Mahabharata · Chapter 2.52

yaccake bhagavānviṣṇurvasudevasutastadā /
tatte'haṃ sampravakṣyāmi śṛṇu sravamaśeṣataḥ //

vāsudevasya mahātmyaṃ caritaṃ ca mahātmanaḥ /
hitārthaṃ surasartyānāṃ lokānāṃ ca hitāya ca //

yadā divi vibhustāta na reme bhagavānasau /
tato vyādiśaya bhūtāni vibhurbhūmisukhāvahaḥ //

nigrahārthāya daityānāṃ codayāmāsa vai tadā /
murutaśca vasūṃścaiva sūryācandramasāvubhau //

gandharvāpsarasaścaiva rudrādityāṃstathā'śvinau /
jāyadhvaṃ mānuṣe loke sarvalokamaheśvarāḥ //

jaṅgamāni viśālākṣo hyātmārthamasṛjatprabhuḥ /
jāyantāmiti govindastiryagyonigataiḥ saha //

tāni sarvāṇi sarvajño vyajāyata yadoḥ kule / ātmānamātmanā tāta kṛtvā bahuvidhaṃ hariḥ /
ratyarthamiha gāstatra rarakṣa puruṣottamaḥ /

ajātaśatro jātastu yatheṣṭa bhuvi bhūmipa /
kīrtyamānaṃ mayā tāta nibodha bharatarṣabha //

sāgarāḥ samakampanta mudā celuśca parvatāḥ /
jajvaluścāgnayaḥ śāntā jāyamāne janārdane //

śivāḥ sampravavurvātāḥ praśāntamabhavadrajaḥ /
jyotīṃṣi samprakāśanta jāyamāne janārdane //

devadundubhayaścāpi sasvanurbhṛśamambare /
abhyavarṣaṃstadā'gamya devatāḥ puṣpavṛṣṭibhiḥ //

gīrbhirmaṅgalayuktābhiḥ stuvanvai madhusadanam /
upatasthustadā prītāḥ prādurbhāve maharṣayaḥ //

tatastānabhisamprekṣya nāradapramukhānṛṣīn /
upānṛtyannupajagurgandharvāpsarasāṃ gaṇāḥ //

upatasthe ca govindaṃ sahasrākṣaḥ śacīpatiḥ /
abhyabhāṣata tejasvī maharṣīnpūjayaṃstadā //

kṛtvā ca devakāryāṇi kṛtvā devahitāni ca /
khaṃ lokaṃ lokakṛddevaḥ punargacchati tejasā //

ityuktvā ṛṣibhiḥ sārghaṃ jagāma tridivaṃ punaḥ /
abhyanujñāya tānsarvāñchādayanprakṛtiṃ parām //

nandagopakule kṛṣṇa uvāsa bahulāḥ samāḥ /
tataḥ kadācitsuptaṃ taṃ śakaṭasya tvadhaḥ śiśum //

yaśodā samparityajya jagāma yamunāṃ nadīm /
śiśulīlāṃ tataḥ kurvansvahastacaraṇau kṣipan //

ruroda madhuraṃ kṛṣṇaḥ pādāvūrdhvaṃ prasārayan /
pādāṅguṣṭhena śakaṭaṃ dārayannatha keśavaḥ //

tatra ekena pādena pātayitvā tathā śiśuḥ /
nyubjaṃ payodharākāṅkṣī sasāra ca ruroda ca //

pāṭitaṃ śakaṭaṃ dṛṣṭvā bhinnabhāṇḍapuṭīkaṭam /
janāste śiśunā tena vismayaṃ paramaṃ yayuḥ //

pratyakṣaṃ śūrasenānāṃ dṛśyate mahadadbhutam /
śayānena hataḥ kaṃsapakṣavāṃstigmatejasā //

pūtanā cāpi nihatā mahākāyā mahāstanī /
tataḥ kāle mahārāja saṃsaktau rāmakeśavau //

kṛṣṇaḥ saṅkarṣaṇaścobhau riṅkhiṇau ca babhūvatuḥ /
anyonyakiraṇākrāntau candrasūryāvivāmbare //

visarpantau ca sarvatra mahāsarpabhujau tadā /
rejatuḥ pāṃsudigdhāṅgau rāmakṛṣṇau tadā nṛpa //

kvacicca jānubhiḥ spṛṣṭau krīḍamānau kvacidvane /
pibantau dadhikulyāṃśca mathyamāne ca bhārata //

tataḥ sa bālo govindo navanītaṃ tadā kṣayam /
grāsamānastu tatrāyaṃ gopībhirdadṛśe tathā //

dāmnā'tholūkhale kṛṣṇo gopībhiśca nibandhitaḥ /
tattathā śiśunā tena karṣatā cārjunāvṛbhau //

samūlaviṭapau bhagnau tadadbhutamivābhavat /
tatastau bālyamuttīrṇau kṛṣṇasaṅkarṣaṇāvubhau //

tasminneva vrajasthāne saptavarṣai babhūvatuḥ /
nīlapītāmbaradharau pītaśvetānulepanau //

babhuvaturvatsapālau kākapakṣadharāvubhau /
parṇavādyaṃ śrutisukhaṃ vādayantau varānanau //

śuśubhāte vanagatau triśīrṣāviva pannagau /
mayūrāṅgajakarṇau tau pallavāpīḍadhāriṇau //

vanamālāparikṣiptau sālapotāvivodgatau /
aravindakṛtāpīḍau rajjuyajñopavītinau //

saśikyatumburukarau gopaveṇupravādakau /
kvacidvasantāvanyonyaṃ kraḍamānau kvacidvane //

parṇaśayyāsu tau suptau kvacinnidrāntaraiṣiṇau /
tau vatsānpālayantau hi śobhayantau mahadvanam //

cañcūryantau ramantau ca rājannevaṃ tadā śubham / tato bṛndāvanaṃ gatvā vasudevasutāvubhau /
gokulaṃ tatra kaunyeya cārayantau vijahratuḥ //