Mahabharata · Chapter 2.4

tāṃ tu kṛtvā sabhāṃ śreṣṭhāṃ mayaścārjunamabravīt /
bhūtānāṃ ca mahāvīryo dhvajāgre kiṅkaro gaṇaḥ //

tava viṣphāraghoṣeṇa meghavanninadiṣyati /
ayaṃ hi sūryasaṅkāśo jvalanasya ratho mahān // 2 //

ime ca divijāḥ śvetā vīryavanto hayottamāḥ /
māyāmayaḥ kṛto hyeṣa dhvajo vānaralakṣaṇaḥ //

asajjamāno vṛkṣeṣu dhūmaketurivocchritaḥ /
bahuvarṇaṃ hi lakṣyeta dhvajaṃ vānaralakṣaṇam //

dhvajotkaṭaṃ hyanavamaṃ yuddhe drakṣyasi viṣṭhitam /
eva vīraḥ savyasācindhvajasyānte bhaviṣyati //
vaiśampāyana uvāca /

ityuktvā'liṅgya vībhatsuṃ visṛṣṭaḥ prayayau mayaḥ /

tataḥ praveśanaṃ tasyāṃ cakre rājā yudhiṣṭhiraḥ /
ayutaṃ bhojayitvā tu brāhmaṇānāṃ narādhipaḥ //

sājyena pāyasenaiva madhunā miśritena ca / bhakṣyairmūlaiḥ phalaiścaiva māṃsairvārāhahāriṇaiḥ /
kṛsareṇātha jīvantyā haviṣyeṇa ca sarvaśaḥ //

māṃsaprakārairvividhaiḥ khādyaiścāpi tathā nṛpa /
coṣyaiśca vividhai rājanpeyaiśca bahuvistaraiḥ //

ahataiścaiva vāsobhirmālyairuccāvacairapi /
tarpayāmāsa viprendrānnānādigbhyaḥ samāgatān //

dadau tebhyaḥ sahasrāṇi gavāṃ pratyekaśaḥ punaḥ /
puṇyāhaghoṣastatrāsīddivaspṛgiva bhārata //

vāditrairvividhairdivyairgandhairuccāvacairapi /
pūjayitvā kuruśreṣṭho devatāni niveśya ca //

tatra mallā naṭā jhallāḥ sūtā vaitālikāstathā /
upatasthurmahātmānaṃ dharmaputraṃ yudhiṣṭhiram //

tathā sa kṛtvā pūjāṃ tāṃ bhrātṛbhiḥ saha pāṇḍavaḥ /
tasyāṃ sabhāyāṃ ramyāyāṃ reme śakro yathā divi //

sabhāyāmṛṣayastasyāṃ pāṇḍavaiḥ saha āsate /
āsāñcakrurnarendrāśca nānādeśasamāgatāḥ //

asito devalaḥ satyaḥ sarpirmālī mahāśirāḥ /
arvā vasuḥ sumitraśca maitreyaḥ śunako baliḥ //

bako dālbhyaḥ sthūlaśirāḥ kṛṣṇadvaipāyanaḥ śukaḥ /
sumanturjaiminiḥ pailo vyāsaśiṣyāstathā vayam //

tittiriryājñavalkyaśca sasuto romaharṣaṇaḥ /
apsuhomyaśca dhaumyaśca aṇīmāṇḍavyakauśikau //

dāmoṣṇīpastraibalīśca parṇādo ghaṭajānukaḥ /
mauñjāyano vāyubhakṣaḥ pārāśaryaśca sārikaḥ //

balivākaḥ sinīvākaḥ saptapālaḥ kṛtaśramaḥ /
jātūkarṇaḥ śikhāvāṃśca ālambaḥ pārijātakaḥ //

parvataśca mahābhāgo mārkaṇḍeyo mahāmuniḥ /
pavitrapāṇiḥ sāvarṇo bhālukirgālavastathā //

jaṅghābandhuśca raibhyaśca kopavegastathā bhṛguḥ /
haribabhruśca kauṇḍinyo babhrumālī sanātanaḥ //

