Mahabharata · Chapter 2.71

tataḥ pravavṛte yajño dharmarājasya dhīmataḥ /
śāntavighnārhaṇakṣobho maharṣigaṇasaṅkulaḥ //

taṃ tu yajñaṃ mahābāhurāsamāpterjanārdanaḥ /
rarakṣa bhagavāñchauriḥ śārṅgacakragadādharaḥ //

tasminyajñe pravṛtte tu vāgmino hetuvādinaḥ /
hetuvādānbahūnprāhuḥ parapakṣajigīṣavaḥ //

dadṛśuste nṛpatayo yajñasya vidhimuttamam /
upendrasyeva vihitaṃ sahadevena bhārata //

tadyajñe nyavasanrājanbrāhmaṇā bhṛśamutsukāḥ /
kathayantaḥ kathāḥ puṇyāḥ paśyanto naṭanartakān //

dadṛśustoraṇānyatra hematālamayāni ca /
dīptabhāskaratulyāni pradīptānīva tejasā //

sa yajñastoraṇaistatra grahairdyoriva sambabhau /
śayyāsanavihārāṃśca subahūnratnasaṃvṛtān //

ghaṭānpātrīkaṭāhāni kalaśāni samantataḥ /
na te kiñcidasauvarṇamapaśyaṃstatra pārthivāḥ //

bhuñjānānāṃ ca viprāṇāṃ svādubhojyaiḥ pṛthagvidhaiḥ /
aniśaṃ śrūyate tatra muditānāṃ mahātmanām //

dīyatāṃ dīyatāmeṣāṃ bhujyatāṃ bhujyatāmiti /
evamprakārāḥ sañjalpāḥ śrūyante tatra nityaśaḥ //

odanānāṃ vikārāṇi svādūni ca bahūni ca /
vividhaāni ca bhakṣyāṇi peyāni madhurāṇi ca //

dadurdvijānāṃ satataṃ rājapreṣyā mahādhvare /
pūrṇe śatasahasre tu viprāṇāṃ bhuñjatāṃ tadā //

sthāpitastatra sañjñārthaṃ śaṅkho'dhmāyata nityaśaḥ /
muhurmuhuḥ praṇādastu tasya śaṅkhasya bhārata //

uttamaḥ śrūyate śabdaḥ śrutvā vismayamāgaman /
evaṃ pravṛtte yajñe tu tuṣṭapuṣṭajanāyute //

annasya bahuśo rājannutsedhāḥ parvatopamāḥ /
dadhikulyāśca dadṛśuḥ sarpiṣaśca hradāñjanāḥ //

jambūdvīpo hi sakalo nānājanapadāyutaḥ /
rājannadṛśyataikastho rājñastasminmahākratau //

tatra rājasahasrāṇi puruṣāṇāṃ tatastataḥ /
gṛhītvā dhanamājagmustasya rājño mahākratau //

rājānaḥ sragviṇaścaiva sammṛṣṭamaṇikuṇḍalāḥ /
tānparīviviṣurviprāñchataśo'tha sahasraśaḥ //

vividhānyannapānāni lehyāni vividhāni ca /
teṣāṃ nṛpopabhogyāni brāhmaṇebhyo daduḥ sma te //

nānāvidhāni bhakṣyāṇi svādupuṣpaphalāni ca /
gulāni svādukṣaudrāṇi daduste brāhmaṇeṣu vai //

etāni satataṃ bhuktvā tasminyajñe dvijātayaḥ /
parāṃ prītiṃ yayuḥ sarve modamānāstatastataḥ //

evaṃ pramuditaṃ sarvaṃ bahuśo dhanadhānyavat /
yajñavāṭaṃ nṛpā dṛṣṭvā vismayaṃ paramaṃ yayuḥ //

yathābaddhūyamānāgniṃ rājasūyaṃ mahākratum /
pāṇḍavasya yathāśāstraṃ juhuvuḥ sarvayājakāḥ //

vyāsadhaumyādayaḥ sarve vidhivatṣoḍaśartvijaḥ /
svasvakarmāṇi cakruste pāṇḍavasya mahākratau //

nāṣaḍaṅgavidatrāsītsadasyo nābahuśrutaḥ /
nāvrato nānupādhyāyo na pāpo nākṣamo dvijaḥ //

