Mahabharata · Chapter 2.19

kasyacittvatha kālasya punareva mahātapāḥ /
magadheṣupajakrāma bhagavāṃścaṇḍakauśikaḥ //

tasyā'gamanasaṃhṛṣṭaḥ sāmātyaḥ sapuraḥ saraḥ /
sabhāryaḥ saha putreṇa nirjagāma bṛhadrathaḥ //

pādyārghyācamanīyaistamarcayāmāsa bhārata /
sa nṛpo rājyasahitaṃ putraṃ tasmai nyavedayat //

pratigṛhya ca tāṃ pūjāṃ pārthivādbhagavānṛṣiḥ /
uvāca māgadhaṃ rājanprahṛṣṭenāntarātmanā //

sarvametanmayā jñātaṃ rājandivyena cakṣuṣā /
putrastu śṛṇu rājendra yādṛśo'yaṃ bhaviṣyati //

asya rūpaṃ ca satvaṃ ca balamūrjitameva ca /
eṣa śriyā samuditaḥ putrastava na saṃśayaḥ //

prāpayiṣyati tatsarvaṃ vikrameṇa samanvitaḥ /
asya vīryavato vīryaṃ nānuyāsyanti pārthivāḥ //

patato vainateyasya gatimanye yathā khagāḥ /
vināśamupayāsyanti ye cāsya paripanthinaḥ //

devairapi visṛṣṭāni śastrāṇyasya mahīpate /
na rujaṃ janayiṣyanti gireriva nadīrayāḥ //

sarvamūrdhābhiṣiktānāmeva mūrdhni jvaliṣyati /
prabhāharo'yaṃ sarveṣāṃ jyotiṣāmiva bhāskaraḥ //

enamāsādya rājānaḥ samṛddhabalavāhanāḥ /
vināśamupayāsyanti śalabhā iva pāvakam //

eṣa śriyaḥ samuditāḥ sarvarājñāṃ grahīṣyati /
varṣāsvivodīrṇajalā nadīrnadanadīpatiḥ //

eṣa dhārayita samyakcāturvarṇyaṃ mahābalaḥ /
śubhāṃ śubhavatīṃ sphītāṃ sarvasasyadharāṃ dharām //

asyājñāvaśagāḥ sarve bhaviṣyanti narādhipāḥ /
sarvabhūtātmabhūtasya vāyoriva śarīriṇaḥ //

eṣa rudraṃ mahādevaṃ tripurāntakaraṃ haram /
sarvalokeṣvatibalaḥ sākṣāddrakṣyati māgadhaḥ //

evaṃ bruvanneva muniḥ svakāryamiva cintayan /
visarjayāmāsa nṛpaṃ bṛhadrathamathārihan //

praviśya nagarīṃ cāpi jñātisambandhibhirvṛtaḥ /
abhiṣicya jarāsandhaṃ magadhādhipatistadā //

bṛhadratho narapatiḥ parāṃ nirvṛtimāyayau / abhiṣikte jarāsandhe tadā rājā bṛhadrathaḥ /
patnīdvayenānugatastapovanacaro'bhavat //

tato vanasthe pitari mātṛbhyāṃ saha bhārata /
jarāsandhaḥ svavīryeṇa pārthivānakarodvaśe //

atha dīrghasya kālasya tapovanacaro nṛpaḥ /
sabhāryaḥ svargamagamattapastaptvā bṛhadrathaḥ //

jarāsandho'pi nṛpatiryathoktaṃ kauśikena tat /
varapradānamakhilaṃ prāpya rājyamapālayat //

hate caiva mayā kaṃse sahaṃsaḍibhike tadā / jarāsandhasya duhitā rodate pārśvataḥ pituḥ /
jāto vai vairanirbandho mayāsīttatra bhārata //

bhrāmayitvā śataguṇamekonaṃ yena bhārata /
gadā kṣiptā balavatā māgadhena girivrajāt //

tiṣṭhato mathurāyāṃ vai kutsnasyādbhutakarmaṇaḥ /
ekonayojanaśate sā papāta gadā śubhā //

dṛṣṭvā pauraistadā samyaggadā caiva niveditā /
gadāvasānaṃ tatkhyātaṃ mathurāyāḥ samīpataḥ //

tasyāstāṃ haṃsaḍibhikāvaśastranidhanāvubhau /
mantre matimatāṃ śreṣṭhau nītiśāstre viśāradau //

yau tau mayā te kathitau pūrvameva mahābalau /
trayastrayāṇāṃ lokānāṃ paryāptā iti me matiḥ //

evameṣa tadā vīra balibhiḥ kukurāndhakaiḥ /
vṛṣṇibhiśca mahārāja nītihetorupekṣitaḥ //