Mahabharata · Chapter 2.72

tataḥ sa kururājasya sarvakarmasamṛddhimān /
yajñaḥ prītikaro rājansambabhau vipulotsavaḥ //

śāntavighnaḥ sukhārambhaḥ prabhūtadhanadhānyavān /
annavānbahubhakṣyaśca keśavena surakṣitaḥ //

samāpayāmāsa ca taṃ rājasūyaṃ mahākratum /
koṭisahasraṃ pradadau brāhmaṇānāṃ mahātmanām //

na kariṣyati taṃ loke kaścidanyo mahīpatiḥ /
yājakāḥ sarvakāmaiśca satataṃ tatṛpurdhanaiḥ //

tataścāvabhṛthasnātaḥ sa rājā pāṇḍunandanaḥ /
vyāsaṃ dhaumyaṃ vasiṣṭhaṃ ca nāradaṃ ca mahāmunim //

sumantu jaiminiṃ pailaṃ vaiśampāyanameva ca / yājñavalkyaṃ ca kapilaṃ kapālaṃ kauśikaṃ tathā /
sarvāṃśca ṛtvikpravarānpūjayāmāsa satkṛtān //
yudhiṣṭhira uvāca //

yuṣmatprasādātprāpto'yaṃ rājasūyo mahākratuḥ /
janārdanaprasādāddhi sampūrṇo me manorathaḥ //
vaiśampāyana uvāca //

atha yajñaṃ samāpyānte pūjayāmāsa mādhavam /
baladeva ca deveśaṃ bhīṣmādyāṃśca kurūdvahān //

tatastvavabhṛthasnātaṃ dharmātmānaṃ yudhiṣṭhiram /
samastaṃ pārthivaṃ kṣatramupagamyedamabravīt //

diṣṭyā vardhasi dharmajña sāmrājyaṃ prāptavānasi /
ājamīḍhājamīḍhānāṃ yaśaḥ saṃvardhitaṃ tvayā //

karmaṇaitena rājendra dharmaśca sumahānkṛtaḥ /
āpṛcchāmo naravyāghra sarvakāmaiḥ sūpūjitāḥ //

svarāṣṭrāṇi gamiṣyāmastadanujñātumarhasi /
śrutvā tu vacanaṃ rājñāṃ dharmarājo yudhiṣṭhiraḥ //

yathārhaṃ pūjya nṛpatīnbhrātṝnsarvānuvāca ha /
rājānaḥ sarva evaite prītyā'smānptamupāgatāḥ //

prasthitāḥ svāni rāṣṭrāṇi māmāpṛcchaya parantapāḥ /
anuvrajata bhadraṃ vo viṣayāntaṃ nṛpottamān //

bhrāturvacanamājñāya pāṇḍavā dharmacāriṇaḥ /
yathārhaṃ nṛpatīnsarvānekaikaṃ samanuvrajan //

virāyaṭamanvāyāttūrṇaṃ dhṛṣṭahyumnaḥ pratāpavān /
dhanañjayo yajñasenaṃ mahātmānaṃ mahāratham //

bhīṣmaṃ ca dhṛtarāṣṭraṃ ca bhīmaseno mahābalaḥ /
droṇaṃ tu sasutaṃ vīraṃ sahadevo yudhāṃ patiḥ //

nakulaḥ subalaṃ rājansahaputraṃ samanvayāt /
draupadeyāḥ sasaubhadrāḥ pārvatīyānmahārathān //

anvagacchaṃstathaivānyānkṣatriyānkṣatriyarṣabhāḥ /
evaṃ supūjitāḥ sarve jagmurviprāḥ sahasraśaḥ //

gateṣu pārthivendreṣu sarveṣu brāhmaṇeṣu ca /
yudhiṣṭhiramuvācedaṃ vāsudevaḥ pratāpavān //

āpṛcche tvāṃ gamiṣyāmi dvārakāṃ kurunandana /
rājasūyaṃ kratuśreṣṭhaṃ diṣṭyā tvaṃ prāptavānasi //

tamuvācaivamuktastu dharmarājo janārdanam /
tava prasādādgovinda prāptaḥ kratuvaro mayā //

kṣatraṃ samagramapi ca tvatprasādādvaśe sthitam /
upādāya baliṃ mukhyaṃ māmeva samupasthitam //

kathaṃ tvadgamanārthaṃ me vāṇī vitarate'nagha //

na hyahaṃ tvāmṛte vīraṃ ratiṃ prāpnomi karhacit /
avaśyaṃ caiva gantavyā bhavatā dvārakā purī //
vaiśampāyana uvāca //

evamuktaḥ sa dharmātmā yudhiṣṭhirasahāyavān /
abhigamyābravītprītaḥ pṛthāṃ pṛthuyaśā hariḥ //

sāmrājyaṃ samanuprāptāḥ putrāste'dya pitṛṣvasaḥ /
siddhārthā vasumantaśca sā tvaṃ prītimavāpnuhi //

anujñātastvayā cāhaṃ dvārakāṃ gantumutsahe /
subhadrāṃ draupadīṃ caiva sabhājayata keśavaḥ //

niṣkramyāntaḥ purāttasmādyudhiṣṭhirasahāyavān /
snātaśca kṛtajapyaśca brāhmaṇānsvasti vācya ca //

tato meghavapuḥ pragvyaṃ syandanaṃ ca sukalpitam /
yojayitvā mahābāhurdārukaḥ samupasthitaḥ //

upasthitaṃ rathaṃ dṛṣṭvā tārkṣyapravaraketanam /
pradakṣiṇamupāvṛtya samāruhya mahāmanāḥ //

prayayau puṇḍarīkākṣastato dvāravatīṃ purīm //

taṃ padbhyāmanuvavrāja dharmarājo yudhiṣṭhiraḥ /
bhrātṛbhiḥ sahitaḥ śrīmānvāsudevaṃ mahābalam //

tato muhūrtaṃ saṅgṛhya syandanapravaraṃ hariḥ /
abravītpuṇḍarīkākṣaḥ kuntīputraṃ yudhiṣṭhiram //

apramattaḥ sthito nityaṃ prajāḥ pāhi viśāmpate /
parjanyamiva bhūtāni mahādrumamiva dvijāḥ //

bāndhavāstvopajīvantu sahasrākṣamivāmarāḥ /
kṛtvā paraspareṇaiva saṃvādaṃ kṛṣṇapāṇḍavau //

anyonyaṃ samanujñāpya jagmatuḥ svagṛhānprati /
gate dvāravatīṃ kṛṣṇe sātvatapravare nṛpa //

mahāduryodhano rājā śakuniścāpi saubalaḥ /
sūtaputraśca gadheyaḥ saha duḥśāsanādibhiḥ //

sarvakāmaguṇopetairarcyamānāstu bhārata /
tasyāṃ sabhāyāṃ divyāyāmavasaṃstatra pāṇḍavaiḥ //