Mahabharata · Chapter 16.32

bhagavañśvaśuro me'si daivatasyāpi daivatam /
sa me devātidevastvaṃ śṛṇu satyāṃ giraṃ mama //

tapasvī kopano vipro durvāsā nāma me pituḥ /
bhikṣāmupāgato bhoktuṃ tamahaṃ paryatoṣayam //

śaucane tvāgasastyāgaiḥ śuddhena manasā tathā /
kopasthāneṣvapi mahatsvakupyanna kadācana //

sa prīto varado me'bhūtkṛtakṛtyo mahāmuniḥ /
avaśyaṃ te grahītavyamiti māṃ sobravīdvacaḥ //

tataḥ śāpabhayādvipramavocaṃ punareva tam /
evamastviti ca prāha punareva sa me dvijaḥ //

dharmasya jananī bhadre bhavitrī tvaṃ śubhānane /
vaśe sthāsyanti te devā yāṃstvamāvāhayiṣyasi //

ityuktvā'ntarhito viprastato'haṃ vismitā'bhavam /
na ca sarvāsvavasthāsu smṛtirme vipraṇaśyati //

atha harmyatalasthā'haṃ ravimudyantamīkṣatī /
saṃsmṛtya tadṛṣervākyaṃ spṛhayantī divākaram //

sthitā'haṃ bālabhāvena tatra doṣamabuddhyatī /
atha devaḥ sahasrāṃśurmatsamīpagato'bhavat //

dvidhā kṛtvā'tmano dehaṃ bhūmau ca gagane'pi ca /
tatāpa lokānekena dvitīyenāgamatsa mām //

sa māmuvāca vepantīṃ varaṃ matto vṛṇīṣva ha /
gamyatāmiti taṃ cāhaṃ praṇamya sirasā'vadam //

sa māmuvāca tigmāṃśurvṛthā'hvānaṃ na me kṣamam /
dhakṣyāmi tvāṃ ca vipraṃ ca yena datto varastava //

tamahaṃ rakṣatī vipraṃ śāpādanapakāriṇam /
putro me tvatsamo deva bhavediti tato'bravam //

tato māṃ tejasā'viśya mohayitvā ca bhānumān /
uvāca bhavitā putrastavetyabhyagamaddivam //

tato'hamantarbhavane pituścittānurakṣiṇī /
gūḍhotpannaṃ sutaṃ bālaṃ jale karṇamavāsṛjam //

nūnaṃ tasyaiva devasya prasādātpunareva tu /
kanyā'hamabhavaṃ vipra yathā prāha sa māmṛṣiḥ //

sa mayā sūḍhayā putro jñāyamāno'pyupekṣitaḥ /
tanmāṃ dahati viprarṣe yathā suviditaṃ tava //

yadi pāpamapāpaṃ vā yadetadvivṛtaṃ mayā /
taṃ draṣṭumicchāmi bhagavanvyapanetuṃ tvamarhasi //

yaccāsya rājño viditaṃ hṛdisthaṃ bhavato'nagha /
taṃ cāyaṃ labhatāṃ kāmamadyaiva munisattama //

ityuktaḥ pratyuvācedaṃ vyāso vedavidāṃvaraḥ /
sādhu sarvamidaṃ bhāvyamevametadyathā'ttha mām //

aparādhaśca te nāsti kanyābhāvaṃ gatā hyasi /
devāścaiśvaryavanto vai śarīrāṇyāviśanti vai //

santi devanikāyāśca sankalpājjanayanti ye /
vācā dṛṣṭyā tathā sparśātsangharṣeṇeti pañcadhā //

manuṣyadharmo daivena dharmeṇa hi na duṣyati /
iti kunti vijānīhi vyetu te mānaso jvaraḥ //

sarvaṃ balavatāṃ pathyaṃ sarvaṃ balavatāṃ śuci /
sarvaṃ balavatāṃ dharmaḥ sarvaṃ balavatāṃ svakam //