Mahabharata · Chapter 16.33

bhadre drakṣyasi gāndhāri putrānbhrātṝnsvakāngaṇān /
vadhūśca patibhiḥ sārdhaṃ niśi suptosthitā iva //

karṇaṃ drakṣyati kuntī ca saubhadraṃ cāpi yādavī /
draupadī pañcaputrāṃśca pitṝnbhrātṝṃstathaiva ca //

pūrvamevaiṣa hṛdaye vyavasāyo'bhakavanmama /
yadā'smi codito rājñā bhavatyā pṛthayaiva ca //

na te śocyā mahātmānaḥ sarva eva nararṣabhāḥ /
kṣatradharmaparāḥ santastathā hi nidhanaṃ gatāḥ //

bhavitavyamavaśyaṃ tatsurakāryamanindite /
avaterustataḥ sarve devā bhāgairmahītalam //

gandharvāpsarasaścaiva piśācā guhyarākṣasāḥ /
tathā puṇyajanāścaiva siddhā devarṣayopi ca //

devāśca dānavāścaiva tathā devarṣayo'malāḥ /
te ete nidhanaṃ prāptāḥ kurukṣetre raṇājire //

gandharvarājo yo dhīmāndhṛtarāṣṭra iti śrutaḥ /
sa eva mānuṣe loke dhṛtarāṣṭraḥ patistava //

pāṇḍuṃ marudgaṇādviddhi viśiṣṭatamamacyutam /
dharmasyāṃśo'bhavatkṣattā rājā caiva yudhiṣṭhiraḥ //

kaliṃ duryodhanaṃ viddhi śakuniṃ dvāparaṃ nṛpam /
duḥśāsanādīnviddhi tvaṃ rākṣasānśubhadarśane //

marudgaṇādbhīmasenaṃ balavantamarindamam / viddhiṃ tvaṃ tu naramṛṣimimaṃ pārthaṃ dhanañjayam /
nārāyaṇaṃ hṛṣīkeśamaśvinau yamajau tathā //

dvidhā kṛtvā'tmano dehamādityaṃ tapatāṃ varam /
lokāṃśca tāpayānaṃ vai karṇaṃ viddhi pṛthāsutam //

yaḥ sa vairārthamudbhūtaḥ sangharṣajananaskatathā /
taṃ karṇaṃ viddhi kalyāṇi bhāskaraṃ śubhadarśane //

yaśca pāṇḍavadāyādo hataḥ ṣaṅmirmahārathaiḥ /
sa soma iha saubhadro yogādevābhavaddvidhā //

draupadyā saha sambhūtaṃ dhṛṣṭadyumnaṃ ca pāvakāt /
agrerbhāgaṃ śubhaṃ viddhi rākṣasaṃ tu śikhaṇḍinam //

droṇaṃ bṛhaspaterbhāgaṃ viddhi drauṇiṃ ca rudrajam /
gāṅgeyo vasuvīryeṇa devo mānuṣatāṃ gataḥ //

evamete mahāprajñe devā mānuṣyametya hi /
tataḥ punargatāḥ svargaṃ kṛte karmaṇi śobhane //

yacca vai hṛdi sarveṣāṃ duḥkhametacciraṃ sthitam /
tadadya vyapaneṣyāmi paralokakṛtādbhayāt //

sarve bhavanto gacchantu nadīṃ bhāgīrathīṃ prati /
tatra drakṣyatha tānsarvānye hatāstatra saṃyuge //
vaiśampāyana uvāca /

iti vyāsasya vacanaṃ śrutvā sarvā janastadā /
mahatā siṃhanādena gaṅgāmabhimukho yayau //

dhṛtarāṣṭraśca sāmātyaḥ prayayau saha pāṇḍavaiḥ /
sahito muniśārdūlairgandharvaiśca samāgataiḥ //

tato gaṅgāṃ samāsādya krameṇa sa janārṇavaḥ /
nivāsamakarotsarvo yathāprīti yathāsukham //

rājā ca pāṇḍavaiḥ sārdhamiṣṭe deśe sahānugaḥ /
nivāsamakaroddhīmānsastrīvṛddhapuraḥsaraḥ //

jagāma tadahascāpi teṣāṃ varṣaśataṃ yathā /
niśāṃ pratīkṣamāṇānāṃ didṛkṣūṇāṃ mṛtānnṛpān //

atha puṇyaṃ girivaramastamabhyagamadraviḥ /
tataḥ kṛtābhiṣekāste naiśaṃ karma samācaran //