Mahabharata · Chapter 2.48

viṣṇoḥ punarmahābhāgaḥ prādurbhāvo mahātmanaḥ /
dattātreya iti khyāta ṛṣirāsīnmahāyaśāḥ //

tena naṣṭeṣu vedeṣu kriyāsu ca makheṣu ca /
cāturvarṇye ca saṅkīrṇe dharme śithilatāṃ gate //

abhavardhati cādharme satye naṣṭe sthite'nṛte /
prajāsu kṣīyamāṇāsu dharme cāmūlatāṃ pate //

sayajñāḥ sakriyā vedāḥ pratyānītā hi tena vai /
cāturvarṇyamasaṅkīrṇaṃ kṛtaṃ tena mahātmanā //

sa eva vai yadā prādāddhaihayādhipatervaram /
taṃ haihayānāmadhipastvarjuno'bhiprasādayan //

vanaṃ paryacaransamyakchuśrūṣuranusūyakaḥ /
nirmamo nirahaṅkāro dīrghakālamatoṣayat //

ārādhya dattātreyaṃ hi agṛṅṇātsa varānimān /
āptādāptatarānviprādvidvānvidvanniṣevitāt //

ṛte'maratvaṃ vipreṇa dattātreyeṇa dhīmatā /
varaiścaturbhiḥ pravṛta imānvavre varānnṛpaḥ //

śrīmānmanasvī balavānsatyavāganasūyakaḥ /
sahasrabāhurbhūyāsameṣu me prathamo varaḥ //

jarāyujāṇḍajaṃ sarvaṃ sarvaṃ caiva carācaram /
śāstumicchāmi dharmeṇa dvitīyastveṣa me varaḥ //

pitṛndevānṛṣīnviprānyajeyaṃ vipulairmakhaiḥ /
amitrāṃśca śitairbāṇaistṛtīyo vrara eṣa me //

yasya nāsīnna bhavitā na cāsti sadṛśaḥ pumān /
iha vā divi vā loke sa me hantā bhavediti //

so'rjunaḥ kṛtavīryasya varaḥ putro'bhavadyudhi /
sa sahasraṃ sahasrāṇāṃ māhiṣmatyāmavardhata //

sa bhūmimakhilāṃ jitvā dvīpāṃścāpi samudriṇaḥ /
nabhasīvājvalatsūryaḥ puṇyaiḥ karmabhirjunaḥ //

indradvīpaṃ kaśeruṃ ca kāmadvīpaṃ gabhastitam /
gandharvavaruṇadvīpaṃ sauhṛṣṭamamitaprabhaḥ //

pūrvairajitapūrvāṃśca dvīpanajayadarjunaḥ /
idaṃ tu kārtavīryasya babhūvāsadṛśaṃ janaiḥ //

na pūrve nāpare tasya gamiṣyanti gatiṃ nṛpāḥ /
yadarṇave prayātasya vastraṃ na pariṣicyate //

sauvarṇaṃ sarvamapyāsīdvimānavaramuttamam /
caturdhā vyabhajadrāṣṭraṃ tadvibhajyānvapālayat //

ekāṃśenāharatsenāmekāṃśenāvasadgṛhān /
yastu tasya tṛtīyāṃśo rājño'bhūjjanasaṅgrahe //

āptaḥ paramakalyāṇastena yajñānakalpayat /
ye dasyavo grāmacarā aramye ca vasanti ye //

caturthena tu soṃ'śena tānsarvānpratyaṣedhayat /
dvārāṇi nāpidhīyante pureṣu nagareṣu ca //

sa eva rāṣṭrapālo'bhūtsrīpālo'bhavadarjunaḥ /
sa ----- saḥ gopālo viśāmpate //

śataṃ varṣasahasrāṇāmanuśiṣyārjuno mahīm /
dattātreyaprasādena evaṃ rājyaṃ cakāra saḥ //

evaṃ bahūni karmāṇi cakre lokahitāya saḥ // dattātreya iti khyātaḥ prādurbhāvo hyayaṃ hareḥ /
kathito bharataśreṣṭa śṛṇu bhūyo mahātmanaḥ //