Mahabharata · Chapter 16.41

nāsau vṛthā'gninā dagdho yathā tatra śrutaṃ mayā /
vaicitravīryo nṛpatirna te śocyo narādhipa //

vanaṃ praviśatānena vāyubhakṣeṇa dhīmatā /
agnayaḥ kārayitveṣṭimutsṛṣṭā iti naḥ śrutam //

yājakāstu tatastasya tānagnīnnirjane vane /
samutsṛjya yathākāmaṃ jagmurbharatasattama //

sa vivṛddhastadā vahnirvane tasminnabhūtkila /
tena tadvanamādīptamiti te tāpasā'bruvan //

sa rājā jāhnavītīre yathā te kathitaṃ mayā /
tenāgninā samāyuktaḥ svenaiva bharatarṣabha //

evamāvedayāmāsurmunayaste mamānagha /
ye te bhāgīrathītīre mayā dṛṣṭā yudhiṣṭhira //

evaṃ svenāgninā rājā samāyukto mahīpate /
mā śocithāstvaṃ nṛpatiṃ gataḥ sa paramāṃ gatim //

guruśuśrūṣayā caiva jananī te janādhipa /
prāptā sumahatīṃ siddhimiti me nātra saṃśayaḥ //

kartumarhasi rājendra teṣāṃ tvamudakakriyām /
bhrātṛbhiḥ sahitaḥ sarvairetadatra vidhīyatām //
vaiśampāyana uvāca /

tataḥ sa pṛthivīpālaḥ pāṇḍavānāṃ dhurandharaḥ /
niryayau sahasodaryaḥ sadāraśca nararṣabhaḥ //

paurajānapadāścaiva rājabhaktipuraskṛtāḥ /
gaṅgāṃ prajagmurabhito vāsasaikena saṃvṛtāḥ //

tato'vagāhya salile sarve tu kurupuṅgavāḥ /
yuyutsumagrataḥ kṛtvā dadustoyaṃ mahātmane //

gāndhāryāśca pṛthāyāśca vidhivannāmagotrataḥ /
śācaṃ nivartayantaste tatroṣurnagarādbahiḥ //

preṣayāmāsa sa narānvidhijñānāptakāriṇaḥ / gaṅgādvāraṃ kuruśreṣṭho yatra dagdho'bhavannṛpaḥ /

tatraiva teṣāṃ tulyāni gaṅgādvāre'nvaśāttadā /
kartavyānīti puruṣāndattadeyānmahīpatiḥ //

dvādaśe'hani tebhyaḥ sa kṛtaśauco narādhipaḥ /
dadau śrāddhāni vidhivaddakṣaiṇāvanti pāṇḍavaḥ //

dhṛtarāṣṭraṃ samuddiśya dadau sa pṛthivīpatiḥ /
suvarṇaṃ rajataṃ gāśca śayyāśca sumahādhanāḥ //

gāndhāryāścaiva tejasvī pṛthāyāśca pṛthakpṛthak /
saṅkīrtya nāmanī rājā dadau dānamanuttamam //

yo yadicchati yāvacca tāvatsa labhate dvijaḥ /
śayanaṃ bhojanaṃ yānaṃ maṇiratnamatho dhanam //

yānamācchādanaṃ bhogāndāsīśca samalaṅkṛtāḥ /
dadau rājā samuddiśya tayormātrormahīpatiḥ //

tataḥ sa pṛthivīpālo dattvā śrāddhānyanekaśaḥ /
praviveśa punardhīmānnagaraṃ vāraṇāhvayam //

te cāpi rājavacanātpuruṣā ye gatā'bhavan /
saṅkalpya teṣāṃ kulyāni punaḥ pratyāgamaṃstataḥ //

mālyairgandhaiśca vividhairarcayitvā yathāvidhi /
kulyāni teṣāṃ saṃyojya tadācakhyurmahīpateḥ //

samāśvāsya tu rājānaṃ dharmātmānaṃ yudhiṣṭhiram /
nāradopyagamatprītaḥ paramarṣiryathopsitam //

evaṃ varṣāṇyatītāni dhṛtarāṣṭrasya dhīmataḥ /
vanavāse tathā trīṇi nagare daśapañca ca //

hataputrasya saṅgrāme dānāni dadataḥ sadā /
jñātisambandhimitrāṇāṃ bhrātṝṇāṃ svajanasya ca //

yudhiṣṭhirastu nṛpatirnātiprītamanāstadā /
dhārayāmāsa tadrājyaṃ nihatajñātibāndhavaḥ //