Mahabharata · Chapter 2.24

tatastaṃ niścitātmānaṃ yuddhāya yadunandanaḥ /
uvāca vāgmī rājānaṃ jarāsandhamadhokṣajaḥ //

trayāṇāṃ kena te rājanyoddhumutsahate manaḥ /
asmadanyatameneha sajjībhavatu ko yudhi //

evamuktaḥ sa nṛpatiryuddhaṃ vavre mahādyutiḥ /
jarāsandhastato rājā bhīmasenena māgadhaḥ //

dhārayantaṃ gadāṃ divyāṃ balaṃ śrutvā ca nirvṛtaḥ /
arjuna vāsudevaṃ ca vajaryitvā sa māgadhaḥ //

matvā devaṃ gopa iti bālo'rjuna iti sma ha /
ādāya rojanāṃ mālyaṃ maṅgalyānyaparāṇi ca //

dhārayannagadānmukhyānnirvṛtīrvedanāni ca /
upatasthe jarāsandhaṃ yuyutsuṃ vai purohitaḥ //

kṛtasvastyayano rājā brāhmaṇena yaśasvinā /
samanahyajjarāsandhaḥ kṣātraṃ dharmamanusmaran //

avamucya kirīṭaṃ sa keśānsamanumṛjya ca /
udatiṣṭhajjarāsandho velātiga ivārṇavaḥ //

uvāca matimānrājā bhīmaṃ bhīmaparākramaḥ /
bhīma yotsye tvayā sārdhaṃ śreyasā nirjitaṃ varam //

evamuktvā jarāsandho bhīmasenamarindamaḥ /
pratyudyayau mahātejāḥ śakraṃ bala ivāsuraḥ //

tataḥ sammantrya kṛṣṇena kṛtasvastyayano balī /
bhīmaseno jarāsandhamāsasāda yuyutsayā //

tatastau naraśārdūlau bāhuśastrau samīyatuḥ /
vīrau paramasaṃhṛṣṭāvanyonyajayakāṅkṣiṇau //

karagrahaṇapūrvaṃ tu kṛtvā pādābhivandanam /
kakṣaiḥ kakṣāṃ vidhunvānāvāsphoṭaṃ tatra cakratuḥ //

skandhe dorbhyāṃ samāhatya nihatya ca muhurmuhuḥ / aṅgamaṅgaiḥ samāśliṣya punarāsphālanaṃ ca cakratuḥ /

citrahastādikaṃ kṛtvā sasphuliṅgena cāśanim //
galagaṇḍābhighātena sasphuliṅgena cāśanim //

bāhupāśādikaṃ kṛtvā pādāhataśirāvubhau /
urohastaṃ tataścakre pūrṇakumbhau prayujya tau //

karasampīḍanaṃ kṛtvā garjantau vāraṇāviva /
nardantau meghasaṅkāśau bāhupraharaṇāvubhau //

talenāhanyamānau tu anyonyaṃ kṛtavīkṣaṇau /
siṃhāviva susanṅkruddhāvākṛṣyākṛṣya yudhyatām //

aṅgenāṅgaṃ samāpīḍya bāhubhyāmubhayorapi /
āvṛtya bāhubhiścāpi udaraṃ ca pracakratuḥ //

ubhau kaṭyāṃ supārśve tu takṣavantau ca śikṣitau /
adho hastaṃ svakaṇṭhe tūdarasyorasi cākṣipat //

sarvātikrāntamaryādaṃ pṛṣṭhabhaṅgaṃ ca cakratuḥ /
sampūrṇamūrcchāṃ bāhubhyāṃ pūrṇakumbhaṃ pracakratuḥ //

tṛṇapīḍaṃ yathākāmaṃ pūrṇayogaṃ samuṣṭikam /
evamādīni yuddhāni prakurvantau parasparam //

tayoryuddhaṃ tato draṣṭuṃ sametāḥ puravāsināḥ /
brāhmaṇā vaṇijaścaiva kṣatriyāśca sahasraśaḥ //

śūdrāśca naraśārdūla striyo vṛddhāśca sarvaśaḥ /
nirantaramabhūttatra janaughairabhisaṃvṛtam //

tayoratha bhujāghātānnigrahapragrahāttathā /
āsītsubhīmasampāto vajraparvatayoriva //

ubhau paramasaṃhṛṣṭau balena balināṃ varau /
anyonyasyāntaraṃ prepsū parasparajayaiṣiṇau //

śirobhiriva tau meṣau vṛkṣairiva niśācarau /
padairiva śubhāvaśvau tuṇḍābhyāṃ tittirī iva //

tadbhīmamutsārya janaṃ yuddhamāsīdupaplave /
balinoḥ saṃyuge rājanvṛtravāsavayoriva //

prakarṣaṇākarṣaṇābhyāmanukarṣavikarṣaṇaiḥ /
ācakarṣaturanyonyaṃ jānubhiścāvajaghnatuḥ //

tataḥ śabdena mahatā bhartsayantau parasparam /
pāṣāṇasaṅghātanibhaiḥ prahārairabhijaghnatuḥ //

tato bhīmaṃ jarāsandho jaghānorasi muṣṭinā /
bhīmoṣi taṃ jarāsandhaṃ vakṣasyabhijaghāna ha //

vyūḍhoraskau dīrghabhujau niyuddhakuśalāvubhau /
bāhubhiḥ samasajjotāmāyasaiḥ parighairiva //

kārtikasya tu māsasya pravṛttaṃ prathame'hani / tadā tadyuddhamabhavaddināni daśa pañca ca /
anāhāraṃ divārātramaviśrāntamavartata //

tadvṛttaṃ tu trayodaśyāṃ samavetaṃ mahātmanoḥ /
caturdaśyāṃ niśāyāṃ tu nivṛtto māgadhaḥ klamāt //

taṃ rājānaṃ tathā klāntaṃ dṛṣṭvā rājañjanārdanaḥ /
uvāca bhīmakarmāṇaṃ bhīmaṃ sambodhayanniva //

klāntaḥ śatrurhi kaunteya śakyaḥ pīḍayituṃ raṇe /
pīḍyamāno hi kārtsnyena jahyājjīvitamātmanaḥ //

tasmātte'dyaiva kaunteya pīḍanīyo janādhipaḥ /
samametena yudhyasva bāhubhyāṃ bharatarṣabha //
vaiśampāyana uvāca /

evamuktaḥsa kṛṣṇena pāṇḍavaḥ paravīrahā /
jarāsandasya tadrandhraṃ jñātvā cakre matiṃ vadhe //

tatastamajitaṃ jetuṃ jarāsandaṃ vṛkodaraḥ /
saṃrambhādbalināṃ śreṣṭho jagrāha kurunandanaḥ //