Mahabharata · Chapter 2.2

uṣitvā khāṇḍavaprasthe sukhavāsaṃ janārdanaḥ /
pārthaiḥ prītisamāyuktaiḥ pūjanārho'bhipūjitaḥ //

gamanāya matiṃ cakre piturdarśanalālasaḥ /
dharmarājamathāmantrya pṛthāṃ ca pṛthulocanaḥ //

vavande caraṇau mūrdhnā jagadvandyaḥ pitṛṣvasuḥ /
sa tayā mūrdhnyupāghrātaḥ pariṣvaktaśca keśavaḥ //

dadarśānantaraṃ kṛṣṇo bhaginīṃ svāṃ mahāyaśāḥ /
tāmupetya hṛṣīkeśaḥ prītyā bāṣpasamanvitaḥ //

arthyaṃ tathyaṃ hitaṃ vākyaṃ laghu yuktamanuttaram /
uvāca bhagavānbhadrāṃ subhadrāṃ bhadrabhāṣiṇīm //

tayā svajanagāmīni śrāvito vacanāni saḥ /
sampūjitaścāpyasakṛcchirasā cābhivāditaḥ //

tāmanujñāya vārṣṇeyaḥ pratinandya ca bhāminīm /
dadarśānantaraṃ kṛṣṇāṃ dhaumyaṃ cāpi janārdanaḥ //

vavande ca yathānyāyaṃ dhaumyaṃ puruṣasattamaḥ /
draupadīṃ sāntvayitvā ca subhadrāṃ paridāya ca //

bhrātṛnabhyagamadvidvānpārthena sahito balī /
bhrātṛbhiḥ pañcabhiḥ kṛṣṇo vṛtaḥ śakra ivāmaraiḥ //

yātrākālasya yogyāni karmāṇi garuḍadhvajaḥ /
kartukāmaḥ śucirbhūtvā snātavānsamalaṅkṛtaḥ //

arcayāmāsa devāṃśca dvijāṃśca yadupuṅgavaḥ /
mālyajāpyanamaskārairgandhairuccāvacairapi //

sa kṛtvā sarvakāryāṇi pratasthe tasthupāṃ varaḥ /
upetya sa yaduśreṣṭho bāhyakakṣādvinirgataḥ //

svasti vācyārhato viprāndadhipātraphalākṣataiḥ /
vasu pradāya ca tataḥ pradakṣiṇamathākarot //

kāñcanaṃ rathamāsthāya tārkṣyaketanamāśugam /
gadācakrāsiśārṅgādyairāyudhairāvṛtaṃ śubham //

sutithāvatha nakṣatre muhūrte ca guṇānvite /
prayayau puṇḍarīkākṣaḥ śaibyasugrīvavāhanaḥ //

anvāruroha cāpyenaṃ premṇā rājā yudhiṣṭhiraḥ /
apāsya cāsya yantāraṃ dārukaṃ yantṛsattamam //

abhīṣūnsamprajagrāha svayaṃ kurupatistadā /
upāruhyārjunaścā'pi cāmaravyajanaṃ sitam //

rukmadaṇḍaṃ bṛhadbāhurvidudhāva pradakṣiṇam /
tathaiva bhīmaseno'pi rathamāruhya vīryavān //

chatraṃ śataśalākaṃ ca divyamālyopaśobhitam / vaiḍūryamaṇidaṇḍaṃ ca cāmīkaravibhūṣitam /

dadhāra tarasā bhīmaḥ mucchatraṃ śārṅgadhanvane /
bhīmasenārjunau cāpi yamāvariniṣūdanau //

pṛṣṭhato'nuyayuḥ kṛṣṇamṛtvikpaurajanairvṛtā /
sa tathā bhrātṛbhiḥ sarvaiḥ keśavaḥ paravīrahā //

anvīyamānaḥ śuśubhe śiṣyairiva guruḥ priyaiḥ /
abhimanyuṃ ca saubhadraṃ vṛddhaiḥ parivṛtastathā //

rathamāropya niryāto dhaumyo brāhmaṇapuṅgavaḥ / indraprasthamatikramya krośamātraṃ mahādyutiḥ /
pārthamāmantrya govindaḥ pariṣvajya supīḍitam //

yudhiṣṭharaṃ pūjayitvā bhīmasenaṃ yamau tathā /
pariṣvakto bhṛśaṃ taistu yamābhyāmabhivāditaḥ //

yojanārdhamatho gatvā kṛṣṇaḥ parapurañjayaḥ /
yudhiṣṭhiraṃ samāmantrya nivartasveti bhārata //

tato'bhivādya govindaḥ pādau jagrāha dharmavit /
utthāpya dharmarājastu mūrdhnyupāghrāya keśavam //

pāṇḍavo yādavaśreṣṭhaṃ kṛṣṇaṃ kamalalocanam /
gamyatāmityanujñāpya dharmarājo yudhiṣṭhiraḥ //

tatastaiḥ saṃvidaṃ kṛtvā yathāvanmadhusūdanaḥ /
nivartya ca tathā kṛcchrātpāṇḍavānsapadānugān //

svāṃ purīṃ prayayau hṛṣṭo yathā śakro'marāvatīm //
locanairanujagmuste tamādṛṣṭipathāttadā //

manobhiranujagmuste kṛṣṇaṃ prītisamanvayāt /
atṛptamanasāmeva teṣāṃ keśavadarśane //

kṣipramantardadhe śauriścakṣuṣāṃ priyadarśanaḥ /
akāmā eva pārthāste govindagamānasāḥ //

nivṛtyopayayustūrṇaṃ svaṃ puraṃ puruṣarṣabhāḥ /
syandanenātha kṛṣṇo'pi tvaritaṃ dvārakāmagāt //

sātvatena ca vīreṇa pṛṣṭhato yāyinā tadā / dārukeṇa ca sūtena sahito devakīsutaḥ /
sa gato dvārakāṃ viṣṇurgarutmāniva vegavān //
vaiśampāyana uvāca /

nivṛtya dharmarājastu saha bhrātṛbhiracyutaḥ /
suhṛtparivṛto rājā praviveśa purottamam //

visṛjya suhṛdaḥ sarvānbhrātṝnputrāṃśca dharmarāṭ /
mumoda puruṣavyāghro draupadyā sahito nṛpa //

keśavopi mudā yuktaḥ praviveśa purottamam /
pūjyamāno yaduśreṣṭhairugrasenamukhaistathā //

āhukaṃ pitaraṃ vṛddhaṃ mātaraṃ ca yaśasvinīm /
abhivādya balaṃ caiva sthitaḥ kamalalocanaḥ //

pradyumnasāmbaniśaṭhāṃścarudeṣṇaṃ gadaṃ tathā /
aniruddhaṃ ca bhānuṃ ca pariṣvajya janārdanaḥ //

sa vṛddhairabhyanujñāto rukmiṇyā bhavanaṃ yayau /
sa tatra bhavane divye pramumoda sukhī sukham //

etasminnantare rājanmayo daityādhipastadā /
vidhivatkalpayāmāsa sabhāṃ dharmasutāya vai //