Mahabharata · Chapter 2.100

āmantrayāmi bharatāṃstathā vṛddhaṃ pitāmaham //
rājānaṃ somadattaṃ ca mahārājaṃ ca bāhlikam //

droṇaṃ kṛpaṃ nṛpāṃścānyānaśvatthāmānameva ca / viduraṃ dhṛtarāṣṭraṃ ca dhārtarāṣṭrāṃśca sarvaśaḥ // 2-100-3asaumadattiṃ mahāvīryaṃ vikarṇaṃ ca mahāmatim / yuyutsuṃ sañjayaṃ caiva tathaivānyānsabhāsadaḥ // 2-100-4agāndhārīṃ ca mahābhāgāṃ mātaraṃ ca tathā pṛthām / sarvānāmantrya gacchāmi draṣṭā'smi punaretya vaḥ //
vaiśampāyana uvāca //

na ca kiñcidathocustaṃ hriyā'sannā yudhiṣṭhiram /
manobhireva kalyāṇaṃ dadhyuste tasya dhīmataḥ //
vidura uvāca //

āryā pṛthā rājaputrī nāraṇyaṃ gantumarhati /
sukumārī ca vṛddhā ca nityaṃ caiva sukhocitā //

iha vatsyati kalyāṇī satkṛtā mama veśmani /
iti pārthā vijānīdhvamagadaṃ vo'stu sarvaśaḥ //
pāṇḍavā ūcuḥ /

tathetyuktvā'bruvansarve yathā no vadase'nagha /
tvaṃ pitṛvyaḥ pitṛsamo vayaṃ ca tvatparāyaṇāḥ //

yathā'jñāpayase vidvaṃstvaṃ hi naḥ paramo guruḥ /
yaccānyadapi kartavyaṃ tadvidhatsva mahāmate //
vidura uvāca //

yudhiṣṭhira vijānīhi mamedaṃ bharatarṣabha /
nādharmeṇa jitaḥ kaścidvyathate vai parājaye //

tvaṃ vai dharmaṃ vijānīṣe yuddhe jetā dhanañjayaḥ /
hantā'rīṇāṃ bhīmaseno nakulastvarthasaṅgrahī //

saṃyantā sahadevastu dhaumyo brahmaviduttamaḥ /
dharmārthakuśalā caiva draupadī dharmacāriṇī //

anyonyasya priyāḥ sarve tathaiva priyadarśanāḥ /
parairabhedyāḥ santuṣṭāḥ ko vona na spṛhayediha //

eṣa vai sarvakalyāṇaḥ samādhistava bhārata /
nainaṃ śatrurviṣahate śakreṇāpi samo'pyuta //

himavatyanuśiṣṭo'si merusāvarṇinā purā /
dvaipāyanena kṛṣṇena nagare vāraṇāvate //

bhṛgutuṅge ca rāmeṇa dṛṣṭadvatyāṃ ca śambhunā /
aśrauṣīrasi tasyāpi maharṣerañjanaṃ prati //

kalmāṣītīrasaṃsthasya gatastvaṃ śiṣyatāṃ bhṛgoḥ /
draṣṭā sadā nāradaste dhaumyaste'yaṃ purohitaḥ //

māhāsīḥ sāmparāye tvaṃ buddhiṃ tāmṛṣipūjitām /
purūravasamailaṃ tvaṃ buddhyā jayasi pāṇḍava //

śaktyā jayasi rājño'nyānṛṣīndhargopasevayā /
aindre jaye dhṛtamanā yāmye kopavidhāraṇe //

tathā visarge kaubere vāruṇe kopavidhāraṇe //
ātmapradānaṃ saumyatvamadbhyaścaivopajīvanam //

bhūmeḥ kṣamā ca tejaśca samagraṃ sūryamaṇḍalāt /
vāyorbalaṃ prāpnuhi tvaṃ bhūtebhyaścātmasampadam //

agadaṃ vo'stu bhadraṃ vo draṣṭā'smi punarāgatān /
āpaddharmārthakṛcchreṣu sarvakāryeṣu vā punaḥ //

yathāvatpratipadyethāḥ kāle kāle yudhiṣṭhira /
āpṛṣṭo'sīha kaunteya svasti prāpnuhi bhārata //

kṛtārthaṃ svasmimantaṃ tvāṃ drakṣyāmaḥ punarāgatam /
na hi vo vṛjinaṃ kiñcidveda kaścitpurākṛtam //
vaiśampāyana uvāca //

evamuktastathetyuktvā pāṇḍavaḥ satyavikramaḥ /
bhīṣmadroṇau namaskṛtya prātiṣṭhata yudhiṣṭhiraḥ //