Mahabharata · Chapter 2.58

evamālokayāñcakrurdvārakāmṛṣabhāstrayaḥ /
upendrabaladevau ca vāsavaśca mahāyaśāḥ //

tatastaṃ pāṇḍaraṃ śaurirmūrdhni tiṣṭhangarutmataḥ /
prītaḥ śaṅkhamupādhmāsīddviṣatāṃ romaharṣaṇam //

tasya śaṅkhasya śabdena sāraścukṣubhe bhṛśam /
rarāsa ca nabhaḥ sarvaṃ taccitramabhavattadā //

pāñcajanyasya nirghoṣaṃ niśamya kukurāndakāḥ /
prīyamāṇāḥ samājagmurālokya madhusūdanam //

vasudevaṃ puraskṛtya veṇuśaṅkharavaiḥ saha /
ugraseno yayau rājā vāsudevaniveśanam //

ānandituṃ paryacansveṣu veśmasu devakī /
rohiṇī ca yayau deśamāhukasya ca yāḥ striyaḥ //

hatā brahmadviṣaḥ sarve jayantyandhakavṛṣṇayaṭaḥ /
evamuktaḥ saha strībhirakṣatairmadhusūdanaḥ //

tataḥ śauriḥ suparṇena svaṃ niveśanamabhyayāt /
cakārātha yathoddeśamīśvaro maṇiparvatam //

tato dhanāni ratnāni sabhāyāṃ madhusūdanaḥ /
nidhāya puṇḍarīkākṣaḥ piturdarśanalālasaḥ //

tataḥ sāndīpiniṃ pūrvaṃ brāhmaṇaṃ cāpi bhārata /
yathānyāyaṃ vāsudeva upaspṛṣṭvā mahāyaśāḥ //

vavande pṛthutāmrākṣaḥ prīyamāṇo mahāyaśāḥ /
tathā'śruparipūrṇākṣamānandabhṛtacetasam //

vavande saha rāmeṇa pitaraṃ vāsavānujaḥ /
tābhyāṃ ca mūrdhnyupāghrātaḥ keśavaḥ paravīrahā //

yathāśreṣṭhamupāgamya sātvatānyadunandanaḥ /
sarveṣāṃ nāma jagrāha dāśārhāṇāmadhokṣajaḥ //

tataḥ sarvāṇi vittāni sarvaratnamayāni ca /
vyabhajattāni tebhyo'tha sarvebhyo yadunandanaḥ //

sā keśavamahāmātrairmahendrapratimaiḥ sabhā /
śuśubhe vṛṣṇiśārdūlaiḥ siṃhairiva girerguhā //

athāsanagatānsarvānuvāca vibudhādhipaḥ / śubhayā harṣayanvācā mahendrastānmahāyaśāḥ /
kukurāndhakamukhyāṃśca taṃ ca rājānamāhukam //
indra uvāca /

yadarthaṃ janma kṛṣṇasya mānuṣeṣu mahātmanaḥ /
yatkṛtaṃ vāsudevena tadvakṣyāmi samāsataḥ //

ayaṃ śatasahasrāṇi dānavānāmarindamaḥ /
nihay puṇḍarīkākṣaḥ pātālavivaraṃ yayau //

yacca nādhigataṃ pūrvaiḥ prahlādabaliśambaraiḥ /
tadidaṃ śauriṇā vittaṃ prāpitaṃ bhavatāmiha //

sapāśaṃ muramākramay pāñcajanyaṃ ca dhīmatā /
śilāsaṅghānatikramya niśumbhaḥ sagaṇo hataḥ //

hayagrīvaśca vikrānto dānavo nihato balī /
mathitaśca mṛdhe bhaumaḥ kuṇḍale cāhṛte punaḥ //

punarbāṇavadhe śaurimādityā vasubhiḥ saha /
manmukhā āgamiṣyanti sādhyāśca madhusūdanam //

evamuktvā tataḥ sarvānāmantrya kukurāndhakān /
sasvaje rāmakṛṣṇau ca vasudevaṃ ca vāsavaḥ //

pradyumnasāmbapramukhānanirūddhaṃ ca sāraṇam /
babhruṃ jhalliṃ gadaṃ bhānuṃ cārudeṣṇaṃ ca vṛtrahā //

satkṛtya sāraṇākrūrau punarābhāṣya sātyakim / sasvaje vṛṣṇirājānamāhukaṃ kukurādhipam /
bhojaṃ ca kṛtavarṇāṇamanyāṃścāndakavṛṣṇiṣu //

āmantrya devapravarairvāsavo vāsavānujam /
tataḥ śvetācalaprakhyaṃ gajamairāvataṃ prabhuḥ //

paśyatāṃ sarvabhātānāmāruroha śacīpatiḥ /
pṛthivīṃ cāntarikṣaṃ ca divaṃ ca varavāraṇam //

mukhāḍambaranirghoṣaiḥ pūrayantamivāsakṛt /
haimayantramahākakṣyaṃ hiraṇmayaviṣāṇinam //

manoharakuthāstīrṇaṃ sarvaratnavibhūṣitam /
nityasrutamadasrāvaṃ kṣarantamiva toyadam //

diśāgajaṃ mahāmātraṃ kāñcanasrajamāsthitaḥ /
prababhau mandarāgrasthaḥ pratapanbhānumāniva //

tato vajmayaṃ bhīmaṃ pragṛhya parāmāṅkuśam /
yayau balavatā sārdhaṃ pāvakena śacīpatiḥ //

taṃ kareṇugajavrātairvimānaiśca marudgaṇāḥ /
pṛṣṭhato'nuyayuḥ prītāḥ kuberavaruṇagrahāḥ //

sa vāyupakṣamāsthāya vaiśvānarapathaṃ gataḥ /
prāpya sūryapathaṃ devastatraivāntaradhīyata //