Mahabharata · Chapter 2.16

samrāḍguṇamabhīpsanvai yuṣmānsvārthaparāyaṇaḥ /
kathaṃ prahiṇuyāṃ kṛṣṇa so'haṃ kevalasāhasāt //

bhīmārjunāvubhau netre mano manye janārdanam /
manaścakṣurvihīnasya kīdṛśaṃ jīvitaṃ bhavet //

jarāsandhabalaṃ prāpya duṣpāraṃ bhīmavikramam /
yamopi na vijetā'jau tatra vaḥ kiṃ viceṣṭitam //

asmiṃstvarthāntare yuktamanarthaḥ pratipadyate /
tasmānna pratipattistu kāryā yuktā matā mama //

yathā'haṃ vimṛśāmyekastattāvacchrūyatāṃ mama / sannyāsaṃ rocaye sādhu kāryasyāsya janārdana /
pratihanti mano me'dya rājasūyo dūrāharaḥ //
vaiśampāyana uvāca //

pārthaḥ prāpya dhanuḥ śreṣṭhamakṣayyau ca maheṣudhī /
rathaṃ dhvajaṃ hayāṃścaiva yudhiṣṭhiramabhāṣata //
arjuna uvāca /

dhanuḥ śastraṃ śarā vīryaṃ pakṣo bhūmiryaśo balam / prāptametanmaya rājanduṣprāpaṃ yadabhīpsitam /

kule janma praśaṃsanti vaidyāḥ sādhu suniṣṭhitāḥ / balena sadṛśaṃ nāsti vīryaṃ tu mama rocate /

kṛtavīryakule jāto nirvīryaḥ kiṃ kariṣyati /
nirvīrye tu kule jāto vīryavāṃstu viśiṣyate //

kṣatriyaḥ sarvaśo rājanyasya vṛttirdviṣajjaye /
sarvaiguṇairvihīno'pi vīryavānhi tarendripūn //

sarvairapi guṇairyukto nirvīryaḥ kiṃ kariṣyati /
jayasya hetuḥ siddhirhi karma daivaṃ ca saṃśritam //

saṃyukto hi balaiḥ kaścitpramādānnopayujyate //

tena dvāreṇa śatrubhyaḥ kṣīyate sabalo ripuḥ //

dainyaṃ yathā balavati tathā moho balānvite /
tāvubhau nāśakau hetū rājñā tyājyau jayārthinā //

jarāsandhivināśaṃ ca rājñāṃ ca parirakṣaṇam /
yadi kuryām yajñārthaṃ kiṃ tataḥ paramaṃ bhavet //

anārambhe hi niyato bhavedaguṇaniścayaḥ /
guṇānniḥ saṃśayādrājannairguṇyaṃ manyase katham //

kāṣāyaṃ sulabhaṃ paścānmunīnāṃ śamamicchatām /
sāmrājyaṃ tu bhavecchakyaṃ vayaṃ yotsyāmahe parān //