Mahabharata · Chapter 2.33

icchāmyāgamanaṃ śrotuṃ haiḍimbasya dvijottama /
laṅkāyāṃ ca gatiṃ brahmanpaulastyasya ca darśanam //

kāverīdarśanaṃ caiva ānupūrvyā vadasva me /
vaiśampāyana uvāca /
śṛṇu rājanyathā vṛttaṃ sahedavasya sāhasam //

kālanadvīpagāṃścaiva tarasā'jitya cāhave /
dakṣiṇāṃ ca diśaṃ jitvā colasya viṣayaṃ yayau //

dadarśa puṇyatoyāṃ vai kāverīṃ saritāṃ varām /
nājāpakṣigaṇairjuṣṭāṃ tāpasairupaśobhitām //

------------------------ /
kadambaiḥ saptaparṇaiśca kaśmaryāmalakairvṛtām //

-----mahāśākhaiḥ plakṣairaudumbarairapi /
----- aśvatthaiḥ khadirairvṛtām //

-------- sañchannāmaśvakarṇaiśca śobhitām /
būtaiḥ puṇḍrakapatraiśca kadalīvanasaṃvṛtām //

cakravākagaṇaiḥ kīrṇaṃ plavaiśca jalavāyasaiḥ /
samudrakākaiḥ krauñcaiśca nāditāṃ jalakukkuṭaiḥ //

evaṃ khagaiśca bahubhiḥ saṅghuṣṭāṃ jalavāsibhiḥ /
āśramairbahubhiḥ saktāṃ caityavṛkṣaiśca śobhitām //

śobhitāṃ brāhmaṇaiḥ śubhrairvedavedāṅgapāragaiḥ /
kvacittīraruhairvṛkṣairmālābhiriva śobhitām //

kvacitsupuṣpitairvṛkṣaiḥ kvacitsaugandhikotpalaiḥ /
kahlārakumudotphullaiḥ kamalairupaśobhitām //

kāverīṃ tādṛśīṃ dṛṣṭvā prītimānpāṇḍavastadā /
asmadrāṣṭre yathā gaṅgā kāverī ca tathā śubhā //

sahadevastu tāṃ tīrtvā nadīmanucaraiḥ saha /
dakṣiṇaṃ tīrabhāsādya gamanāyopacakrame //

āgataṃ pāṇḍavaṃ tatra śrutvā viṣayavāsinaḥ /
darśanārthaṃ yayuste tu kautūhalasamanvitāḥ //

dramiḍāḥ puruṣā rājansriyacaśca priyadarśanāḥ /
gatvā pāṇḍusutaṃ tatra dadṛśuste mudā'nvitāḥ //

sukumāraṃ viśālākṣaṃ vrajantaṃ tridaśopamam /
darśanīyatamaṃ loke netrairanimiṣairiva //

āścaryabhūtaṃ dadṛśurdramiḍāste samāgatāḥ /
mahāsenopamaṃ dṛṣṭvā pūjāṃ cakruśca tasya vai //

ratnaiśca vividhairiṣṭairbhogairanyaiśca sammataiḥ /
gatimaṅgalayuktārbhiḥ stuvanto nakulānujam //

sahadevastu tāndṛṣṭvā dramilānāgatānmudā /
visṛjya tānmahābāhuḥ prasthito dakṣiṇāṃ diśam //

dūtena tarasā colaṃ vijitya dramiḍeśvaram /
tato ratnānyupādāya pāṇḍasya viṣayaṃ yayau //

darśane sahadevasya na ca tṛptā narāḥ pare /
gacchantamanugacchantaḥ prāptāḥ kautūhalānvitāḥ //

tato mādrīsutoṃ rājanmṛgasaṅghānvilokayan /
gajānvanacarānanyānvyāghrānkuṣṇamṛgānbahūn //

śukānmayūrāndṛṣṭvā tu gṛdhrānāraṇyakukkuṭān /
tato deśaṃ samāsādya śvaśurasya mahīpateḥ //

preṣayāmāsa mādreyo dūtānpāṇḍyāya vai tadā /
pratijagrāha tasyājñāṃ samprītyā malayadhvajaḥ //

bhāryā rūpavatī jiṣṇoḥ pāṇḍyasya tanayā śubhā /
citrāṅgadeti vikhyātā dramiḍī yoṣitāṃ varā //

āgataṃ sahadevaṃ tu sā śrutvā'ntaḥ pure pituḥ /
preṣayāmāsa samprītyā pūjāratnaṃ ca vai bahu //

pāṇḍyo'pi bahuratnāni dūtaiḥ saha mumoca ha /
maṇimuktāpravālāni sahadevāya kīrtimān //

tāṃ dṛṣṭvā'pratimāṃ pūjāṃ pāṇḍavo'pi mudā nṛpa /
bhrātuḥ putre bahūnratnāndatvā vai babhrūvāhane //

pāṇḍyaṃ dramiḍarājānaṃ śvaśuraṃ malayadhvajam /
sa dūtaistaṃ vaśe kṛtvā maṇalūreśvaraṃ tadā //

tato ratnānyupādāya dramiḍairāvṛto yayau /
agastyasyālayaṃ divyaṃ devalokasamaṃ girim //

sa taṃ pradakṣimaṃ kṛtvā malayaṃ bharatarṣabha /
laṅghayitvā tu mādreyastāmrapaṇīṃ nadīṃ śubhām //

prasannasalilāṃ divyāṃ suśītāṃ ca manoharām /
samudratīramāsādya nyaviśatpāṇḍunandanaḥ //