Mahabharata · Chapter 2.43

tato bhīṣmasya tacchrutvā vacaḥ kāle yudhiṣṭhiraḥ /
jñāpanārthāya sarveṣāṃ bhīṣmaṃ punarathābravīt //

vistareṇāsya devasya karmāṇīcchāmi sarvaśaḥ /
śrotuṃ bhagavatastāni prabravīhi pitāmaha //

karmaṇāmānupūrvā ca prādurbhāvāśca ye vibhoḥ /
yathā ca prakṛtiḥ kṛṣṇe tanme brūhi pitāmaha //

evamuktastadā bhīṣmaḥ provāca bharatarṣabha /
yudhiṣṭhiramamitraghnaṃ tasmintrājasamāgame //

samakṣaṃ vāsudevasya devasyeva śatakratoḥ /
karmāṇyasukarāṇyanyairācacakṣe janādhipa //

śṛṇvatāṃ pārthivānāṃ ca dharmarājasya cāntike /
idaṃ matimatāṃ śreṣṭhaḥ kṛṣṇaṃ prati viśāmpate //

nāmnaivāmantrya rājendra cedirājamarindamam /
bhīmakarmā tato bhīṣṇo bhūyaḥ sa itamabravīt //

karūṇāmapi rājānaṃ yudhiṣṭhiramabhāṣata /
bhīṣṇa uvāca /
vartamānāmatītāṃ ca śṛṇu rājanyudhiṣṭhira //

īśvarasyottamasyaināṃ karmaṇāṃ gahanāṃ gatim /
avyakto vyaktaliṅgastho ya eṣa bhagavānprabhuḥ //

purā nārāyaṇo devaḥ svayambhūḥ prapitāmahaḥ /
sahasraśīrṣaḥ puruṣo dhravo'nantaḥ sanātanaḥ //

sahasrāsyaḥ sahasrāścaḥ sahasracaraṇo vibhuḥ /
sahasravāhuḥ sarvajño devo nāmasahasravān //

sahasramukuṭo devo viśvarūpo mahādyutiḥ /
anekavarṇo devādiravyaktādvai pare sthitaḥ //

asṛjatsalilaṃ pūrvaṃ sa ca nārāyaṇaḥ prabhuḥ /
tatastu bhagavāṃstoye brahmāṇamasṛjatsvayam //

brahmā caturmukho lokānsarvāṃstānasṛjatsvayam / ādikāle purā hyevaṃ sarvalokasya codbhavaḥ /
purā yaḥ pralaye prāpte naṣṭe sthāvarajaṅgame //

brahmādiṣu pralīneṣu naṣṭe loke carācare /
ābhūtasamplave prāpte pralīne prakṛtau mahān //

ekasmiṣṭhati sarvātmā sa tu nārāyaṇaḥ prabhuḥ /
nārāyaṇasya cāṅgāni sarvadaivāni bhārata //

śirastasya divaṃ rājannābhiḥ khaṃ caraṇau mahī /
aśvinau karṇayordevau cakṣuṣī śaśibhāskarau //

indravaiśvānarau devau mukhaṃ tasya mahātmanaḥ /
anyāni sarvadaivāni sarvāṅgāni mahātmanaḥ //

sarvaṃ cāpi harau saṃsthaṃ sūtre maṇigaṇā iva /
ābhūtasamplavānte'tha dṛṣṭvā sarvaṃ tamonvitam //

nārāyaṇo mahāyogī sarvajñaḥ paramātmavān /
brahmabhūtastadātmānaṃ brahmaṇamasṛjatsvayam //

so'dhyakṣaḥ sarvabhūtānāṃ prabhūtaprabhavo'cyutaḥ /
sanatkumāraṃ rudraṃ ca saptarṣīśca tapodhanāt //

sarvamevāsṛjadbrahmā tathā lokāṃstathā prajāḥ /
te ca tadvyasṛjaṃstatra prāptakāle yudhiṣṭhira //

tebhyo'bhavanmahātmabhyo bahudhā brahma śāśvatam /
kalpānāṃ bahukoṭyaścasamatītāstu bhārata //

ābhūtasamplavāścaiva bahudhā'ddhā'pacakramuḥ /
manvantarayugā rājansaṅkalpo bhūtasamplavāḥ //

cakravatparivartante sarvaṃ viṣamukhaṃ jagat /
sṛṣṭvā caturmukhaṃ devaṃ devo nārāyaṇaḥ prabhuḥ //

sa lokānāṃ hitārthāya kṣīrode vasati prabhuḥ /
brahmā ca sarvalokānāṃ lokasya ca pitāmahaḥ //

tato nārāyaṇo devaḥ sarvasya prapitāmahaḥ / //