kākṣīvānauśijaścaiva nāciketo'tha gautamaḥ /
paiṅgyo varāhaḥ śunakaḥ śāṇḍilyaśca mahātapāḥ //

kukkuro veṇujaṅgho'tha kālāpaḥ kaṭha eva ca /
munayo dharmavidvāṃso dhṛtātmāno jitendriyāḥ //

ete cānye ca bahavo vedavedāṅgapāragāḥ /
upāsate mahātmānaṃ sabhāyāmṛṣisattamāḥ //

kathayantaḥ kathāḥ puṇyā dharmajñāḥ śucayo'malāḥ /
tathaiva kṣatriyaśreṣṭhā dharmarājamupāsate //

śrīmānmahātmā dharmātmā muñjaketurvivardhanaḥ / saṅgrāmajiddurmukhaśca ugrasenaśca vīryavān /

kakṣasenaḥ kṣitipatiḥ kṣemakaścāparājitaḥ /
kambojarājaḥ kamaṭhaḥ kampanaśca mahābalaḥ //

satataṃ kampayāmāsa yavanāneka eva yaḥ / balapauruṣasampannānkṛtāstrānamitaujasaḥ /
yathā'surānkālakeyāndevo vajradharastathā //

jaṭāsuro madrakānāṃ ca rājā kuntiḥ pulindaśca kirātarājaḥ /
tathāṅgavāṅgau sahapuṇḍrakeṇa pāṇḍyoḍrarājau ca sahāndhrakeṇa //

aṅgo vaṅgaḥ sumitraśca śaibyaścāmitrakarśanaḥ /
kirātarājaḥ sumanā yavanādhipatistathā //

cāṇūro devarātaśca bhojo bhīmarathaśca yaḥ /
śrutāyudhaśca kāliṅgo jayasenaśca māgadhaḥ //

sukarmā cekitānaśca puruścāmitrakarśanaḥ /
ketumānvasudānaśca vaideho'tha kṛtakṣaṇaḥ //

sudharmā cāniruddhaśca śrutāyuśca mahābalaḥ /
anūparājo durdharpaḥ kramajicca sudarśanaḥ //

śiśupālaḥ sahasutaḥ karūpādhipatistathā /
vṛṣṇīnāṃ caiva durdharpāḥ kumārā devarūpiṇaḥ //

āhuko vipṛthuścaiva gadaḥ sāraṇa eva ca /
akrūraḥ kṛtavarmā ca satyakaśca śineḥ sutaḥ //

bhīṣmako'thākṛtiścaiva dyumatsenaśca vīryavān /
kekayāśca maheṣvāsā yajñasenaśca somakiḥ //

ketumānvasumāṃścaiva kṛtāstraśca mahābalaḥ / ete cānye ca bahavaḥ kṣatriyā mukhyasammatāḥ /

upāsate sabhāyāṃ sma kuntīputraṃ yudhiṣṭhiram /
arjunaṃ ye va saṃśritya rājaputrā mahābalāḥ //

aśikṣanta dhanurvedaṃ rauravājinavāsasaḥ / tatraiva śikṣitā rājankumārā vṛṣṇinandanāḥ /

raukmiṇeyaśca sāmbaśca yuyudhānaśca sātyakiḥ /
sudharmā cāniruddhaśca śaivyaśca narapuṅgavaḥ //

ete cānye ca bahavo rājānaḥ pṛthivīpate /
dhanañjayasakhā cātra nityamāste sma tumburuḥ //

upāsate mahātmānamāsīnaṃ saptaviṃśatiḥ /
citrasenaḥ sahāmātyo gandharvāpsarasastathā //

gītavāditrakuśalāḥ sāmyatālaviśāradāḥ /
pramāṇo'tha laye sthāne kinnarāḥ kṛtaniśramāḥ //

sañcoditāstumburuṇā gandharvasahitāstadā /
gāyanti divyatānaiste yathānyāyaṃ manasvinaḥ //

pāṇḍuputrānṛṣīṃścaiva ramayanta upāsate /
tasyāṃ sabhāyāmāsīnāḥ suvratāḥ satyasaṅgarāḥ //

divīva devā brahmāṇaṃ yudhiṣṭhiramupāsate //