Mahabharata · Chapter 2.3

athābravīnmayaḥ pārthamaryunaṃ jayatāṃ varam /
āpṛcche tvāṃ gamiṣyāmi punareṣyāmi cāpyaham //

viśrutāṃ triṣu lokeṣu pārtha divyāṃ sabhāṃ tava / prāṇināṃ vismayakarīṃ tava priyavivardhinīm /
pāṇḍavānāṃ ca sarveṣāṃ kariṣyāmi dhanañjaya //

uttareṇa tu kailāsaṃ mainākaṃ parvataṃ prati /
yiyakṣamāṇeṣu purā dānaveṣu mayā kṛtam //

citraṃ maṇimayaṃ bhāṇḍaṃ ramyaṃ bindusāraḥ prati /
sabhāyāṃ satyasandhasya yadāsīdvṛṣaparvaṇaḥ //

āgamiṣyāmi tadgṛhya yadi tiṣṭhati bhārata /
tataḥ sabhāṃ kariṣyāmi pāṇḍavasya yaśasvinīm //

manaḥ prahlādinīṃ citrāṃ sarvaratnavibhūṣitām /
asti bindusārasyugrā gadā ca kurunandana //

nihitā yauvanāśvena rājñā hatvā raṇe ripūn /
suvarṇabindubhiścitrā gurvī bhārasahā dṛḍhā //

sā vai śatasahasrasya sammitā śatrughātinī /
anurūpā ca bhīmasya gāṇḍīvaṃ bhavato yathā //

vāruṇaśca mahāśaṅkho devadattaḥ sughoṣavān /
sarvametatpradāsyāmi bhavate nātra saṃśayaḥ //
vaiśampāyana uvāca /

ityuktvā so'suraḥ pārthaṃ prāgudīcīṃ diśaṃ gataḥ /
athottareṇa kailāsānmainākaṃ parvataṃ prati //

hiraṇyaśṛṅgaḥ sumahānmahāmaṇimayo giriḥ /
ramyaṃ bindusaro nāma yatra rājā bhagīrathaḥ //

druṣṭuṃ bhāgīrathīṃ gaṅgāmuvāsa bahulāḥ samāḥ /
yatreṣṭaṃ sarvabhūtānāmīśvareṇa mahātmanā //

āhṛtāḥ kratavo mukhyāḥ śataṃ bharatasattama /
yatra yūpā maṇimayāścaityāścāpi hiraṇmayāḥ //

śobhārthaṃ vihitāstatra na tu dṛṣṭāntataḥ kṛtāḥ /
yatreṣṭvā sa gataḥ siddhiṃ sahasrākṣaḥ śacīpatiḥ //

yatra bhūtapatiḥ sṛṣṭvā sarvām̐llokānsanātanaḥ /
apasyate tigmatejāḥ sthito bhūtaiḥ sahasraśaḥ //

naranārāyaṇau brahmā yamaḥ sthāṇuśca pañcamaḥ /
upāsate yatra paraṃ sahasrayugaparyaye //

yatreṣṭaṃ vāsudevena sattrairvarṣagaṇānbahūn /
śraddadhānena satataṃ dharmasampratipattaye //

suvarṇamālino yūpāścaityāścāpyatibhāsvarāḥ /
dadau yatra sahasrāṇi prayutāni ca keśavaḥ //

tatra gatvā sa jagrāha gadāṃ śaṅkhaṃ ca bhārata / tasmādgirerupādāya śilāḥ surucirāvahāḥ /
sphāṭikaṃ ca sabhādravyaṃ yadāsīdvṛṣaparvaṇaḥ //

kiṅkaraiḥ saha rakṣobhiryadarakṣanmahaddhanam /
tadagṛhṇānmayastatra gatvā sarvaṃ mahā'suraḥ //

tadāhṛtya ca tāṃ cakre so'suro'pratimāṃ sabhām /
viśrutāṃ triṣu lokeṣu divyāṃ maṇimayīṃ śubhām //

gadāṃ ca bhīmasenāya pravarāṃ pradadau tadā /
devadattaṃ cārjunāya śaṅkhapravaramuttamam //

yasya śaṅkhasya nādena bhūtāni pracakampire /
sa kālaṃ kañcidāśvasya viśvakarmā vicintya ca //

sabhāṃ pracakrame kartuṃ pāṇḍavānāṃ mahātmanām /
abhiprāyeṇa pārthānāṃ kṛṣṇasya ca mahātmanaḥ //

sarvartuguṇasampannāṃ divyarūpāmalaṅkṛtām / tarpayitvā dvijaśreṣṭhānpāyasena sahasraśaḥ /
sabhā ca sā mahārāja śātakumbhamayadrumā //

daśakiṣkusahasrāṇi samantādāyatābhavat /
yathā vahneryathārkasya somasya ca yathā sabhā //

bhrājamānā tathā'tyarthaṃ dadhāra paramaṃ vapuḥ /
abhighnatīva prabhayā prabhāmarkasya bhāsvarām //

prababhau jvalamāneva divyā divyena varcasā / navameghapratīkāśā divamākṛtya viṣṭhitā /
āyatā vipulā ramyā vipāpmā vigataklamā //

uttamadravyasampannā ratnaprākāratoraṇā /
bahucitrā bahudhanā sukṛtā viśvakarmaṇā //

na dāśārhī sudharmā vā brahmaṇo vātha tādṛśī /
sabhā rūpeṇa sampannā yāṃ cakre matimānmayaḥ //

tāṃ sma tatra mayenoktā rakṣanti ca vahanti ca /
sabhāmaṣṭau sahasrāṇi kiṅkarā nāma rākṣasāḥ //

antarikṣacarā ghorā mahākāyā mahābalāḥ /
raktākṣāḥ piṅgalākṣāśca śuktikarṇāḥ prahāriṇaḥ //

tasyāṃ sabhāyāṃ nalinīṃ cakārāpratimāṃ mayaḥ /
vaidūryapatravitatāṃ maṇinālamayāmbujām //

padmasaugandhikavatīṃ nānādvijagaṇāyutām / puṣpitaiḥ paṅkajaiścitrāṃ kūrmairmatsyaiśca kāñcanaiḥ /
citrasphaṭikasopānāṃ niṣpaṅkasalilāṃ śubhām //

mandānilasamuddhūtāṃ muktābindubhirācitām /
mahāmaṇiśilāpaṭṭabaddhaparyantavedikām //

maṇiratnacitāṃ tāṃ tu kecidabhyetya pārthivāḥ /
dṛṣṭvāpi nābhyajānanta te'jñānātprapatantyuta //

tāṃ sabhāmabhito nityaṃ puṣpavanto mahādrumāḥ /
āsannānāvidhā lolāḥ śītacchāyā manoramāḥ //

kānanāni sugandhīni puṣkariṇyaśca sarvaśaḥ /
haṃsakāraṇḍavopetāścakravākopaśobhitāḥ //

jalajānāṃ ca padmānāṃ sthalajānāṃ ca sarvaśaḥ /
māruto gandhamādāya pāṇḍavānsma niṣevate //

īdṛśīṃ tāṃ sabhāṃ kṛtvā māsaiḥ paricaturdaśaiḥ /
niṣṭhitāṃ dharmarājāya mayo rājannyavedayat //