhakṣaḥ sahasraparivatsarān //

saṃvatsarasahasre tu gate divye mahānadī /
darśayāmāsa taṃ gaṅgā tadā mūrtimatī svayam //
gaṅgovāca /

kimicchasi mahārāja mtaḥ kiñca dadāni te /
tadbravīhi naraśreṣṭha kariṣyāmi vacastava //

evamuktaḥ pratyuvāca rājā haimavatīṃ nadīm / tadā bhagīratho rājanpraṇipatya kṛtāñjaliḥ /
pitāmahā me varade kapilena mahānadi //

anveṣamāṇāsturagaṃ nītā vaivasvatakṣayam /
ṣaṣṭistāni sahasrāṇi sāgarāṇāṃ mahātmanām //

kapilaṃ devamāsādya kṣaṇena nidhanaṃ gatāḥ /
teṣāmevaṃ vinaṣṭānāṃ svarge vāso na vidyate //

yāvattāni śarīrāṇi tvaṃ jalairnābhiṣiñcasi /
tāvatteṣāṃ gatirnāsti sāgarāṇāṃ mahānadi //

svargaṃ naya mahābhāge matpitṝnsagarātmajān /
teṣāmarthe'bhiyācāmi tvāmahaṃ vai mahānadi //
lomaśa uvāca /

etacchrutvā vaco rājño gaṅgā lokanamaskṛtā /
bhagīrathamidaṃ vākyaṃ suprītā samabhāṣata //

kariṣyāmi māhārāja vacaste nātra saṃśayaḥ /
vegaṃ tu mama durdhāryaṃ patantyā gaganāccyutam //

na śaktastriṣu lokeṣu kaściddhārayituṃ nṛpa /
anyatra vibudhaśreṣṭhānnīlakaṇṭhānmaheśvarāt //

taṃ toṣaya ramahābāho tapasā varadaṃ haram /
sa tu māṃ pracyutāṃ devaḥ śirasā dhārayiṣyati //

sa kariṣyati te rakāmaṃ pitṝṇāṃ hitakāmyayā /
tapasā'rādhitaḥ śambhurbhagarvām̐llokabhāvanaḥ //

etacchrutvā tato rājanmahārājo bhagīrathaḥ /
kailāsaṃ parvataṃ gatvā toṣayāmāsa śankaram //

tatastena samāgamya kālayogena kenacit /
gahgāvataraṇaṃ rājannayācata mahīpatiḥ //

agṛhṇācca varaṃ tasmādgaṅgāyā dhāraṇe nṛpa / svarge vāsaṃ samuddiś pitṝṇāṃ sa narottamaḥ //