Mahabharata · Chapter 2.53

tataḥ kadacidgovindo jyeṣṭhaṃ saṅkarṣaṇaṃ vinā /
cacāra tadvanaṃ ramyaṃ susvarūpo varānanaḥ //

kākapakṣadharaḥ śrīmāñchyāmaḥ padmanibhekṣaṇaḥ /
śrīvatsenorasā yuktaḥ śaśāṅka iva lakṣmaṇā //

rajjuyajñopavītī sa pītāmbaradharo yuvā /
śvetacandranaliprāṅgo nīlakuñcitamūrdhajaḥ //

rājatā barhipatreṇa mandamārutakampinā /
kvacidgāyankvañcitkrīḍankvacinnṛtyankvaciddhasan //

gopaveṇuṃ sumadhuraṃ kāmaṃ tadapi vādayan /
prahlādanārthaṃ ca gavāṃ ka kvacidvanagato yuvā //

gokule meghakāle tu cacāra dyutimānprabhuḥ /
bahuramyeṣu deśeṣu vanasya vanarājipu //

tāsu kṛṣṇo mudā yuktaḥ krīḍayanbharatarṣabha /
sa kadācidvane tasmingobhiḥ saha parivrajan //

bhāṇḍīraṃ nāma dṛṣṭvā'tha nyagrodhaṃ keśavo mahān /
tacchāyāyāṃ matiṃ cakre nivāsāya tadā prabhuḥ //

sa tatra vayasā tulyairbatsapālaistadā'nagha /
reme sa divasaṃ kṛṣṇaḥ purā svargagato yathā //

taṃ krīḍamānaṃ gopālāḥ kṛṣṇaṃ bhāṇḍīravāsinaḥ /
ramayanti sma bahavo mānyaiḥ krīḍanakaistadā //

anye sma parigāyanti gopā muditamānasāḥ /
gopālakṛṣṇamevānye gāyanti sma vanapriyāḥ //

teṣāṃ saṅgāyatāmeva vādayāmāsa keśavaḥ /
parṇavādyāntare veṇuṃ tumbavīṇāṃ ca tatra vai //

evaṃ krīḍāntaraiḥ kṛṣṇo gopālairvijahāra saḥ /
tena bālena kaunteya kṛtaṃ lokahitaṃ tadā //

paśyatāṃ sarvabhūtānāṃ vāsudevena bhārata /
hrade nipātatā tatra krīḍitaṃ nāgamūrdhani //

śāsayitvā tu kālīyaṃ sarvalokasya paśyataḥ /
vijahāra tataḥ kṛṣṇo baledavasahāyavān //

dhenuko dāruṇo rājandaityo rāsabhavigrahaḥ /
tadā tālavane rājanbaladevena vai hataḥ //

tataḥ kadācitkaunteya rāmakṛṣṇau vanaṃ gatau /
cārayantau pravṛddhāni godhanāni śubhānanau //

viharantau mudā yuktau vīkṣamāṇau vanāni vai /
śvelayantau pragāyantau vicinvantau ca pādapān //

nāmabhirvyāharantau ca vatsāngāśca parantapau /
ceraturlokasiddhābhiḥ krīḍābhiraparājitau //

tau devau mānuṣīṃ dīkṣāṃ vahantau surapūjitau /
tajjātiguṇayuktābhiḥ krīḍābhiśceraturvanam //

evaṃ bālye'pi gopālaiḥ krīḍābhiśca vijahratuḥ //

tataḥ kṛṣṇo mahātejāstadā gatvā tu govrajam /
giriyajñaṃ tamevaiṣa pravṛttaṃ gopadārakaiḥ //

bubhuje pāyasaṃ śaurirīśvaraḥ sarvabhūtakṛt /
taṃ dṛṣṭvā gopakāḥ sarve kṛṣṇameva samarcayan //

pūjyamānastadā devairdivyaṃ vapuradhārayat /
dhṛto govardhano nāma saptāhaṃ parvato dhṛtaḥ //

śiśunā vāsudevena gavārthamarimardana /
krīḍamānastadā kṛṣṇaḥ kṛtavānkarma duṣkaram //

tadadbhutamatīvāsītsarvalokasya bhārata / devadevaḥ kṣitaṃ gatvā kṛṣṇaṃ natvā mudānvitaḥ /

govinda iti taṃ hyuktvā hyabhyaṣiñcatpurandaraḥ /
ityuktvāśliṣya govindaṃ puruhūtobhyayāddivam //

athāriṣṭa iti khyātaṃ daityaṃ vṛṣabhavigraham /
jaghāna tarasā kṛṣṇaḥ paśūnāṃ hitakāmyayā //

keśināmā tato daityo rājaṃsturagavigrahaḥ /
tathā vanagataṃ pārtha gajāyutabalaṃ hayam //

karāmbhoruhavajreṇa jaghāna madhusūdanaḥ /
atha mallaṃ tu cāṇūraṃ nijaghāna mahā'suram //

sudāmānamamitraghna sarvasainyapuraskṛtam /
bālarūpeṇa govindo nijaghāna ca bhārata //

baladevena cāyatnātsamāje muṣṭiko hataḥ /
tāḍitaśca sahāmātyaḥ kaṃsaḥ kṛṣṇena bhārata //

hatvā kaṃsamamitraghnaḥ sarveṣāṃ paśyatāṃ tadā / abhiṣicyograsenaṃ taṃ pitroḥ pādamavandata /

evamādīni karmāṇi kṛtavānvai janārdanaḥ //