Mahabharata · Chapter 2.15

uktaṃ tvayā buddhimatā yannānyo vaktumarhati /
saṃśayānāṃ hi nirmoktā tvannānyo vidyate bhuvi //

gṛhe gṛhe hi rājānaḥ svasya svasya priyaṅkarāḥ / na ca sāmrājyamāptāste samrādaśabdo hi kṛcchrabhāk /

kathaṃ parānubhāvajñaḥ svaṃ praśaṃsitumarhati /
pareṇa samavetastu yaḥ praśasyaḥ sa pūjyate //

viśālā bahulā bhūmirbahuratnasamācitā /
dūraṃ gatvā vijānāti śreyo vṛṣṇikulodvaha //

śamameva paraṃ manye śamātkṣemaṃ bhavenmama /
ārambhe pārameṣṭhyaṃ tu na prāpyamiti me matiḥ //

evamete hi jānanti kule jātā manasvinaḥ / kaścitkadācideteṣāṃ bhavecchreṣṭho janārdana /

vayaṃ yaiva mahābhāga jarāsandhabhayāttadā /
śaṅkitāḥ sma mahābhāga dvaurātmyāttasya cānagha //

ahaṃ hi tava durdharṣa bhujavīryāśrayaḥ prabho /
nātmānaṃ balinaṃ manye tvayi tasmādviśaṅkite //

tvatsakāśācca rāmācca bhīmasenācca mādhava / arjunādvā mahābāho hantuṃ śakyo naveti vai /
evaṃ jānanhi vārṣṇeya vimṛśāmi punaḥ punaḥ //

tvaṃ me pramāṇabhūto'si sarvakāryeṣu keśava /
tacchrutvā cābravīdbhīmo vākyaṃ vākyaviśāradaḥ //
bhīma uvāca //

anārambhaparo rājā valmīka iva sīdati /
durbalaścānupāyena balinaṃ yo'dhitiṣṭhati //

atandritaśca prāyeṇa durbalo balinaṃ ripum /
jayetsamyakprayogeṇa nītyā'rthānātmano hitān //

kṛṣṇe nayo mayi balaṃ jayaḥ pārthe dhanañjaye /
māgadhaṃ sādhayiṣyāma iṣṭiṃ traya ivāgrayaḥ //

tvadbuddhibalamāśritya sarvaṃ prāpsyati dharmarāda /
jayo'smākaṃ hi govinda yeṣāṃ nātho bhavānsadā //
kṛṣṇa uvāca /

arthānārabhate bālo nānubandhamavekṣate /
tasmādariṃ na mṛṣyanti bālamarthaparāyaṇam //

jitvā jayyānyauvanāśviḥ pālanācca bhagīrathaḥ /
kārtavīryastapovīryādbalāttu bharato vibhuḥ //

ṛddhyā maruttastānpaśca samrājastvanuśuśruma /
sarvānvaṃśyānanumṛśannaite santi yuge yuge //

sāmrājyamicchataste tu sarvākāraṃ yudhiṣṭhira /
nigrāhyalakṣaṇaṃ prāptirdharmārthanayalakṣaṇaiḥ //

bārhadratho narāsandhastadviddhi bharatarṣabha /
na cainaṃ pratyatyuddhyanta kulānyekaśataṃ nṛpāḥ //

tasmādiha balādeva sāmrājyaṃ kurute hi saḥ //

ratnabhājo hi rājāno jarāsandhamupāsate /
na ca tuṣyati tenāpi bālyādanayamāsthitaḥ //

mūrdhābhiṣiktaṃ nṛpatiṃ pradhānapuruṣo balāt /
ādatte na ca no dṛṣṭo'bhāgaḥ puruṣataḥ kvacit //

evaṃ sarvānvaśe cakre jarāsandhaḥ śatāvarān /
taṃ durbalataro rājā kathaṃ pārtha upaiṣyati //

taṇḍulaprasthake rājā kapardinamupāsate / prokṣitānāṃ pramṛṣṭānāṃ rājñāṃ paśupatergṛhe /
paśūnāmiva pramṛṣṭānāṃ rājñāṃ paśupatergṛhe /

kṣatriyaḥ śastramaraṇo yadā bhavati satkṛtaḥ /
tataḥ sma māgadhaṃ saṅkhye pratibādhema yadvayam //

ṣaḍaśītiḥ samānītāḥ śeṣā rājaṃścaturdaśa /
jarāsandhena rājānastataḥ krūraṃ pravartsyate //

prāpnuyātsa yaśo dīptaṃ tatra yo vighnamācaret /
jayedyaśca jarāsandhaṃ sa samrāṇṇiyataṃ bhavet //