Mahabharata · Chapter 2.59
tataḥ sarvadaśārhāṇāmāhukasya ca yāḥ striyaḥ /
nandagopasya mahiṣī yaśodā lokaviśrutā //
revatī ca mahābhāgā rukmiṇī ca patrivratā /
satyā jāmbavatī cobhe gāndhārī śiṃśumāpi ca //
viśokā lakṣaṇā cāpi sumitrā ketumā tathā /
vāsudevamahiṣyo'nyāḥ śriyā sārdhaṃ yayustadā //
vibhūtiṃ draṣṭumanasaḥ keśavasya mahātmanaḥ /
prīyamāṇāḥ sabhāṃ jagmurālokayitumacyutam //
devakī sarvadevīnāṃ rohiṇī ca puraskṛtā /
dadṛśurdevamāsīnaṃ kṛṣṇaṃ halabhṛtā saha //
tau tu pūrvamatikramya rohiṇīmabhivādya ca /
abhyavādayatāṃ devau devakīṃ rāmakeśavau //
sā tābhyāmṛṣabhākṣābhyāṃ putrābhyāṃ śuśubhe'dhikam /
devakī devamāteva mitreṇa varuṇena ca //
tataḥ prāptā yaśodāyā duhitā vai kṣaṇena hi /
jājvalyamānā vapuṣā prabhayā'tīva bhārata //
ekānaṅgeti yāmāhuḥ kanyāṃ vai kāmarūpiṇīm /
yatkṛte sagaṇaṃ kaṃsaṃ jaghāna puruṣottamaḥ //
tataḥ sa bhagavānrāmastāmupākramya bhāminām /
mūrdhnyupāghrāya savyena parijagrāha pāṇinā //
tāṃ ca tatropasamprāpya priyāmiva sakhīmimām /
dakṣiṇena karāgreṇa pirajagrāha mādhavaḥ //
dadṛśustāṃ sabhāmadhye bhaginīṃ rāmakṛṣṇayoḥ /
rukmapadmaśāṃ padmaśrīmivottamanābhayoḥ //
athākṣatamahāvaṣṭyā lājapuṣpaghṛtairapi /
vṛṣṇayo'vākiranprītāḥ saṅkarṣaṇajanārdanau //
sabālāḥ sahavṛddhāśca ye jñātikulabāndhavāḥ /
upopaviviśuḥ prītā vṛṣṇayo madhusūdanam //
pūjyamāno mahābāhuḥ paurāṇāṃ rativardhanaḥ /
viveśa puruṣavyāghraḥ svaveśma madhusūdanaḥ //
rukmiṇyā sahito devyā pramumoda sukhī sukham /
anantaraṃ ca satyāyā jāmbavatyāśca bhārata //
sarvāsāṃ ca yaduśreṣṭho gehe gehe vihāravān /
jagāma ca hṛṣīkeśo rukmiṇyāḥ sadanaṃ punaḥ //
eṣa tāta mahābāho vijayaḥ śārṅgadhanvanaḥ /
etadarthaṃ ca janmāhurmānuṣeṣu mahātmanaḥ //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0