Mahabharata · Chapter 17.2

tataste niyatātmāna udīcīṃ diśamāsthitāḥ /
dadṛśuryogayuktāśca himavantaṃ mahāgirim //

taṃ cāpyatikramantaste dadṛśurvālukārṇavam /
avaikṣanta mahāśailaṃ meruṃ śikhariṇāṃ varam //

teṣāṃ tu gacchatāṃ śīghraṃ sarveṣāṃ yogadhārmiṇām /
yājñasenī bhraṣṭayogā nipapāta mahītale //

tāṃ tu prapatitāṃ dṛṣṭvā bhīmaseno mahābalaḥ /
uvāca dharmarājānaṃ yājñasenīmavekṣya ha //

nādharmaścaritaḥ kaścidrājaputryā parantapa /
kāraṇaṃ kinnu tadbrūhi yatkṛṣṇā patitā bhuvi //
yudhiṣṭhira uvāca /

pakṣapāto mahānasyā viśeṣeṇa dhanañjaye /
tasyaitatphalamadyaiṣā bhuṅkte puruṣasattama //
vaiśampāyana uvāca /

evamuktvā'navekṣyaināṃ yayau bharatasattamaḥ /
samādhāya mano dhīmāndharmātmā puruṣarṣabhaḥ //

sahadevastato vidvānnipapāta mahītale /
taṃ cāpi patitaṃ dṛṣṭvā bhīmo rājānamabravīt //

yo'yamasmāsu sarveṣu śuśrūṣuranahankṛtaḥ /
soyaṃ mādravatīputraḥ kasmānnipatito bhuvi //
yudhiṣṭhira uvāca /

ātmanaḥ sadṛśaṃ prājñaṃ naiṣo'manyata kañcana /
tena doṣeṇa patito vidvāneṣa nṛpātmajaḥ //
vaiśampāyana uvāca /

ityuktvā taṃ samutsṛjya sahadevaṃ yayau tadā /
bhrātṛbhiḥ saha kaunteyaḥ śunā caiva yudhiṣṭhiraḥ //

kṛṣṇaṃ nipatitāṃ dṛṣṭvā sahadevaṃ ca pāṇḍavam /
ārto bandhupriyaḥ śūro nakulo nipapāta ha //

tasminnipatite vīre nakule cārudarśane /
punareva tadā bhīmo rājānamidamabravīt //

yo'yamakṣatadharmātmā bhrātā vacanakārakaḥ /
rūpeṇāpratimo loke nakulaḥ patito bhuvi //

ityukto bhīmasenena pratyuvāca yudhiṣṭhiraḥ /
nakulaṃ prati dharmātmā sarvabuddhimatāṃvaraḥ //

rūpeṇi matsamo nāsti kaścidityasya darśanam /
adhikaścāhamevaika ityasya manasi sthitam //

nakulaḥ patitastasmādāgaccha tvaṃ vṛkodara /
yasya yadvihitaṃ vīra so'vaśyaṃ tadupāśnute //

tāṃstu prapatitāndṛṣṭvā pāṇḍavaḥ śvetavāhanaḥ /
papāta śokasantaptastatonu paravīrahā //

tasmiṃstu puruṣavyāghre patite śakratejasi /
mriyamāṇe durādharṣe bhīmo rājānamabravīt //

anṛtaṃ na smarāmyasya svaireṣvapi mahātmanaḥ /
atha kasya vikāro'yaṃ yenāyaṃ patito bhuvi //
yudhiṣṭhira uvāca /

ekohaṃ nirdaheyaṃ vai śatrūnityarjuno'bravīt /
na ca tatkṛtavāneṣa śūramānī tatopatat //

avamene dhanurgrāhāneṣa sarvāṃśca phalgunaḥ /
tathā caitanna tu tathā kartavyaṃ bhūtimicchatā //
vaiśampāyana uvāca /

ityuktvā prasthito rājā bhīmotha nipapāta ha /
patitaścābravīdbhīmo dharmarājaṃ yudhiṣṭhiram //

bhobho rājannavekṣasva patitohaṃ priyastava /
kinnimittaṃ ca patanaṃ brūhi me yadi vettha ha //
yudhiṣṭhira uvāca /

atibhuktaṃ ca bhavatā prāṇena ca vikatthase /
anavekṣya paraṃ pārtha tenāsi patitaḥ kṣitau //

ityuktvā taṃ mahābāhurjagāmānavalokayan /
śvāpyekonuyayau yaste bahuśaḥ kīrtito mayā //