Mahabharata · Chapter 2.21

eṣa pārtha mahānbhāti paśumānnityamambumān /
nirāmayaḥ suveśmāḍhyo niveśo māgadhaḥ śubhaḥ //

vaihāro vipulaḥ śailo vārāho vṛṣabhastathā /
tathā ṛṣigiristāta śubhāścaityakapañcamāḥ //

ete pañcamahāśṛṅgāḥ parvatāḥ śītaladrumāḥ /
rakṣantīvābhisaṃhatya saṃhatāṅgā girivrajam //

puṣpaveṣṭitaśākhāgrairgandhavadbhirmanoharaiḥ /
nigūḍhā iva lodhrāṇāṃ vanaiḥ kāmijanapriyaiḥ //

yatra dīrghatamā nāma ṛṣiḥ paramantritaḥ / śūdrāyāṃ gautamo yatra mahātmā saṃśitavrataḥ /
auśīnaryāmajanayatkākṣīvādyānsutānmuniḥ //

gautamaḥ praṇayāttasmādyathā'sau tatra sadmani / bhajate māgadhaṃ vaṃśaṃ sa nṛpāṇāmanugrahaḥ /

aṅgavaṅgādayaścaiva rājānaḥ sumahābalāḥ /
gautamakṣayamabhyetya ramante sma purārjuna //

vanarājīstu paśyemāḥ piplānāṃ manoramāḥ /
loghrāṇāṃ ca śubhāḥ pārtha gautamaukaḥ samīpajāḥ //

arbudaḥ śakravāpī ca pannagau śatrutāpanau /
svastikasyālayaścātra maṇināgasya cottamaḥ //

apārihāryā meghānāṃ māgadhā manunā kṛtāḥ /
kauśiko maṇimāṃścaiva cakrāte cāpyanugraham //

pāṇḍare vipule caiva tathā vārāhake'pi ca /
caityake caja giriśreṣṭhe mādaṅge ca śiloccaye //

eteṣu parvatendreṣu sarvasiddhasamālayāḥ /
yatīnāmāśramāścaiva munīnāṃ ca mahātmanām //

vṛṣabhasya tamālasya mahāvīryasya vai tathā /
gandharvarakṣasāṃ caiva nāgānāṃ ca tathā'layāḥ //

kakṣīvatastapovīryāttapodā iti viśrutāḥ / puṇyatīrthāśca te sarve siddhānāṃ caiva kīrtitāḥ /
maṇeśca darśanādeva bhadraṃ śivamavāpnuyāt //

evaṃ prāpya puraṃ ramyaṃ durādharpaṃ samantataḥ //
arthasiddhiṃ tvanupamāṃ jarāsandho'bhimanyate //

vayamāsādane tasya darpamadya harema hi /
vaiśampāyana uvāca /
evamuktvā tataḥ sarve bhrātaro vipulaujasaḥ //

vārṣṇeyaḥ pāṇḍavau caiva pratasthurmāgadhaṃ puram /
hṛṣṭapuṣṭajanopetaṃ cāturvarṇyasamākulam //

sphītotsavamanādhṛṣyamāseduśca girivrajatam /
tato dvāramanāsādya purasya girimucchritam //

bārhadrathaiḥ pūjyamānaṃ tathā nagaravāsibhiḥ /
māgadhānāṃ tu ruciraṃ caityakāntaramādravan //

yatra māṃsādamṛṣabhamāsasāda bṛhadrathaḥ /
taṃ hatvā māsatālābhistisro bherīkārayat //

svapure sthāpayāmāsa tena cānahya carmaṇā /
yatra tāḥ prāṇadanbheryo divyapuṣpāvacūrṇitāḥ //

bhaṅktvā bherītrayaṃ te'pi caityaprākāramādravan /
dvārato'bhimukhāḥ sarve yayurnānāyudhāstadhā //

māgadhānāṃ suruciraṃ caityakaṃ taṃ samādravan /
śirasīva samāghnanto jarāsandhaṃ jighāṃsvaḥ //

sthiraṃ suvipulaṃ śṛṅgaṃ sumahattatpurātanam /
arcitaṃ gandhamālyaiśca satataṃ supratiṣṭhitam //

vipulairbāhubhirvīraste'bhihatyābhyapātayan /
tataste māgadhaṃ hṛṣṭāḥ puraṃ praviviśustadā //

etasminneva kāle tu brāhmaṇā vedapāragāḥ /
dṛṣṭvā tu durnimittāni jarāsandhamadarśayan //

paryugnyakurvaṃśca nṛpaṃ dviradasthaṃ purohitāḥ / tatastacchāntaye rājā jarāsandhaḥ pratāpavān /
dīkṣito niyamastho'sāvupavāsaparo'bhavat //

snātakavratinaste tu bāhuśastrā nirāyudhāḥ /
yuyutsavaḥ praviviśurjarāsandhena bhārata //

bhakṣyamālyāpaṇānāṃ ca dadṛśuḥ śriyamuttamām /
sphītāṃ sarvaguṇopetāṃ sarvakāmasamṛddhinām //

tāṃ tu dṛṣṭvā samṛddhiṃ te vīthyāṃ tasyāṃ narottamāḥ / rājamārgeṇa gacchantaḥ kṛṣṇabhīmadhanañjayāḥ /
balādgṛhītvā mālyāni mālākārānmahābalāḥ //

karpūraśṛṅgaṃ koṣṭhaṃ ca saphalaṃ cāntarāpaṇe /
vaiśyādbalādgṛhītvā te vihṛtya ca mahārathāḥ //

