મહાભારત · અધ્યાય 16.41

નાસૌ વૃથાઽગ્નિના દગ્ધો યથા તત્ર શ્રુતં મયા ।
વૈચિત્રવીર્યો નૃપતિર્ન તે શોચ્યો નરાધિપ ॥

વનં પ્રવિશતાનેન વાયુભક્ષેણ ધીમતા ।
અગ્નયઃ કારયિત્વેષ્ટિમુત્સૃષ્ટા ઇતિ નઃ શ્રુતમ્ ॥

યાજકાસ્તુ તતસ્તસ્ય તાનગ્નીન્નિર્જને વને ।
સમુત્સૃજ્ય યથાકામં જગ્મુર્ભરતસત્તમ ॥

સ વિવૃદ્ધસ્તદા વહ્નિર્વને તસ્મિન્નભૂત્કિલ ।
તેન તદ્વનમાદીપ્તમિતિ તે તાપસાઽબ્રુવન્ ॥

સ રાજા જાહ્નવીતીરે યથા તે કથિતં મયા ।
તેનાગ્નિના સમાયુક્તઃ સ્વેનૈવ ભરતર્ષભ ॥

એવમાવેદયામાસુર્મુનયસ્તે મમાનઘ ।
યે તે ભાગીરથીતીરે મયા દૃષ્ટા યુધિષ્ઠિર ॥

એવં સ્વેનાગ્નિના રાજા સમાયુક્તો મહીપતે ।
મા શોચિથાસ્ત્વં નૃપતિં ગતઃ સ પરમાં ગતિમ્ ॥

ગુરુશુશ્રૂષયા ચૈવ જનની તે જનાધિપ ।
પ્રાપ્તા સુમહતીં સિદ્ધિમિતિ મે નાત્ર સંશયઃ ॥

કર્તુમર્હસિ રાજેન્દ્ર તેષાં ત્વમુદકક્રિયામ્ ।
ભ્રાતૃભિઃ સહિતઃ સર્વૈરેતદત્ર વિધીયતામ્ ॥
વૈશમ્પાયન ઉવાચ ।

તતઃ સ પૃથિવીપાલઃ પાણ્ડવાનાં ધુરન્ધરઃ ।
નિર્યયૌ સહસોદર્યઃ સદારશ્ચ નરર્ષભઃ ॥

પૌરજાનપદાશ્ચૈવ રાજભક્તિપુરસ્કૃતાઃ ।
ગઙ્ગાં પ્રજગ્મુરભિતો વાસસૈકેન સંવૃતાઃ ॥

તતોઽવગાહ્ય સલિલે સર્વે તુ કુરુપુઙ્ગવાઃ ।
યુયુત્સુમગ્રતઃ કૃત્વા દદુસ્તોયં મહાત્મને ॥

ગાન્ધાર્યાશ્ચ પૃથાયાશ્ચ વિધિવન્નામગોત્રતઃ ।
શાચં નિવર્તયન્તસ્તે તત્રોષુર્નગરાદ્બહિઃ ॥

પ્રેષયામાસ સ નરાન્વિધિજ્ઞાનાપ્તકારિણઃ । ગઙ્ગાદ્વારં કુરુશ્રેષ્ઠો યત્ર દગ્ધોઽભવન્નૃપઃ ।

તત્રૈવ તેષાં તુલ્યાનિ ગઙ્ગાદ્વારેઽન્વશાત્તદા ।
કર્તવ્યાનીતિ પુરુષાન્દત્તદેયાન્મહીપતિઃ ॥

દ્વાદશેઽહનિ તેભ્યઃ સ કૃતશૌચો નરાધિપઃ ।
દદૌ શ્રાદ્ધાનિ વિધિવદ્દક્ષૈણાવન્તિ પાણ્ડવઃ ॥

ધૃતરાષ્ટ્રં સમુદ્દિશ્ય દદૌ સ પૃથિવીપતિઃ ।
સુવર્ણં રજતં ગાશ્ચ શય્યાશ્ચ સુમહાધનાઃ ॥

ગાન્ધાર્યાશ્ચૈવ તેજસ્વી પૃથાયાશ્ચ પૃથક્પૃથક્ ।
સઙ્કીર્ત્ય નામની રાજા દદૌ દાનમનુત્તમમ્ ॥

યો યદિચ્છતિ યાવચ્ચ તાવત્સ લભતે દ્વિજઃ ।
શયનં ભોજનં યાનં મણિરત્નમથો ધનમ્ ॥

યાનમાચ્છાદનં ભોગાન્દાસીશ્ચ સમલઙ્કૃતાઃ ।
દદૌ રાજા સમુદ્દિશ્ય તયોર્માત્રોર્મહીપતિઃ ॥

તતઃ સ પૃથિવીપાલો દત્ત્વા શ્રાદ્ધાન્યનેકશઃ ।
પ્રવિવેશ પુનર્ધીમાન્નગરં વારણાહ્વયમ્ ॥

તે ચાપિ રાજવચનાત્પુરુષા યે ગતાઽભવન્ ।
સઙ્કલ્પ્ય તેષાં કુલ્યાનિ પુનઃ પ્રત્યાગમંસ્તતઃ ॥

માલ્યૈર્ગન્ધૈશ્ચ વિવિધૈરર્ચયિત્વા યથાવિધિ ।
કુલ્યાનિ તેષાં સંયોજ્ય તદાચખ્યુર્મહીપતેઃ ॥

સમાશ્વાસ્ય તુ રાજાનં ધર્માત્માનં યુધિષ્ઠિરમ્ ।
નારદોપ્યગમત્પ્રીતઃ પરમર્ષિર્યથોપ્સિતમ્ ॥

એવં વર્ષાણ્યતીતાનિ ધૃતરાષ્ટ્રસ્ય ધીમતઃ ।
વનવાસે તથા ત્રીણિ નગરે દશપઞ્ચ ચ ॥

હતપુત્રસ્ય સઙ્ગ્રામે દાનાનિ દદતઃ સદા ।
જ્ઞાતિસમ્બન્ધિમિત્રાણાં ભ્રાતૄણાં સ્વજનસ્ય ચ ॥

યુધિષ્ઠિરસ્તુ નૃપતિર્નાતિપ્રીતમનાસ્તદા ।
ધારયામાસ તદ્રાજ્યં નિહતજ્ઞાતિબાન્ધવઃ ॥