Mahabharata · Chapter 16.7

maṇḍalāni ca budhyethāḥ pareṣāmātmanastathā /
udāsīnaguṇānāṃ ca madhyasthānāṃ ca bhārata //

caturṇāṃ śatrujātānāṃ sarveṣāmātatāyinām /
mitraṃ cāmitramitraṃ ca boddhavyaṃ te'rikarśana //

atha nānājanapadā durgāṇi vividhāni ca /
balāni ca kuruśreṣṭha bhavatyeṣāṃ yathecchakam //

te ca dvādaśa kaunteya rājāno vividhātmakāḥ /
mantripradhānāśca guṇāḥ ṣaṣṭirdvādaśa ca prabho //

etanmaṇḍalamityāhurācāryā nītikovidāḥ /
atra ṣāḍguṇyamācattaṃ yudhiṣṭhira nibodha tat //

vṛddhikṣayau ca vijñeyau sthānaṃ ca kurusattama /
dvisaptatyāṃ mahābāho tataḥ ṣāḍguṇyajā guṇāḥ //

yathā svapakṣo balavānparapakṣastathā balaḥ /
vigṛhya śatrūnkaunteya yāyātkṣitipatistadā //

yadā pare ca balinaḥ svapakṣaścaiva durbalaḥ /
sārdhaṃ vidvāṃstadā kṣīṇaḥ paraiḥ sandhiṃ masāśrayet //

dravyāṇāṃ sañcayaścaiva kartavyaḥ sumahāṃstathā /
yadā samarthā yānāya nacireṇaiva bhārata //

tadā sarvaṃ vidheyaṃ syātsthānena ca vicārayet /
bhūmiralpaphalā deyā viparītasya bhārata //

hiraṇyarūpyabhūyiṣṭhaṃ mitraṃ kṣīṇamakośabhṛt /
viparītaṃ nigṛhṇīyātsvayaṃ sandhiviśāradaḥ //

sandhyarthaṃ rājaputraṃ vā lipsethā bharatarṣabha /
viparītaṃ na tacchreyaḥ putra kasyāñcidāpadi //

tasyāḥ pramokṣe yatnaṃ ca kuryāḥ sopāyamantravit /
prakṛtīnāṃ ca rājendra rājā dīnānvibhāvayet //

krameṇi yugapadbudhvā vyasanānāṃ balābalam /
pīḍanaṃ stambhanaṃ caiva kośabhaṅgastathaiva ca //

kāryaṃ yatnena śatrūṇāṃ svarājyaṃ rakṣatā svayam /
na ca hiṃsyo'bhyupagataḥ sāmanto vṛddhimicchatā //

kaunteya taddhitaṃ te syātpṛthivīṃ vijigīṣataḥ /
guṇānāṃ bhedane yogamīpsethāḥ saha mantribhiḥ //

sādhusaṅgrahaṇāccaiva pāpanigrahaṇāttathā / ātmasātkaraṇe nityaṃ pālanāni gṛhe tathā /
durbalāścaiva satataṃ nānveṣṭavyā balīyasā //

tiṣṭhethā rājaśārdūla vaitasīṃ vṛttimāsthitaḥ / yadyenamabhiyāyācca balavāndurbala nṛpaḥ /

sāmādibhirupāyaistaṃ krameṇi vinivartayeḥ /
aśaknuvaṃśca yuddhāya niṣpatetsaha mantribhiḥ //

kośena paurairdaṇḍena ye cāsya priyakāriṇaḥ / asambhave tu sarvasya yathā mukhyena niṣpatet /
krameṇānena mokṣaḥ syāccharīraṃ prati kevalam //