Mahabharata · Chapter 2.23

kimarthaṃ vairiṇāvāstāmubhau tau kṛṣṇamāgadhau /
kathaṃ ca nirjitaḥ saṅkhye jarāsandhena mādhavaḥ //

kaśca kaṃso māgadhasya yasya hetoḥ sa vairavān /
etadācakṣva me sarvaṃ vaiśampāyana tatvataḥ //
vaiśampāyana uvāca //

yādavānāmanvavāye vasudevo mahāmatiḥ /
udapadyata vārṣṇeyo hyugrasenasya mantrabhṛt //

ugrasenasya kaṃsastu babhūva balavānsutaḥ /
jyeṣṭho bahūnāṃ kauravya sarvaśastraviśāradaḥ //

jarāsandhasya duhitā tasya bhāryā'tiviśrutā /
rājyaśuklena dattā sā jarāsandhena dhīmatā //

tadarthamugrasenasya madhurāyāṃ sutastadā /
abhiṣiktastadā'mātyaiḥ sa vai tīvraparākramaḥ //

aiśvaryabalamattastu sa tadā balamohitaḥ /
nigṛhya pitaraṃ bhuṅkte tadrājyaṃ mantribhiḥ saha //

vasudevasya tatkṛtyaṃ na śṛṇoti sa mandadhīḥ /
ta tena saha tadrājyaṃ dharmataḥ paryapālayat //

prītimānsa tu daityendro vasudevasya devakīm /
uvāha bhāryā sa tadā duhitā devakasya yā //

tasyāmudvāhyamānāyāṃ rathena janamejaya /
upāruroha vārṣṇeyaṃ kaṃso bhūmipatistadā //

tato'ntarikṣe vāgāsīddevadūtasya kasyacit /
vasudevaśca śuśrāva tāṃ vācaṃ pārthivaśca saḥ //

yāmetāṃ vahamāno'dya kaṃsodvahasi devakīm /
asyā yaścāṣṭamo garbhaḥ sa te mṛtyurbhaviṣyati //

so'vatīrya tato rājā khaḍgamuddhṛtya nirmalam /
iyeṣa tasyā mūrdhānaṃ chettuṃ paramadurmatiḥ //

sāntvayansa tadā kaṃsaṃ hasankodhavaśānugam /
rājannanunayāmāsa vasudevo mahāmatiḥ //

ahiṃsyāṃ pramadāmāhuḥ sarvadharmeṣu pārthiva /
akasmādabalāṃ nārīṃ hantāsīmāmanāgasīm //

yacca te'tra bhayaṃ rājañśakyate bādhituṃ tvayā /
iyaṃ śakyā pālayituṃ samayaṃ caiva rakṣitum //

asyāstvamaṣṭamaṃ garbhaṃ jātamātraṃ mahīpate /
vidhvaṃsaya tadā prāptamevaṃ parihṛtaṃ bhavet //

evaṃ sa rājā kathito vasudevena bhārata /
tasya tadvacanaṃ cake śūrasenapatistadā //

tatastasyāṃ sambabhūvuḥ kumārāḥ sūryavarcasaḥ /
jātāñcātāṃstu tānsarvāñjaghāna madhureśvaraḥ //

atha tasyāṃ samabhavadbaladevastu sattamaḥ /
yāmyatā māyayā taṃ tu yamo rājā viśāmpate //

devakyā garbhamatulaṃ rohiṇyā jaṭhare'kṣipat /
ākṛṣya karṣaṇātsamyaksaṅkarṣaṇaṃ iti smṛtaḥ //

balaśreṣṭhatayā tasya baladeva iti smṛtaḥ /
punastasyāṃ samabhavadaṣṭamo madhumūdanaḥ //

tasya garbhasya rakṣāṃ tu sa cakre'bhyadhikaṃ nṛpaḥ /
tataḥ kāle rakṣaṇārthaṃ vasudevasya tatvataḥ //

ugraḥ prayuktaḥ kaṃsena sacivaḥ krūrakarmakṛt //

jātamātraṃ vāsudevamathākṛṣya pitā tataḥ /
upajahre parikrītāṃ sutāṃ gopasya kasyacit //

amṛṣyamāṇastaṃ śabdaṃ devadūtasya pārthivaḥ /
vāsudevaṃ mahātmānamarpayāmāsa gokule //

vāsudevopi gopeṣu vavṛdhe'bjamivāmbhasi /
ajñāyamānaḥ kaṃsena gūḍho'gniriva dāruṣu //

vipracake tadā sarvānballavānmadhureśvaraḥ /
vardhamāno mahābāhustejobalasamanvitaḥ //

tataste kliśyamānāstu puṇḍarīkākṣamacyutam /
bhayena kāmādapare gaṇaśaḥ paryavārayan //

sa tu labdhvā balaṃ rājannugrasenasya sammataḥ /
vasudevātmajaḥ sarvairbhrātṛbhiḥ sahitaṃ punaḥ //

nirjitya yudhi bhojendraṃ hatvā kaṃsaṃ mahābalaḥ /
abhyaṣiñcattato rājya ugrasenaṃ viśāmpate //

tataḥ śrutvā jarāsandho mādhavena hataṃ yudhi /
śūrasenādhipaṃ cakre kaṃsaputraṃ tadā nṛpa //

sasainyaṃ mahadutthāpya vāsudevaṃ tadā nṛpa /
abhyaṣiñcatsutaṃ tatra sutāyā janamejaya //

ugrasenaṃ ca vṛṣṇīṃśca mahābalasamanvitaḥ /
sa tatra viprakurute jarāsandhaḥ pratāpavān //

etadvairaṃ kauraveya jarāsandhasya mādhave /
āśāsitārthe rājendra saṃrurodha vinirjitān //

pārthivaistairnṛpatibhiryakṣyamāṇaḥ samṛddhimān /
devaśreṣṭhaṃ mahādevaṃ kṛttivāsaṃ triyambakam //

etatsarvaṃ yathāvṛttaṃ kathitaṃ bharatarṣabha /
yathā tu sa hato rājā bhīmasenena tacchṛṇu //