Mahabharata · Chapter 2.41

tato yudhiṣṭhiro rājā śiśupālamupādravat /
uvāca cainaṃ madhuraṃ sāntvapūrvamidaṃ vacaḥ //

nedaṃ yuktaṃ mahīpāla yādṛśaṃ vai tvamuktavān /
adharmaśca paro rājanpāruṣyaṃ ca nirarthakam //

na hi dharmaṃ paraṃ jātu nāvabudhyeta pārthivaḥ /
bhīṣmaḥ śāntanavastvenaṃ māvamaṃsthāstvamanyathā //

paśya caitānmahīpālāṃstvatto vṛddhatarānbahūn /
mṛṣyante cārhaṇāṃ kṛṣṇe tadvatvaṃ kṣantumarhasi //

veda tattvena kṛṣṇaṃ hi bhīṣṇaścedipate bhṛśam /
na hyenaṃ tvaṃ tathā yathainaṃ veda kauravaḥ //
bhīṣma uvāca /

nāsmai deyo hyanunayo nāyamarhati sāntvanam /
lokavṛddhatame kṛṣṇe yo'rhaṇāṃ nābhimanyate //

kṣatriyaḥ kṣatriyaṃ jitvā raṇe raṇakṛtāṃ varaḥ /
yo muñcati vaśe kṛtvā gururbhavati tasya saḥ //

asyāṃ hi samitau rājñāmekamapyajitaṃ yudhi /
na paśyāmi mahīpālaṃ sātvatīputratejasā //

na hi kevalamasmākamayamarcyatamo'cyutaḥ /
trayāṇāmapi lokānāmarcanīyo mahābhujaḥ //

kṛṣṇena hi jitā yuddhe bahavaḥ kṣatriyarṣabhāḥ /
jagatsarvaṃ ca vārṣṇeye nikhilena pratiṣṭhitam //

tasmātsatsvapi vṛddheṣu kṛṣṇamarcāma netarān /
evaṃ vaktuṃ na cārhastvaṃ mā te'bhūdbuddhirīdṛśī //

jñānavṛddhā mayā rājanbahavaḥ paryupāsitāḥ / yasya rājanprabhāvajñāḥ purā sarve ca rakṣitāḥ /
teṣāṃ kathayatāṃ śaurerahaṃ guṇavato guṇān //

samāgatānāmaśrauṣaṃ bahūnbahumatānsatām /
karmāṇyapi ca yānyasya janmaprabhṛti dhīmataḥ //

bahṛśaḥ kathyamānāni narairbhūyaḥ śrutāni me /
na kevalaṃ vayaṃ kāmāccedigaja janārdanam //

na sambandhaṃ puraskṛtya kṛtārthaṃ vā kathañcana /
arcāmahe'rcitaṃ sadbhirbhuvi bhūtasukhāvaham //

yaśaḥ śauryaṃ jayaṃ cāsya vijñāyārcāṃ prayuñjmahe na ca kaścidihāsmābhiḥ suvālopyaparīkṣitaḥ //

guṇairvṛddhānatikramya harirarcyatamo mataḥ /
jñānavṛddho dvijātīnāṃ kṣatriyāṇāṃ balādhikaḥ //

vaiśyānāṃ dhānyadhanavāñśūdrāṇāmeva janmataḥ /
pūjyatāyāṃ ca govinde hetū dvāvapi saṃsthitau //

vedavedāṅgavijñānaṃ balaṃ cābhyadhikaṃ tathā /
nṛṇāṃ loke hi ko'nyosti viśiṣṭaḥ keśavādṛte //

dānaṃ dākṣyaṃ śrutaṃ śauryaṃ hrīḥ kīrtirbuddhiruttamā /
sannatiḥ śrīrdhṛtistuṣṭiḥ puṣṭiśca niyatā'cyute //

tamimaṃ lokasampannamācāryaṃ pitaraṃ gurum /
arghyamarcitamarcāmaḥ sarve saṅkṣantumarhatha //

ṛtviggururvivāhyaśca snātako nṛpatiḥ priyaḥ /
sarvametaddhṛṣīkeśastasmādabhyarcito'cyutaḥ //

kṛṣṇa eva hi lokānāmutpattirapi cāpyayaḥ /
kṛṣṇasya hi kṛte viśvamidaṃ bhūtaṃ carācaram //

eṣa prakṛtiravyaktā kartā caiva sanātanaḥ /
paraśca sarvabhūtebhyastasmātpūjyatamo'cyutaḥ //

buddhirmano mahadvāyustejo'bhaḥ khaṃ mahī ca yā /
caturvidhaṃ ca yadbhūtaṃ sarvaṃ kṛṣṇe pratiṣṭhitam //

ādityaścandramāścaiva nakṣatrāṇi grahāśca ye /
diśaśca vidiśaścaiva sarvaṃ kṛṣṇe pratiṣṭhitam //

eṣa rudraśca sarvātmā brahmā caiva sanātanaḥ /
akṣaraṃ kṣararūpeṇa mānuṣatvamupāgataḥ //

agnihotramukhā vedā gāyatrī cchandasāṃ mukham /
rājā mukhaṃ manuṣyāṇāṃ nadīnāṃ sāgaro mukham //

nakṣatrāṇāṃ mukhaṃ candra ādityastejasāṃ mukham /
parvatānāṃ mukhaṃ merurgaruḍaḥ patatāṃ mukham //

ūrdhvaṃ tiryagadhaścaiva yāvatī jagato gatiḥ /
sadevakeṣu lokeṣu bhagavānkeśavo mukham //

ayaṃ tu puruṣo bālaḥ śiśupālo na budhyate /
sarvatra sarvadā kṛṣṇaṃ tasmādevaṃ prabhāṣate //

yo hi dharmaṃ vicinuyādutkṛṣṭaṃ matimānnaraḥ /
sa vai paśyedyathā dharmaṃ na tathā cedirāḍayam //

savṛddhabāleṣvathavā pārthiveṣu mahātmasu /
ko nārhaṃ manyate kṛṣṇaṃ ko vāpyenaṃ na pūjayet //

athaināṃ duṣkṛtāṃ pūjāṃ śiśupālo vyavasyati /
duṣkṛtāyāṃ yathānyāyaṃ tathā'yaṃ kartumarhati //