virāgavasanāḥ sarve sragviṇo mṛṣṭakuṇḍalāḥ /
niveśanamathājagmurjarāsandhasya dhīmataḥ //

govāsamiva vīkṣantaḥ siṃhā haimavatā yathā /
śālastambhanibhāsteṣāṃ candanāgururūṣitāḥ //

aśobhanta mahārāja bāhavo yuddhaśālinām /
tāndṛṣṭvā dviradaprakhyāñśālaskandānivodgatān //

vyūḍhoraskānmāgadhānāṃ vismayaḥ samapadyata /
advāreṇābhyavaskandya viviśurmāgadhālayam //

te tvatītya janākīrṇāḥ kakṣāstisro nararṣabhāḥ /
ahaṅkāreṇa rājānamupatasthurgatavyathāḥ //

bho śabdenaiva rājānamucuste tu mahārathāḥ / tānpādyamadhuparkārhāngavārhānsatkṛtiṃ gatān /
pratyutthāya jarāsandha upatasthe yathāvidhi //

uvāca caitānrājā'sau svāgataṃ vostviti prabhuḥ /
maunamāsīttadā pārthabhīmayorjanamejaya //

teṣāṃ madhye mahābuddhiḥ kṛṣṇo vacanamabravīt /
vaktuṃ nāyāti rājendra etayorniyamasthayoḥ //

arvāṅniśīthātparatastvāyā sārdhaṃ vadiṣyataḥ / yajñāgāre sthāpayitvā rājā rājagṛhaṃ vadiṣyataḥ /

tato'rdharātre samprāpte yāto yatra sthitā dvijāḥ /
tasya hyetadvrataṃ rājanbabhūva bhuvi viśrutam //

snātakānbrāhmaṇānprāptāñśrutvā sa samitiñjayaḥ /
apyardharātre nṛpatiḥ pratyudgacchati bhārata //

tāṃstvapūrveṇa veṣeṇa dṛṣṭvā sa nṛpasattamaḥ /
upatasthe jarāndho vismitaścābhavattadā //

te tu dṛṣṭvaiva rājānaṃ jarāsandhaṃ nararṣabhāḥ /
idamūcuramitraghnāḥ sarve bharatasattama //

svastyastu kuśalaṃ rājanniti tatra vyavasthitāḥ /
taṃ nṛpaṃ nṛpaśārdūla prekṣamāṇāḥ parasparam //

tānabravīñjarāsandhastathā pāṇḍavayādavān /
āsyatāmiti rājendra brāhmaṇacchadmasaṃvṛtān //

athopaviviśuḥ sarve trayaste puruṣarṣabhāḥ /
sampradīptāstrayo lakṣmyā mahādhvara ivāgnayaḥ //

tānuvāca jarāsandhaḥ satyasandho narādhipaḥ /
vigarhamāṇaḥ kauravya veṣagrahaṇavaikṛtān //
na snātakavratā viprā vahirmālyānulepanāḥ //

bhavantīti nṛloke'sminviditaṃ mama sarvaśaḥ /
ke yūyaṃ puṣpavantaśca bhujairjyākṛtalakṣaṇaiḥ //

bibhrataḥ kṣātramojaśca brāhmaṇyaṃ pratijānatha /
evaṃ virāgavasanā bahirmālyānulepanāḥ //

kṣatriyā eva loke'sminviditā mama sarvaśaḥ //
satyaṃ vadata ke yūyaṃ satyaṃ rājasu śobhate //

caityakasya gireḥ śṛṅgaṃ bhittvā kimiha sadmani /
advāreṇa praviṣṭāḥ stha nirbhayā rājakilviṣāt //

vadadhvaṃ vāci vīryaṃ ca brāhmaṇasya viśeṣataḥ /
karma caitadviliṅgasthaṃ kiṃ vo'dya prasamīkṣitam //

evaṃ ca māmupāsthāya kasmācca vidhirnāhaṇām /
praṇītāṃ nānugṛhṇīta kāryaṃ kiṃ vā'smadāgame //
vaiśampāyana uvāca /

evamukte tataḥ kṛṣṇaḥ pratyuvāca mahāmanāḥ /
snigdhagamabhīrayā vācā vākyaṃ vākyaviśāradaḥ //
kṛṣṇa uvāca /

snātakānbrāhmaṇānrājanviddhyasmāṃstvaṃ narādhipa /
snātakavratino rājanbrāhmaṇāḥ kṣatriyā viśaḥ //

viśeṣaniyamāścaiṣāmaviśeṣāśca santyuta /
viśeṣavāṃśca satataṃ kṣatriyaḥ śriyamṛcchati //

puṣpavatsu dhruvā śrīśca puṣpavantastato vayam /
kṣatriyo bāhuvīryastu na tathā vākyavīryavān //
ampragalbhaṃ vacastasya tasmādbārhadratheritam //

svavīryaṃ kṣatriyāṇāṃ tu bāhvordhātā nyaveśayat /
taddidṛkṣasi cedrājandraṣṭāsyadya na saṃśayaṭaḥ //

advāreṇa rimporgehaṃ dvāreṇa suhṛdo gṛhān /
praviśanti narā dhīrā dvārāṇyetāni dharmataḥ //

kāryavanto gṛhānetya śatruto nārhaṇāṃ vayam /
pratigṛhṇīm tadvidvi etannaḥ śāśvataṃ vratam //