Scripture Library

Mahabharata · Chapter 2.42

2.42.1

gāṅgeyenaivamuktastu śiśupālaścukopa tam /
kruddhaṃ sunīthaṃ dṛṣṭvā'tha sahadevo'bravīttadā //

2.42.2

matipūrvamidaṃ sarvaṃ cedirāja mayā kṛtam /
tanme nigadatastattvaṃ kāraṇādatra me śṛṇu //

2.42.3

sa pārthivānāṃ sarveṣāṃ guruḥ kṛṣṇo'paro na hi /
tasmādabhyarcito'smābhiḥ sarve sammantumarhatha //

2.42.4

yo vā sahate kaścidrājñāṃ sabalavāhanaḥ /
kṣipraṃ yuddhāya niryātu tasya mūrdhnyāhitaṃ padam //

2.42.5

evamukto mayā heturuttaraṃ prabravītu me /
vaiśampāyana uvāca //
tato na vyājahāraiṣāṃ kaścidbuddhimatāṃ satām //

2.42.6

mānināṃ balināṃ rājñāṃ madhye sandarśite pade /
evamukte sunīthasya sahadevena keśave //

2.42.7

svabhāvarakte nayane kopādraktatare kṛte /
tasya kopaṃ samudbhūtaṃ jñātvā bhīṣmaḥ pratāpavān //

2.42.8

ācacakṣe punastasmai kṛṣṇasyaivottarānguṇān /
sa sunīthaṃ samāmantrya tāṃśca sarvānmahīkṣitaḥ //

2.42.9

uvāca vadatāṃ śreṣṭhaṃ idaṃ matimatāṃ varaḥ / sahadevena rājāno yaduktaṃ keśavaṃ prati /
tattatheti vijānīdhvaṃ bhūyaścātra vibodhata //

Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0