Mahabharata · Chapter 17.3

tataḥ sannādayañśakro divaṃ bhūmiṃ ca sarvaśaḥ /
rathenopayayau pārthamārohetyabravīcca tam //

svabhrātṝnpatitāndṛṣṭvā dharmarājo yudhiṣṭhiraḥ /
abravīcchokasantaptaḥ sahasrākṣamidaṃ vacaḥ //

bhrātaraḥ patitā me'tra gaccheyuste mayā saha /
na vinā bhrātṛbhiḥ svargamicche gantuṃ sureśvara //

sukumārī sukhārhā ca rājaputrī purandara /
sā'smābhiḥ saha gaccheta tadbhavānanumanyatām //
śakra uvāca /

bhrātṝndrakṣyasi svarge tvamagratastridivaṃ gatān /
kṛṣṇayā sahitānsarvānmā śuco bharatarṣabha //

nikṣipya mānuṣaṃ dehaṃ gatāste bharatarṣabha /
anena tvaṃ śarīreṇa svargaṃ gantā na saṃśayaḥ //
yudhiṣṭhira uvāca /

ayaṃ śvā bhūtabhavyeśa bhakto māṃ nityameva ha /
sa gaccheta mayā sārdhamānṛśaṃsyā hi me matiḥ //
śakra uvāca /

amartyatvaṃ matsamatvaṃ ca rāja- ñśriyaṃ kṛtsnāṃ mahatīṃ caiva siddhim /
samprāptodya svargasukhāni ca tvaṃ tyaja śvānaṃ nātra nṛśaṃsamasti //
yudhiṣṭhira uvāca /

anāryamāryeṇi sahasranetra śakyaṃ kartuṃ duṣkarametadārya /
mā me śriyā saṅgamanaṃ tayā'stu yasyāḥ kṛte bhaktajanaṃ tyajeyam //
indra uvāca /

svarge loke śvavatāṃ nāsti dhiṣṇya- miṣṭāpūrtaṃ krodhavaśā haranti /
tato vicāryi kriyatāṃ dharmarāja tyaja śvānaṃ nātra nṛśaṃsamasti /
yudhiṣṭhira uvāca /

bhaktatyāgaṃ prāhuratyantapāpaṃ tulyaṃ loke brahmavadhyākṛtena /
tasmānnāhaṃ jātu kathañcanādya tyakṣyāmyenaṃ svasukhārthī mahendraḥ //

bhītaṃ bhaktaṃ nānyadastīti cārtaṃ prāptaṃ kṣīṇaṃ rakṣaṇe prāṇalipsum /
prāṇatyāgādapyahaṃ naiva moktuṃ yateyaṃ vai nityametadvrataṃ me //
indra uvāca /

śunā dṛṣṭaṃ krodhavaśā haranti yaddattamiṣṭaṃ vivṛtamatho hutaṃ ca /
tasmācchunastyāgamimaṃ kuruṣva śunastyāgātprāpsyase devalokam //

tyaktvā bhrātṝndayitāṃ cāpi kṛṣṇāṃ prāpto lokaḥ karmaṇā svena vīra /
śvānaṃ cainaṃ na tyajase kathaṃ nu tyāgaṃ kṛtsnaṃ cāsthito muhyase'dya //
yudhiṣṭhira uvāca /

na vidyate sandhirathāpi vigraho mṛtairmartyairiti lokeṣu niṣṭhā /
na te mayā jīvayituṃ hi śakyā- statastyāgasteṣu kṛto na jīvatām //

pratipradānaṃ śaraṇāgatasya striyā vadho brāhmaṇasvāpahāraḥ /
mitradrohastāni catvāri śakra bhaktatyāgaścaiva samo mato me //
vaiśampāyana uvāca /

taddharmarājasya vaco niśamya dharmasvarūpī bhagavānuvāca /
yudhiṣṭhiraṃ prītiyukto narendraṃ ślakṣṇairvākyaiḥ saṃstavasamprayuktaiḥ //

abhijātosi rājendra piturvṛttena medhayā /
anukrośeni cānena sarvabhūteṣu bhārata //

purā dvaitavane cāsi mayā putra parīkṣitaḥ /
pānīyārthe parākrāntā yatra te bhrātaro hatāḥ //

bhīmārjunau parityajya yatra tvaṃ bhrātarāvubhau /
mātroḥ sāmyamabhīpsanvai nakulaṃ jīvamicchasi //

ayaṃ śvā bhakta ityevaṃ tyakto devarathastvayā /
tasmātsvarge na te tulyaḥ kaścidasti narādhipaḥ //

atastavākṣayā lokāḥ svaśarīreṇa bhārata /
prāptosi bharataśreṣṭha divyāṃ gatimanuttamām //
vaiśampāyana uvāca /

tato dharmaśca śakraśca marutaścāśvināvapi /
devā devarṣayaścaiva rathamāropya pāṇḍavam //

prayayuḥ svairvimānaiste siddhāḥ kāmavihāriṇaḥ /
sarve virajasaḥ puṇyāḥ puṇyavāgbuddhikarmiṇaḥ //

sa taṃ rathaṃ samāsthāya rājā kurukulodvahaḥ /
ūrdhvamācakrame śīghraṃ tejasā'vṛtyarodasī //

tato devanikāyyastho nāradaḥ sarvalokavit /
uvācoccaistadā vākyaṃ bṛhadvādī bṛhattapāḥ //

ye'pi rājarṣayaḥ pūrve te cāpi samupasthitāḥ /
kīti pracchādya teṣāṃ vai kururājo'dhitiṣṭhati //

lokānāvṛtya yaśasā tejasā vṛttasampadā /
svaśarīreṇa samprāptaṃ nānyaṃ śuśrama pāṇḍavāt //

tejāṃsi yāni dṛṣṭāni bhūmiṣṭhena tvayā vibho /
veśmāni bhuvi devānāṃ paśyāmūni sahasraśaḥ //

nāradasya vacaḥ śrutvā rājā vacanamabravīt /
bhrātṝnapaśyandharmātmā svapakṣāṃścaiva pārthivān //

śubhaṃ vā yadi vā pāpaṃ bhrātṝṇāṃ sthānamadya me /
tadeva prāptumicchāmi lokānyānna kāmaye //

rājñastu vacanaṃ śrutvā devarājaḥ purandaraḥ /
ānṛśaṃsyasamāyuktaṃ pratyuvāca yudhiṣṭhiram //

sthāne'sminvasa rājendra karmabhirnirjite śubhaiḥ /
kiṃ tvaṃ mānuṣyakaṃ snehamadyāpi parikarṣasi //

siddhiṃ prāptosi paramāṃ yatā nānyaḥ pumānkvacit /
naiva te bhrātaraḥ sthānaṃ samprāptāḥ kurunandana //

adyāpi mānuṣo bhāvaḥ spṛśate tvāṃ narādhipa /
svargo'yaṃ paśya devarṣīnsiddhāṃśca tridivālayān //

yudhiṣṭhirastu devendramevaṃvādinamīśvaram /
punarevābravīddhīmānidaṃ vacanamarthavat //

tairvinā notsahe vastumiha daityanibarhaṇa /
gantumicchāmi tatrāhaṃ yatra me bhrātaro gatāḥ //

yatra sā bṛhatī śyāmā buddhisattvaguṇānvitā /
draupadī yoṣitāṃśreṣṭhā yatra caiva sutā mama //