Mahabharata · Chapter 2.73

anusaṃsārya nṛpatīnpāṇḍavāḥ pāṇḍavāgrajam /
abhijagmurmaheṣvāsā dharmarājaṃ yudhiṣṭhiram //

so'numene mahābāhurbhātṝṃśca suhṛdastathā /
śiṣyaiḥ parivṛto vyāsaḥ purastātsamapadyata //

so'bhyayādāsanāttūrṇaṃ bhrātṛbhiḥ parivāritaḥ /
pādyenāsanadānena pitāmahamapūjayat //

athopaviśya bhagavānkāñcane paramāsane /
āsyatāmiti covāca dharmarājaṃ yudhiṣṭhiram //

athopaviṣṭaṃ rājānaṃ bhrātṛbhiḥ parivāritam /
uvāca bhagavānvyāsastattadvākyaviśāradaḥ //

diṣṭyā vardhasi kaunteya sāmrājyaṃ prāpya durlabham /
vardhitāḥ kuravaḥ sarve tvayā kurukulodvaha //

āpṛcche tvāṃ gamiṣyāmi pūjito'smi viśāmpate /
evamuktaḥ sa kṛṣṇena dharmarājo yudhiṣṭhiraḥ //

abhivādyopasaṅgṛhya pitāmahamathābravīt //
yudhiṣṭhira uvāca /

saṃśayo dvipadāṃ śreṣṭha mamotpannaḥ sudurlabhaḥ /
tasya nānyo'sti vaktā vai tvāmṛte dvijapuṅgava //

utpātāṃstrividhānprāha nārado bhagavānṛṣiḥ /
divyāṃścaivāntarikṣāṃśca pārthivāṃśca pitāmaha //

sumahacca phalaṃ teṣāṃ bhaviteti na saṃśayaḥ /
api caidyasya patanācchāntamautpātikaṃ mahat //
vaiśampāyana uvāca //

rājñastu vacanaṃ śrutvā parāśarasutaḥ prabhuḥ /
kṛṣṇadvaipāyano vyāsa idaṃ vacanamabravīt //

trayodaśa samā rājannutpātānāṃ phalaṃ mahat /
sarvakṣatravināśāya bhaviṣyati viśāmpate //

tvāmekaṃ kāraṇaṃ kṛtvā kālena bharatarṣabha / sametaṃ pārthivaṃ kṣatraṃ kṣayaṃ yāsyati bhārata /
duryodhanāparādhena bhīmārjunabalena ca //

svapnaṃ drakṣyasi rājendra tasminkāla upasthite /
tatte'haṃ sampravakṣyāmi tannibodha yudhiṣṭhira //

yāntaṃ drakṣyasi rājendra kṣapānte tvaṃ vṛṣadhvajam /
nīlakaṇṭhaṃ bhavaṃ sthāṇuṃ kapāliṃ tripurāntakam //

ugraṃ rudraṃ paśupatiṃ mahādevamumāpatim /
haraṃ śarvaṃ vṛṣaṃ śūlaṃ pinākiṃ kṛttivāsasam //

kailāsakūḍapratime vṛṣabhe'vasthitaṃ śivam /
nirīkṣamāṇaṃ satataṃ pitṛrājāśritāṃ diśam //

evamīdṛśakaṃ svapnaṃ drakṣyasi tvaṃ viśāmpate /
mā tatkṛte hyanudhyāhi kālo hi duratikramaḥ //

svasti te'stu gamiṣyāmi kailāsaṃ parvataṃ prati /
apramattaḥ sthito dāntaḥ pṛthivīṃ paripālaya //
vaiśampāyana uvāca //

evamuktvā sa bhagavānkailāsaṃ parvataṃ yayau /
kṛṣṇadvaipāyano vyāsaḥ saha śiṣyaiḥ sahānugaiḥ //

gate pitāmahe rājā cintāśokasamanvitaḥ /
niḥ śvasannuṣṇamasakṛttamevārthaṃ vicintayan //

kathaṃ tu daivaṃ śakyeta pauruṣeṇa prabādhitum /
avaśyameva bhavitā yaduktaṃ paramarṣiṇā //

tato'bravīnmahātejāḥ sarvānbhrātṝnyudhiṣṭhiraḥ /
śrutaṃ vai puruṣavyāghrā yanmāṃ dvaipāyano'bravīt //

tadā tadvacanaṃ śrutvā maraṇe niścitā matiḥ /
sarvakṣatrasya nidhane yadyahaṃ heturīpsitaḥ //

kālena nirmitastāta ko mamārtho'sti jīvataḥ /
evaṃ bruvantaṃ rājānaṃ phālgunaḥ pratyabhāṣata //

mā rājankaśmalaṃ ghoraṃ praviśo buddhināśanam /
sampradhārya mahārāja yatkṣamaṃ tatsamācara //
vaiśampāyana uvāca //

tato'bravītsatyadhṛtirbhrātṝnsarvānyudhiṣṭhiraḥ /
dvaipāyanasya vacanaṃ tatraiva samacintayat //

adyaprabhṛti bhadraṃ vaḥ pratijñāṃ me nibodhata /
trayodaśa samāstāta ko mamārtho 'sti jīvataḥ //

na pravakṣyāmi paruṣaṃ bhrātṝnanyāṃśca pārthivān /
sthito nideśe jñātīnāṃ yokṣye tatsumudāharan //

evaṃ me vartamānasya svasute'ṣvitareṣu ca /
bhedo na bhavitā loke bhedamūlo hi vigrahaḥ //

vigrahaṃ dūrato rakṣanpriyāṇyeva samācaran /
vācyatāṃ na gamiṣyāmi lokeṣu manujarṣabhāḥ //

bhrātṛrjyeṣṭhasya vacanaṃ pāṇḍavāḥ sanniśamya tata /
tameva samavartanta dharmarājahite ratāḥ //

saṃsatsu samayaṃ kṛtvā dharmarāḍbhrātṛbhiḥ saha /
pitṝṃstarpya yathānyāyaṃ devatāśca viśāmpate //

kṛtamaṅgalakalyāmo bhrātṛbhiḥ piravāritaḥ /
gateṣu kṣatriyendreṣu sarveṣu bharatarṣabha //

yudhiṣṭhiraḥ sahāmātyaḥ praviveśa purottamam / duryodhano mahārāja śakuniścāpi saubalaḥ /
sabhāyāṃ samaṇīyāyāṃ tatraivāste narādhipa //