na tatra kṛpaṇaḥ kaściddaridro na babhūva ha /
kṣudhito duḥkhito vāpi prākṛto vāpi mānuṣaḥ //

bhojanaṃ bhojanārthibhyo dāpayāmāsa sarvadā /
sahadevo mahātejāḥ satataṃ rājaśāsanāt //

saṃstare kuśalāścāpi sarvakarmāṇi yājakāḥ /
divasa divase cakruryathāśāstrārthacakṣuṣaḥ //

brāhmaṇā devaśāstrajñaḥ kathāścakruśca sarvataḥ /
remire ca kathānte tu sarve tasminmahākratau //

sā vedirvedasampannairdevadvijamaharṣibhiḥ /
ābabhāse tadā kīrṇā nakṣatrairdyaurivāmalā //

pāṇḍityadarśanārthāya kecana dvijasattamāḥ /
tarkārthamāgatāḥ kecitkecidvidyābhimāninaḥ //

keciddidṛkṣayā kecidbhītyā rājñaḥ pratāpinaḥ /
sarve'pyavabhṛthasnātā yājakāḥ kecana dvijāḥ //

tato vai hemayūpāṃśca sarvaratnasamācitān /
śobhārthaṃ kārayāmāsa sahadevo mahādyutiḥ //

dadṛśustoraṇānyatra hematālamayāni ca /
sa yajñastoraṇaistaiśca grahairdyoriva sambabhau //

tālānāṃ toraṇairhaimairdāntairiva diśāgajaiḥ /
dikṣu sarvāsu vinyastaistejobhirbhāskarairyathā //

sakirīṭairnṛpaiścaiva śuśubhe tatsadastadā /
devairdivyaiśca yakṣaiśca uragairdivyamānuṣaiḥ //

vidyādharagaṇaiḥ kīrṇaḥ pāṇḍavasya mahātmanaḥ /
sa rājasūyaḥ śuśubhe dharmarājasya dhīmataḥ //

gandharvagaṇasaṅkīrṇaḥ śobhito'psarasāṃ gaṇaiḥ /
devairmunigaṇairyakṣairdevaloka ivāparaḥ //

sa kimpuruṣagītaiśca kinnarairupaśobhitaḥ /
nāradaśca jagau tatra tumburuśca mahādyutiḥ //

viśvāsuścitrasenastathā'nye gītakovidāḥ /
ramayanti sma tānsarvānyajñakarmāntareṣvatha //

tatra cāpsarasaḥ sarvāḥ sundaryaḥ priyadarśanāḥ /
nanṛtuśca jaguścātra nityaṃ karmāntareṣvatha //

itihāsapurāṇāni ākhyānāni ca sarvaśaḥ /
ūcurvai śabdaśāstrajñā nityaṃ karmāntareṣvatha //

bheryaśca murajāścaiva maḍḍukā gomukhāśca ye /
śṛṅgavaṃśāmbujā vīṇāḥ śrūyante sma sahasraśaḥ //

loke'sminsarvaviprāśca vaiśyāḥ śūdrā nṛpādayaḥ / sarve mlecchāḥ sarvagaṇāstvādimadhyāntajāstathā /

nānādeśasamudbhūtairnānājātibhirāgataiḥ /
paryāpta iva loko'yaṃ yudhiṣṭhiraniveśane //

bhīṣmadroṇādayaḥ sarve kuravaḥ sasuyodhanāḥ /
vṛṣṇayaśca samagrāśca pāñcālāścāpi sarvaśaḥ //

yajñe'sminsarvakarmāṇi cakrurdāsā iva kratau /
evaṃ pravṛtto yajñaḥ sa dharmarājasya dhīmataḥ //

śuśubhe ca mahābāho somasyeva kraturyathā /
vastrāṇi kambalāṃścaiva prāvārāṃścaiva sarvadā //

niṣkahemajabhāṇḍāni bhūṣaṇāni ca sarvaśaḥ /
pradadau tatra viprāṇāṃ dharmarājo yudhiṣṭhiraḥ //

yāni tatra mahīpālairlabdhavānbharatarṣabhaḥ /
tāni sarvāṇi ratnāni brāhmaṇānāṃ dadau tadā //