Mahabharata · Chapter 2.20

patitau haṃsaḍibhikau kaṃsaśca sagaṇo hataḥ /
jarāsandhasya nidhane kālo'yaṃ samupāgataḥ //

na śakyo'sau raṇe jetuṃ sarvairapi surāsuraiḥ /
prāṇayuddhena jetavyaḥ sa ityupalabhāmahe //

mayi nītirbalaṃ bhīme rakṣitā cāvayorjayaḥ /
māgadhaṃ sādhayiṣyāma iṣṭiṃ traya ivāgnayaḥ //

tribhirāsādito'smābhirvijane sa narādhipaḥ /
na sandeho yathā yuddhamekenāpyupayāsyati //

avamānācca lobhācca bāhuvīryācca darpitaḥ /
bhīmasenena yuddhāya dhruvamapyupayāsyati //

alaṃ tasya mahābāhurbhīmaseno mahābalaḥ /
lokasya samudīrṇasya nidhanāyāntako yathā //

yadi bhīmabalaṃ vetsi yadi te pratyayo mayi /
bhīmasenārjunau śīghraṃ nyāsabhūtau prayaccha me //
vaiśampāyana uvāca //

evamukto bhagavatā pratyuvāca yudhiṣṭhiraḥ /
bhīmārjunau samālokya samprahṛṣṭamukhau sthitau //
yudhiṣṭhara uvāca /

acyutācyuta māmaivaṃ vyāharāmitrakarśana /
pāṇḍavānāṃ bhavānnātho bhavantaṃ cāśritā vayam //

yathā vadasi govinda sarvaṃ tadupapadyate /
nahi tvamagratasteṣāṃ yeṣāṃ lakṣmīḥ parāṅmukhī //

yeṣāmabhimukhī lakṣmīsteṣāṃ kṛṣṇa tvamagrataḥ / nihataśca jarāsandho mokṣitāśca mahīkṣitaḥ / 2-2--11c rājasūyaśca me labdho nideśe tva tiṣṭhataḥ //

kṣiprameva yathā tvetatkāryaṃ samupapadyate / apramatto jagannātha tathā kuru samupapadyate /

tribhirbhavadbhirhi vinā nāhaṃ jīvitumutsahe /
dharmakāmārtharahito rogārta iva duḥkhitaḥ //

na śauriṇā vinā pārtho na śauriḥ pāṇḍavaṃ vinā /
nājeyostyanayo'rloke kṛṣṇayoriti me matiḥ //

ayaṃ ca balināṃ śreṣṭhaḥ śrīmānapi vṛkodaraḥ /
yuvābhyāṃ sahito vīra kiṃ na kuryānmahāyaśāḥ //

supraṇīto balaugho hi kurute kāryamuttamam /
andhaṃ balaṃ jaḍaṃ prāhuḥ praṇetavyaṃ vicakṣaṇaiḥ //

yato hi nimnaṃ bhavati nayanti hi tato jalam /
yataśchidraṃ tataścāpi nayante dhīvarā jalam //

tasmānnayavidhānajñaṃ puruṣaṃ lokaviśrutam /
vayamāśritya govindaṃ yatāmaḥ kāryasiddhaye //

evaṃ prajñānayabalaṃ kriyopāyasamanvitam /
puraskṛrvīta kāryeṣu kṛṣṇakāryārthasiddhaye //

evameva yaduśreṣṭha yāvatkāryāthisiddhaye / arjunaḥ kṛṣṇamanvetu bhīmo'nvetu dhanañjayam /
nayo jayo balaṃ caiva vikrame siddhimeṣyati //
vaiśampāyana uvāca /

evamuktāstataḥ sarve bhrātaro vipulaujasaḥ /
vārṣṇeyaḥ pāṇḍaveyau ca pratasthurmāgadhaṃ prati //

varcasvināṃ brāhmaṇānāṃ snātakānāṃ paricchadaiḥ /
ācchādya suhṛdāṃ vākyairmanojñairabhinanditāḥ //

mādhavaḥ pāṇḍaveyau ca pratasthurvratadhāriṇaḥ / amarṣādabhitaptānāṃ jñātyarthaṃ mukhyatejasām /
ravisomāgnivapuṣāṃ dīptamāsīttadā vapuḥ //

itaṃ mene jarāsandhaṃ dṛṣṭvā bhīmapurogamau /
ekakāryasamudyantau kṛṣṇau yuddhe'parājitau //

īśau hitau mahātmānau sarvakāryapravartinau /
dharmakāmārthalokānāṃ kāryāṇāṃ ca pravartakau //

kurubhyaḥ prasthitāste tu madhyena kurujāṅgalam /
ramyaṃ padmasaro gatvā kālakūḍamatītya ca //

gaṇḍakīṃ ca mahāśoṇaṃ sadānīrāṃ tathaiva ca /
ekaparvatake nadyaḥ krameṇaityāvrajanta te //

uttīrya sarayūṃ ramyāṃ dṛṣṭvā pūrvāṃśca kosalān /
atītya jagmurmithilāṃ mālāṃ carmaṇvatīṃ nadīm //

atītya gaṅgāṃ śoṇaṃ ca trayaste prāṅmukhāstadā /
kuśacīracchadā jagmurmāgadhaṃ kṣetramacyutāḥ //

te śaśvadgodhanākīrṇamambumantaṃ śubhadrumam /
gorathaṃ girimāsādya dadṛśurmāgadhaṃ puram //