Mahabharata · Chapter 2.49

tathā bhṛgukule janma yadarthaṃ ca mahātmanaḥ /
jāmadagnya iti khyātaḥ prādurbhāvaśca vaiṣṇavaḥ //

jamadagnisuto rājantrāmo nāma sa vīryavān /
hehayāntakaro rājansa rāmo balināṃ varaḥ //

kārtāvīryo mahāvīryo balenāpratimastadā /
rāmeṇa jāmadagnyena hato viṣamamācaran //

taṃ kārtavīryaṃ rājānaṃ hehayānāmarindamam /
rathasthaṃ pārthivaṃ rāmaḥ pātayitvā'vadhīdraṇe //

jambhasya yajñaṃ hatvā sa ṛtvijaścaiva saṃstare /
jambhasya mūrdhni bhettā ca hantā ca śatadundubheḥ //

sa eṣa kṛṣṇo govindo jāto bhṛguṣu vīryavān /
sahasrabāhumuddhartuṃ sahasrajitamāhave //

kṣatriyāṇāṃ catuṣpaṣṭimayutāni mahāyaśāḥ /
sarasvatyāṃ sametāni eṣa vai dhanuṣā'jayat //

brahmadviṣāṃ dhe tasminmahasrāṇi caturdaśa /
punarjaghāna śūrāṇāmatikrūro ratharṣabhaḥ //

tato rājñāṃ sahasraṃ sa bhaṅktā pūrvamarindamaḥ /
sahasraṃ musalenāhansahasramudakṛntata //

caturdaśasahasrāṇi kṛṇadūmamapāyayat / śiṣṭānbrahmadviṣo jitvā tato'snāyata bhārgavaḥ

rāmarāmetyamikruṣṭo brāhmaṇaiḥ kṣatriyārditaiḥ /
nighnañśatasahasrāṇi rāmaḥ paraśunābhibhūḥ //

na hyamṛṣyata tāṃ vācamārtairbhṛśamudīritām /
bhṛgo rāmābhidhāveti yadā'krandandvijātayaḥ //

kāśmīrāndaradānkuntīnkṣudrakānmālavāñchavān /
cedikāśikarūśāṃśca ṛṣikānkrathakaiśikān //

aṅgānvaṅgānkaliṅgāṃśca māgadhānkāśikosalān /
rātrāyaṇānvītihotrānkirātānkārtikāvatān //

etānanyāṃśca rājanyāndeśedeśe sahasraśaḥ /
nikṛtya niśitairbāṇaiḥ sampradāya vivasvate //

kīrṇā kṣatriyakoṭībhirmerumandarabhūṣaṇā /
triḥ saptakṛtvaḥ pṛthivī tena niḥkṣatriyā kṛtā //

kṛtvā niḥkṣatriyāṃ caiva bhārgavaḥ sa mahāyaśāḥ /
indragopakavarṇasya jīvañjīvanibhasya ca //

pūrayitvā ca saritaḥ kṣatajasya sarāṃsi ca /
cakāra tarpaṇaṃ vīraḥ pitṝṇāṃ tāsu teṣu ca //

sarvānaṣṭādaśa dvīpānvaśamānīya bhārgavaḥ /
so'śvamedhasahasrāṇi naramedhaśatāni ca //

iṣṭvā sāgaraparyantāṃ kāśyapāya mahīṃ dadau /
tasyāgreṇānuparyeti bhūmiṃ kṛtvā vipāṃsulām //

tataḥ kālakṛtāṃ satyāṃ bhārgavāya mahātmane /
gādhāmapyatra gāyanti ye purāṇavido janāḥ //

vedimaṣṭādaśotsedhāṃ hiraṇyasyātipauruṣīm /
rāmeṇa jāmadagnyena pratijagrāha kāśyapaḥ //

evamiṣṭvā mahābāhuḥ kratubhirbhūridakṣiṇaiḥ /
anyadvarṣaśataṃ rāmaḥ saubhe sālvamayodhayat //

tataḥ sa bhṛguśārdūlastaṃ saubhaṃ yodhayanprabhuḥ /
subandhuraṃ rathaṃ rājannāsthāya bharatarṣabha //

nagnikānāṃ kumārīṇāṃ gāyantīnāmupāśṛṇot /
rāmarāma mahābāho bhṛgūṇāṃ kīrtivardhana //

tyaja śastrāṇi sarvāṇi na tvaṃ saubhaṃ vadhiṣyasi /
śaṅkhacakragadāpāṇirdevānāmabhayaṅgaraḥ //

yudhi pradyumnasāmbābhyāṃ kṛṣṇaḥ saubhaṃ vadhiṣyati /
tacchrutvā puruṣavyāghrastata eva vanaṃ yayau //

nyasya sarvāṇi śastrāṇi kālakāṅkṣī mahāyaśāḥ /
rathaṃ sarvāyudhaṃ caiva śarānparaśumeva ca //

dhanūṃṣyapsu pratiṣṭhāpya rāmastepe paraṃ tapaḥ /
hriyaṃ prajñāṃ śriyaṃ kīrtiṃ lakṣmīṃ cāmitrakarśanaḥ //

pañcādhiṣṭhāya dharmātmā taṃ rathaṃ visasarja ha /
ādikāle pravṛttaṃ tu vyabhajatkaramīśvaraḥ //

nāghnataṃ śraddhayā saubhaṃ na hyaśakto mahāyaśāḥ / jāmadagnya iti khyāto yastvayaṃ bhagavānupiḥ /

so'sya bhāgastapastepe bhārgavo lokaviśrutaḥ //